काठमाडौं– प्रधानमन्त्री शेरबहादुर देउवाका नातेदार दीपेन्द्र कुँवर बढुवाका लागि अयोग्य हुनेभएपछि नियमावली नै संशोधन गरेको सरकारले उनै कुँवरलाई पहिलो नम्बरमा बढुवा गरेको छ।
नियमावली संशोधन गरिएकै बेला नेपाल लाइभले प्रधानमन्त्री देउवा समेतका नातेदार कुँवरलाई पहिलो नम्बरमा एसएसपी बनाउने र त्यसको केही समयपछि डीआईजी बनाउने तयारी गरेको बारे समाचार सम्प्रेषण गरेको थियो।
नभन्दै उनै कुँवरलाई शनिबार सार्वजनिक बिदाको दिन पहिलो नम्बरमा सरकारले बढुवा गरेको हो। कुँवर प्रधानमन्त्री शेरबहादुर देउवाका स्वकीय सचिव भानु देउवाका बहिनी ज्वाँई हुन्।
कामु एसएसपीको ११ औं नम्बरमा रहेका र कमाण्ड र कार्यक्षमता कमजोर रहेको भनिएका उनै कुँवरलाई सरकारले पुरस्कार स्वरुप पहिलो नम्बरमा बढुवा गरेको छ।
उनी दोस्रो नम्बरमा बढुवा भए पनि कुँवर आफ्नो ब्याचको भने पहिलो नम्बरमा बढुवा भएका हुन्। उनीभन्दा अघि पहिलो नम्बरमा बढुवा भएका प्रवीण कँडेल नेपाल प्रहरीबाट सशस्त्रमा आएका अधिकृत हुन्।
नियमावली संशोधन नगरेको भए कुँवर आउँदो चैतसम्म बढुवाका लागि योग्य नै हुँदैन थिए। सशस्त्र प्रहरी नियमावलीको नियम ४० अनुसार एसपीबाट एसएसपीमा बढुवा हुनका लागि एसपीमा ४ वर्ष सेवा गरेको हुनुपर्ने उल्लेख थियो।
४ वर्ष सेवा नगरेको भए पनि एसएसपी पद रिक्त भएको अवस्थामा कायममुकाय एसएसपीको दर्जा दिएर काम गर्न भने नरोक्ने उल्लेख नियमावलीले गरेको थियो। तर एसपीबाट कन्फम एसएसपी हुन भने ४ वर्ष सेवा अनिवार्य गरेको हुनुपर्ने प्रावधान थियो।
उक्त प्रावधानका कारण कुँवर कन्फम एसएसपी बन्न नसक्ने भएपछि नियमावली नै संशोधन गरिएको थियो। नियम ४० मा उल्लेख भएको एसपी दर्जामा ४ वर्षसम्म सेवा गरेको व्यक्ति बढुवाका लागि योग्य हुने भन्ने ठाउँमा ३ वर्ष बनाइएको थियो।
असार २३ गते नियमावली संशोधनको सूचना राजपत्रमा सार्वजनिक हुनेबित्तिकै बढुवाका लागि सूचना निकालिएको थियो ।
कमाण्ड कन्ट्रोल र कार्यक्षमतामा कमजोर कुँवर शक्तिकेन्द्रको पहुँचमामा नियमावली नै संशोधन गरेर पहिलो नम्बरमा बढुवा भएपछि सशस्त्रमा चरम असन्तुष्टि छाएको छ।
एसपी डीएसपीमा बढुवा हुँदा ६० नम्बरमा आएका कुँवर एसपी बढुवा हुँदा आफ्नो ब्याचको १० नम्बरमा आएका थिए। अहिले एसएसपी बढुवा हुँदा पहिलो नम्बरमा आएका छन्।
कामु एसएसपीबाट कन्फम एसएसपीको पहिलो नम्बरमा बढुवा भएका उनै कुँवरलाई डीआईजीमा समेत बढुवा गर्ने तयारी गरिएको छ।
सशस्त्र प्रहरीमा अहिले तीन डीआईजीको पद रिक्त छ। प्रतिस्पर्धी हुँदासमेत डीआईजी बढुवाको तयारी सशस्त्र हेडक्वाटरले थालेको छैन। कुँवर बल्ल बढुवामा सिफारिस भएका छन्। उनले फुली लगाएपछि डीआईजीको बढुवा खुलाएर उनै कुँवरलाई तत्कालै डीआईजीमा बढुवा गर्ने तयारी बालुवाटरको रहेको स्रोतको भनाइ छ।
सशस्त्र प्रहरीको डीआईजीमा बढुवा हुनका लागि स्टाफ कलेज पास गर्नुपर्ने हुन्छ। तर कुँवर भने स्टाफ कलेजको प्रवेश परीक्षामै दुई पटकसम्म फेल भएका थिए। उनै कुँवरलाई स्टाफ कलेज पास गर्नका लागि गत वर्ष त्रिभुवन विश्वविद्यालयको उपस्थितिबिनै परीक्षा लिएर पास गराइएको थियो।
तत्कालीन एआईजी पुष्पराम केसी (पछि आईजी भएर अवकाश) को नेतृत्वमा प्रवेश परीक्षा समिति बनाएर कुँवरलाई पास गरिएको थियो। प्रवेश परीक्षा पास गरेपछि मात्रै शिवपुरीस्थित स्टाफ कलेजमा अवसर पाउँछन्।
स्टाफ कलेज पास गरेकै एसएसपीहरु डीआईजीका लागि प्रतिस्पर्धी भए पनि कुँवर कन्फम एसएसपी नभएकै दरबन्दी नै खाली राखिएको छ। कन्फर्म एसएसपीको सिफारिसमा परेका कुँवरले फुली लगाएपछि डीआईजी बढुवाका तयारी सुर गर्ने सरकारको तयारी छ।
अहिले कन्फम एसएसपी हुँदै डीआईजीमा समेत बढुवा भएको अवस्थामा कुँवर भावि आईजीको बलियो दाबेदार बन्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1785139095.jpg)
-1764146706.png)
