पोखरा– आगामी असोजमा हुने नवौं राष्ट्रिय खेलकुद प्रतियोगिताका लागि गण्डकी प्रदेशले विशेष प्रशिक्षण सुरू गरेको छ। प्रदेश खेलकुद परिषद्ले पहिलो चरणअन्तर्गत १४ खेलका विषेश प्रशिक्षण शुक्रबारबाट गण्डकी प्रदेशका ५ जिल्लामा सुरू गरेको हो।
गण्डकी प्रदेशले नवौं खेलकुदमा समावेश ३६ वटै खेलमा सहभागिता जनाउने तयारी गरेको छ। तर, विषेश प्रशिक्षण सुरू भएता पनि अशिकांश खेलका प्रशिक्षक छैनन्। प्रदेश खेलकुद परिषद्का सदस्यसचिव तेज गुरुङका अनुसार गण्डकी प्रदेशमा ५/६ खेलका मात्रै आधिकारिक प्रशिक्षक छन्। ‘उत्पादनमा ध्यान नदिँदा प्रशिक्षक उत्पादन शून्य छ। हामी कहाँ ३६ खेलमा ५/६ वटा खेलका मात्रै प्रशिक्षक छन्,’ उनले भने।
हाल पुराना खेलाडी र स्वयंसेवकसँग सम्झौता गरी प्रशिक्षण गराइएको सदस्यसचिव गुरुङले बताए। नवौं राष्ट्रिय खेलकुदको प्रशिक्षणका लागि एथ्लेटिक्सका प्रशिक्षक सुशील नरसिंह राणालाई ल्याइएको उनले जानकारी दिए। प्रशिक्षक राणाले पोखरामा २ महिना प्रशिक्षकसहित खेलाडीलाई प्रशिक्षण गराउने गुरुङको भनाइ छ।
पहिलो चरणमा सुरू भएको विषेश प्रशिक्षण कास्की, नवलपुर, स्याङ्जा र बाग्लुङमा सञ्चालन हुनेछन्। २० दिनका लागि तय गरिएको विशेष प्रशिक्षणमा सफ्ट टेनिस, टेनिस, स्क्वास, खो–खो, हक्की, फेन्सिङ, स्विमिङ, ट्राइयाथलन, साइक्लिङ, महिला ह्याण्डबल, महिला बास्केटबल, महिला फुटबल, महिला क्रिकेट, प्याराग्लाइडिङ, गल्फ, कुस्ती, सुटिङ र आर्चरी समावेश छन्।
अर्काे चरणमा आगामी भदौ ९–१५ गतेसम्म २२ खेलमा जिल्ला छनोट सञ्चालन गर्ने तालिका छ। विशेष प्रशिक्षण र जिल्ला छनोटपछि पोखरामा भदौ १५–१८ गतेसम्म अन्तिम छनोट गरिने तालिका छ।
विशेष प्रशिक्षण शुभारम्भ कार्यक्रममा गण्डकी प्रदेशका अर्थमन्त्री रामजीप्रसाद बराल जीवन प्रतियोगिता सम्पन्न गर्न आर्थिक अभाव हुन नदिने बताए। व्यबस्थापकीय, सम्मान–सत्कार, खेलाडीहरुलाई आधारभूत व्यवस्थापकीय क्षेत्रमा कुनै कमीकमजोरी नगर्न मन्त्री बरालले निर्देशन दिँदै आर्थिक अभावले प्रदेशले गर्ने कुनैपनि दाहित्व बहन गर्न तयार रहेको बताए। हरेक हिसाबले नवौं राष्ट्रिय खेलकुद प्रतियोगिता सम्पन्न गर्न प्रदेश सरकार तयार रहेको मन्त्री बरालको भनाइ छ।
नवौं राष्ट्रिय खेलकुद आगामी असोज २८ देखि कात्तिक ३ गतेसम्म गण्डकी प्रदेशमा सञ्चालन हुनेछ। ३९ वर्षपछि हुन लागेको उक्त प्रतियोगितामा कम्तीमा १ खेल सबै जिल्लामा गर्ने गरी प्रदेश खेलकुद परिषद्ले प्रस्ताव पठाएको छ। सबै जिल्लामा स्थलगत निरीक्षण गरी खेलस्थल तय गरिने राष्ट्रिय खेलकुद परिषद (राखेप)ले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772271039.png)
