काठमाडौं– गत साता नेपाली सिनेमा हलमा कुनै पनि फिल्म रिलिज भएनन्। साउन महिनाको अन्तिम शुक्रबार हलमा त्यसअघि नै प्रदर्शनमा आएका नेपाली फिल्महरु चलेका थिए। गत शुक्रबारभन्दा एकदिन अघिबाट भने दुई भारतीय फिल्महरु ‘लालसिंह चड्ढा’ र ‘रक्षाबन्धन’ प्रदर्शनमा आएका थिए।
नेपाली फिल्महरु प्रायः शुक्रबार नै हलमा रिलिज हुने गर्छन्। गत साता शून्य रहेको सिनेमा हलमा नेपाली फिल्मको उपस्थिति भदौ महिनामा भने फरक हुने देखिएको छ। भदौभर नै थुप्रै नेपाली फिल्महरु एकसाथ प्रदर्शनमा आउन लागेका छन्।
भदौको तेस्रो शुक्रबारसम्म ७ नेपाली फिल्महरुले आफ्नो प्रदर्शन मितिलाई सुरक्षित गरिसकेका छन्। भदौको तेस्रो शुक्रबारसम्म रञ्जित रौनियारको फिल्म ‘माइकल अधिकारी’देखि ज्ञानेन्द्र देउजाको फिल्म ‘झिंगेदाउ’सम्म प्रदर्शन हुने देखिएका छन्।
भदौ ३ गते तीन नेपाली फिल्मको प्रदर्शन हुँदैछन्। कृष्णजन्माष्टमीको अवसर पारेर नेपाली निर्माताहरुले यो दिन फिल्मलाई ‘भिण्डन्त’ गराउने सोचेको देखिन्छ। शुक्रबारबाट ‘कृष्ण लिला’, ‘माइकल अधिकारी’ र ‘प्रेमगञ्ज’ फिल्म प्रदर्शनमा आउँदैछन्।
आरआर फिल्म्सको प्रस्तुति रहेको यो फिल्मलाई दीपक ओलीले निर्देशन गरेका हुन्। लक्ष्मण सुवेदीको कथामा आधारति रहेको फिल्ममा पुष्प खड्का, श्रद्धा क्षेत्री, बुद्धि तामाङ, रविन्द्र झा, भावना गुरुङ, नविन रेग्मीलगायतका कलाकारको अभिनय रहेको छ। फिल्ममा प्रेम कथासँग सम्बन्धित विषयलाई प्रस्तुत गरिएको छ।
त्यस्तै, शुक्रबारबाट प्रदर्शनमा आउन लागेको सौगात मल्ल र सृष्टि श्रेष्ठ अभिनित फिल्म ‘माइकल अधिकारी’लाई रञ्जित रौनियारले निर्देशन गरेका हुन्। भारतमा रहेर फिल्म क्षेत्रमा सक्रिय रहेका रौनियारले विभिन्न टेलिभिजन कार्यक्रमहरुलाई निर्देशन गरेको अनुभव छ। नेपाली फिल्ममा भने उनको यो पहिलो फिल्म हो।
‘माइकल अधिकारी’मा सेरोगेसीसँग सम्बन्धित कथालाई प्रस्तुत गरिएको छ। फिल्ममा रौनियारकै कथा रहेको छ। गोपीकृष्ण प्रोडक्सनको प्रस्तुति रहेको फिल्मलाई निरक पौडेलले निर्माण गरेका हुन्। फिल्ममा सौगात र सृष्टि बाहेक आशान्त शर्मा, लोनिभा तुलाधर, एनि कुँवर, हेमन्त बुढाथोकीलगायतका कलाकारको अभिनय रहेको छ।
त्यस्तै, परिच्छेद सेनको डेब्यु निर्देशन रहेको फिल्म ‘प्रेमगञ्ज’ पनि शुक्रबारबाट प्रदर्शनमा आउँदै छ। प्रेमकथामा आधारित फिल्ममा बेनिशा हमाल, तेज गिरी, सुप्रिया खनाल, सिम्रन खड्कालगायतका कलाकारको अभिनय रहेको छ। फिल्मको कथा पनि निर्देशन सेनले नै लेखेका हुन्। फिल्म चलचित्र चौतारीको ब्यानरमा निर्माण भएको पहिलो फिल्म हो।
