राजनीति

प्रदेश र संघको निर्वाचन फागुनमा सार्ने विषयमा सत्ता गठबन्धनमा छलफल

डिबी खड्का सोमबार, साउन २, २०७९ १८:०६

फाइल तस्बिर

काठमाडौं– सत्ता गठबन्धनमा प्रदेश र संघको निर्वाचन मंसिरमै गर्ने वा फागुनमा सार्ने विषयमा छलफल प्रारम्भ भएको छ। मंसिरमा निर्वाचन हुने चर्चा चलिरहेका बेला सत्ता गठबन्धनका शीर्ष नेताहरुले मनोनयन दर्ता वा सपथ कहाँबाट कार्यकाल गन्ने भन्ने विषयमा छलफल चलाएका हुन्।

सोमबार कांग्रेस केन्द्रीय कार्यसमितिको बैठकअघि प्रधानमन्त्री तथा कांग्रेस सभापति शेरबहादुर देउवाको सरकारी निवास बालुवाटारमा बसेको बैठकमा समेत उक्त विषयले प्रवेश पाएको छ।

कांग्रेसका एक पदाधिकारीले उक्त विषयमा छलफल भएको नेपाल लाइभलाई बताए। निर्वाचन मंसिरमा गर्नुभन्दा फागुनमा सार्दा सहज हुने उक्त विषय प्रवेश गराउने कांग्रेस नेताको आशय थियो। सत्ता गठबन्धनमा रहेका अन्य नेताहरु समेत 'सकारात्मक' नै रहेको बताउँदै पार्टीमा पहिल्यै छलफल गरेर निष्कर्षमा पुग्नुपर्ने बैठकमा सहभागी ती नेताले बताए।

तर, प्रधानमन्त्री तथा कांग्रेस सभापति देउवाले भने उक्त विषयमा 'विस्तारै' छलफल गर्दै जाने भन्दै विषयान्तर गरेका थिए।

यसअघि प्रदेशसँगै प्रतितिधि सभाको निर्वाचन २०७४ साल मंसिर १० गते र २१ गते गरी दुई चरणमा भए पनि सांसदहरुले सपथ भने फागुनमा मात्रै लिएका थिए। त्यही कारणले संसद् फागुनसम्म रहनुपर्ने एक पक्षको तर्क छ। अर्को पक्षले भने मनोनयन दर्ता गरेको मितिलाई मान्यता दिनुपर्ने बताइरहेको छ।

सभामुख अग्निप्रसाद सापकोटाले पनि वर्तमान प्रतिनिधि सभाको कार्यकाल कहिलेसम्म रहने भन्नेमा छलफल सुरु भएको बताएका छन्।

सोमबार संसदीय मामिला पत्रकारसँग भएको अन्तर्क्रियामा उनले निर्वाचन घोषणापछि संसद्को अवस्था के हुने भन्ने बारेमा उपसभामुखको सपथका दिन राष्ट्रपति कार्यालयमा सामान्य कुराकानी भएको बताए।

'उक्त समारोहमा राष्ट्रपति, उपराष्ट्रपति, प्रधानमन्त्री, राष्ट्रिय सभाका अध्यक्षसँग यस बारेमा सामान्य छलफल भएको थियो', उनले भने, 'छलफल गर्दै जाउँ के निष्कर्ष निस्कन्छ, त्यही गरौँ भन्ने विषयमा कुराकानी भयो।'

छलफलका क्रममा संसद्को कार्यकाल मनोनयन गर्ने दिनसम्म रहन्छ भन्ने सबैको बुझाइ रहेको उनले बताए। 'संसद्को कार्यकाल नसकिँदै विघटन हुँदा सभामुख र उपसभामुख बाहेक सांसदको पद नरहने अवस्था हो', सभामुख सापकोटाले भने, 'यसबारेमा संविधानविद्सँग छलफल गरेर निष्कर्षमा पुगिन्छ।'

निर्वाचन आयोगले भने सरकारलाई मंसिर २ गतेलाई निर्वाचन मिति सिफारिस गरेको छ। निर्वाचन तयारीका लागि १२० दिन जरुरी हुने आयोगको मान्यता छ। मंसिरमै निर्वाचन गर्नका लागि सरकारले यही महिनाको पहिलो हप्ताभित्रै निर्वाचन मिति घोषणा गर्नुपर्ने हुन्छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।