काठमाडौं– यही भदौ १२ गतेदेखि दाङमा राष्ट्रिय परिचयपत्रको काम वडा तहबाटै हुने भएको छ।
यसअघि जिल्ला प्रशासन कार्यालय घोराही, इलाका प्रशासन कार्यालय लमही र तुलसीपुरबाट हुँदै आएको राष्ट्रिय परिचयपत्र विवरण संकलनको काम भदौ १२ गतेदेखि वडा तहबाटै सञ्चालन हुने भएको हो।
वडा तहबाट राष्ट्रिय परिचयपत्र पाउने भएपछि स्थानीयलाई सहज हुने भएको छ। जिल्लाका दश स्थानीय तहमध्ये सुरुमा घोराही उपमहानगरपालिकामा पहिलो चरणमा अभियान सुरु हुन थालेको छ।
३ देखि ४ महिनाभित्र दाङका सम्पूर्ण १६ वर्षदेखिमाथिका नागरिकलाई राष्ट्रिय परिचयपत्र दिने गरी काम हुने राष्ट्रिय परिचयपत्र तथा पञ्जीकरण विभागका महानिर्देशक तीर्थराज भट्टराईले बताए।
एक वडामा जनसंख्या र भूगोललाई हेरेर कम्तीमा २ देखि ४ दिनसम्म विवरण संकलनका लागि कर्मचारी खट्ने बताउँदै महानिर्देशक भट्टराईले यसरी विवरण संकलनको काम गर्दा जिल्लाका एक सय वडाहरुमा करिब ३ देखि ४ महिनाभित्र सबै नागरिकको विवरण संकलन गरिने बताए।
विवरण संकलनका लागि कर्मचारी वडा कार्यालयमै खटाइनेछ। राष्ट्रिय परिचयपत्रका लागि नागरिकता अनिवार्य हुनुपर्नेछ। दाङमा हालसम्म राष्ट्रिय परिचयपत्र ४७ हजार बढीले प्राप्त गरेका छन्। जिल्ला प्रशासन कार्यालय घोराहीबाट १९ हजार १० जना, इलाका प्रशासन कार्यालय लमहीबाट १८ हजार ६ सय ९३ जना र इलाका प्रशासन कार्यालय लमहीबाट ९ हजार ३ सय ७५ जना गरेर ४७ हजार ७८ जनाले राष्ट्रिय परिचयपत्र प्राप्त गरेको विभागका महानिर्देशक भट्टराईले जानकारी दिएका छन्।
विवरण संकलन गरिसकेपछि राष्ट्रिय परिचयपत्र तथा पञ्जीकरण विभागले परिचयपत्र जारी गर्नेछ। १६ वर्ष उमेर पूरा भई नेपाली नागरिकता लिएका नागरिकको राष्ट्रिय परिचयपत्रका लागि विवरण संकलन हुनेछ।
राष्ट्रिय परिचयपत्र बहुउपयोगी परिचयपत्र भएकाले सबै नागरिकलाई कर्मचारीले भनेबमोजिम आफ्नो नाम दर्ता गराउन प्रमुख जिल्ला अधिकारी हिरालाल रेग्मीले आग्रह गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
