लुम्बिनी प्रदेश सभाको भवन निर्माण अन्तिम चरणमा

समाचार

प्रिया स्मृती गजमेर आइतबार, भदौ ५, २०७९ १७:५२

दाङ- लुम्बिनी प्रदेश सरकारले दाङमा बनाउन थालेको प्रदेश सभा भवन निर्माणको काम अन्तिम चरणमा पुगेको छ।

दुई वर्षअघि वाईबी ईन्फ्रास्टक्चर एण्ड सप्लायर्सले निर्माण ठेक्का लिएको यो काम प्रदेश पूर्वाधार विकास प्राधिकरणका प्रमुख कार्यकारी अधिकृत फेरबदलमा विवाद हुँदा केही समय ढिला भएको हो।

'अहिलेसम्म ९५ प्रतिशत काम सकिएको छ। अब लाइट र साउण्ड सिस्टम जडान गर्न बाँकी छ', प्रदेश पूर्वाधार विकास प्राधिकरणका प्रमुख कार्यकारी अधिकृत छविराज पोख्रेलले भने।

आगामी असोजसम्म निर्माण सम्पन्न गरिसक्नु पर्ने सम्झौतामा उल्लेख छ। त्यतिबेलासम्म काम सकेर प्रदेश सरकारलाई हस्तान्तरण गर्ने पोख्रेलले बताए।

लुम्बिनी प्रदेशको स्थायी राजधानी राप्ती उपत्यकामा आउने भएपछि प्रदेश सरकारले पाँच करोड २१ लाखको लागतमा भवन निर्माण गरिरहेको छ। प्रदेश सभा भवन राप्ती प्राविधिक शिक्षालय परिसरभित्र बनिरहेको छ।

प्रदेश सभा भवन निर्माणको काम सुरु भएको एक वर्ष नाघिसकेको छ। तीन महिनाभित्र प्रिफ्याव मोडेलमा भवन निर्माण सम्पन्न गर्ने सम्झौता भएको थियो। बीचमा डिजाइन फेरेर बनाउन थालिएपछि अर्थ मन्त्रालयले बजेट रोकेको थियो।

बजेट रोकिएपछि पुरानै डिजाइनमा बनाउने सम्झौता अनुसारको काम अघि बढेको बताइएको छ। यसअघि प्रदेश सरकारको बैठक स्थायी राजधानीमा राख्ने तयारी गरिएको थियो। तर, प्रदेश सभा भवन निर्माण कार्य सम्पन्न नहुँदा राख्न सकिएको थिएन।

अब भदौ महिनापछि प्रदेश सभा भवनमा बैठक राख्न सकिने प्रदेश पूर्वाधार विकास प्राधिकरणका प्रमुख कार्यकारी अधिकृत छविराज पोख्रेलले जानकारी दिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।