त्यस्तै, भदौको दोस्रो शुक्रबार अर्थात १० गते दुई फरक विषयवस्तुका फिल्महरु प्रदर्शनमा आउँदै छन्। बहुप्रतिक्षित र आश गरिएका दुई वैकल्पिक धारका फिल्महरु ‘राधा’ र ‘प्रकाश’ दोस्रो शुक्रबारबाट प्रदर्शनमा आउँदैछन्।
सूवर्ण थापाको निर्देशनमा बनेको ‘राधा’मा एकल महिलाको कथालाई देखाइएको छ। सृष्टि श्रेष्ठको मुख्य अभिनय रहेको उक्त फिल्ममा खगेन्द्र लामिछाने, सौगात मल्ल, निश्चल बस्नेत, दिव्य देव पन्तलगायतका कलाकारहरुको अभिनय रहेको छ। श्रीमान् बेपत्ता भएपछि एक्लो जीवन बिताइरहेकी महिलाको कथाव्यथामा उक्त फिल्म आधारित रहेको छ। फिल्ममा निर्देशक थापाकै कथा रहेको छ।
त्यस्तै, दिनेश राउतको निर्देशनमा बनेको ‘प्रकाश’ पनि भदौ १९ गतेबाट प्रदर्शनमा आउँदै छ। ‘लपब्वाय’को रुपमा चिनिएका अभिनेता प्रदीप खड्काको फरक किसिमको भूमिका रहेको उक्त फिल्ममा कर्णालीमा शिक्षक बन्न संघर्ष गर्ने एक युवकको कथा प्रस्तुत गरिएको छ।
‘प्रसाद’ फिल्म निर्देशन गरेर सामाजिक बहस सिर्जना गर्न सफल भएका निर्देशक राउतको यो फिल्मलाई पनि लामो समयदेखि प्रतिक्षारत फिल्म हो।
फिल्ममा प्रदीपबाहेक रेनु योगी, दिया मास्केलगायतका कलाकारको मुख्य अभिनय रहेको छ। फिल्ममा विकास सुवेदीको कथा रहेको छ।
त्यस्तै, भदौ १७ गते अर्थात तेस्रो शुक्रबार दुई नेपाली फिल्महरु सिनेमा हलमा प्रदर्शन हुँदै छन्। सो दिनबाट पूजा शर्मा अभिनित ‘सम्हालिन्छ कहिले मन’देखि केकी अधिकारी र आँचल शर्मा अभिनित ‘झिंगेदाउ’ फिल्म प्रदर्शनमा आउँदै छन्।
‘सम्हालिन्छ कहिले मन’ क्रिकोणात्मक प्रेम सम्बन्धमा आधारित फिल्म हो। फिल्ममा पूजा शर्मासँगै आकाश श्रेष्ठ, सुनम तोपदेनलगायतका कलाकारको अभिनय रहेको छ। फिल्मलाई सुदर्शन थापाले निर्देशन गरेका हुन् भने यसमा कथा महेश दवाडीको रहेको छ।
त्यस्तै, ज्ञानेन्द्र देउजाको फिल्म ‘झिंगेदाउ’ पनि भदौ १७ गतेबाट प्रदर्शनमा आउँदै छ। ७ वर्षपछि निर्देशनमा कमब्याक गरेका देउजाले थुप्रै सफल फिल्महरु निर्देशन गरिसकेका छन्। देउजाको कमब्याक सिनेमा ‘झिंगेदाउ’ पारिवारिक कथावस्तुमा आधारित रहेको छ।
विवाहअघि दाजुभाईको सम्बन्ध र विवाहपछि त्यो सम्बन्धमा आउने उतारचढावको कथा यो फिल्ममा देखाइएको छ। भिमनिधि तिवारीको कथामा आधारित रहेको यो फिल्ममा केकी अधिकारी, आँचल शर्मा, मुकुन भुसाल, हिउँकला गौतम, संगम भण्डारीलगायतका कलाकारको अभिनय रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
