एलपीएल र सीपीएल : सन्दीपलाई आईपीएलमा बिग्रेको छवि सुधार्ने मौका

क्रिकेट

दीप सुवेदी बिहीबार, असार २३, २०७९ ०९:०९

काठमाडौं– गत वर्ष माघ अन्तिमतिर भारतको बैंग्लोरमा सन् २०२२ को इन्डियन प्रिमियर लिग (आईपीएल)को नयाँ सिजनको लागि मेगा अक्सन हुँदै थियो। नेपालबाट सन्दीप लामिछानेसहित कूल १५ खेलाडीले अक्सनका लागि नाम दर्ता गरेका थिए। तर, अक्सनमा भने सन्दीप मात्र परे।

सन्दीपले त्यसअघि दिल्ली क्यापिटल्सबाट आईपीएल खेलिसकेका थिए। सन् २०१८ मा पहिलो पटक दिल्लीमा अनुबन्ध हुँदै आईपीएलमा डेब्यू गरेका सन्दीप कूल तीन सिजन खेल्दा एक सिजन मैदानमा उत्रन पाएनन्। २०२० को सिजन उनी पूरा सिजन बेन्चमा सीमित रहे।

२०२१ मा कुनै पनि टिममा नपरेका उनी यो पटक भने छनोट हुने अपेक्षा गरिएको थियो। यस पटक आईपीएलमा दुई नयाँ टोली थपिएका थिए, लखनऊ सुपर जायन्ट्स र गुजरात टाइटन्स। ८ बाट १० टोली भएसँगै सन्दीपले मात्रै होइन यसपटक थ्रुप्रै नयाँ खेलाडीले मौका पाउने आकलन गरिएको थियो।

तर, आफ्नो बेस प्राइज ४० लाख मात्र राखेका सन्दीप दुई दिनसम्म चलेको अक्सनमा बिक्री भने हुन सकेनन्। अक्सनको पहिलो दिन अक्नसनर चारु शर्माले सन्दीपका लागि अतिरिक्त समय प्रदान गरेका थिए। तर, सन्दीप कुनै टिमको नजरमा परेनन्। दोस्रो दिन पनि उनलाई कुनै टोलीले लिएनन् र सन्दीपको आईपीएल खेल्ने इच्छा अन्त्य भयो।

आईपीएलमा नबिकेका सन्दीप लगत्तै दोस्रो संस्करणको ‘द हन्ड्रेड’ लिगमा पनि बिक्न सकेनन्। सन्दीपले अक्सनमा ६० हजार पाउन्ड स्ट्रर्लिङ (झन्डै १ करोड नेपाली रुपैयाँ) मूल्य तोकेका थिए। तर, सन्दीपलाई कुनैपनि टोलीले अनुबन्ध गरेनन्। लगातार विदेशी लिगले सन्दीपलाई पत्याउने स्थिति रहेन। त्यसपछि सन्दीप सिनियर टोलीमा व्यस्त रहे। हाल उनी आईसीसी विश्वकप लिग–२ त्रिकोणात्मक ओडीआई सिरिजको तयारीका लागि नेपाली टोलीसँग क्यानाडामा छन्।

तर, सन्दीप जनवरीपछि लगातार दुई विदेशी लिगका लागि अनुबन्धित भएका छन्। मंगलबार मात्रै श्रीलंका क्रिकेट बोर्डले आयोजना गर्ने लंका प्रिमियर लिग (एलपीएल)मा ५० लाख नेपाली रुपैयाँमा डम्बुल्ला जायन्ट्समा अनुबन्ध भएका सन्दीप त्यसको एक दिनपछि क्यारेबियन प्रिमियर लिगको (सीपीएल)को दशौं संस्करण लागि जमैका तलावाजबाट खेल्ने पक्का भएका छन्। तर, उनलाई कति रकममा भित्र्याएको हो त्योबारे भने खुलाइएको छैन।

आईपीएलले बिगारेको छवि सुधार्ने मौका
आईपीएलमा बिक्री हुन त्यति सजिलो भने छैन। आईपीएल नखेलेको खेलाडीहरुको हकमा सम्बन्धित राष्ट्रिय टोलीबाट गरेको अन्तर्राष्ट्रिय प्रदर्शनलाई टोलीहरूले अनुबन्धको आधार बनाउँछन्। तर, नेपालले बलिया टोलीसँग खेल्ने अवसर गुमाउँदै आएको छ। त्यसैले सन्दीपका लागि एलपीएल र सीपीएल आईपीएलले बिगारेको छवि सुधार्ने मौका हो। उनले यी दुई लिगमा प्लेइङ–११ मा स्थान बनाउन विश्व क्रिकेकटमा नाम चलिसकेका क्रिकेटरसँग प्रतिस्पर्धा गर्ने छन्।

एलपीएलमा सन्दीप आवद्द भएको टोलीले ६ विदेशी खेलाडी अनुबन्ध गरेको छ। यस टोलीमा अस्ट्रेलियन टोलीबाट खेलिसकेका डार्सी सर्ट र बेन कटिङ रहेका छन्। यस्तै, न्यूजिल्यान्डका विकेटकिपर ब्याट्सम्यान टिम सिफर्ट तथा पाकिस्तानका ब्याटर हैदर अलि समेत डम्बुलामा रहेका छन्। वेस्ट इन्डिजका तीव्र गतिका बलर शेल्डन कट्रेल रहेका डम्बुला श्रीलंकाको सिमित ओभर क्रिकेटका कप्तान डसुन शनकाको कप्तानी रहने छ।

यस्तै, श्रीलंकाका विस्फोटक विकेटकिपर ब्याटरको छवि बनाएका भानुका राजापाक्षे, श्रीलंकाको टोलीबाट खेलिसकेका नुवान प्रदीप र रमेश मेन्डिस समेत डम्बुलाको टोलीमा रहेका छन्। यस लिगमा हरेक खेलमा एक टोलीमा चार विदेशी खेलाडी प्लेइङ– ११ मा रहने नियम रहेको छ। त्यसैले सन्दीप प्लेइङ– ११ मा रहने सम्भावना उच्च रहेको छ।

यता, सन्दीपले सीपीएलको अघिल्लो संस्करण २०२० मा पनि जमैकाबाट खेलेका थिए। त्यसपछिको संस्करणमा भने सन्दीप सहभागी हुन पाएका थिएनन्। उनी २०२१ को संस्करणमा भने ट्रिन्बागो नाइट राइडर्समा अनुबन्ध भएका थिए। तर,सोही समयमा नेपालले ओमान र अमेरिकासँग त्रिकोणात्मक सिरिज खेल्यो। त्यसैकारण उनले सीपीएल गुमाए।

जमैकाले यसपटक ५ विदेशी खेलाडीको कोटामा ५ जनालाई ड्राफ्ट अगाडी नै अनुबन्ध गरेको छ। जमैकामा सन्दीपसँगै पाकिस्तानका मोहम्मद अमिर र इमाद वासिम रहेका छन्। अस्ट्रेलियाका क्रिस ग्रीन तथा दक्षिण अफ्रिकाका मिगाली पिटोरियस् पनि जमौकामा रहेका छन्।

सीपीएल ३० अगस्टदेखि ३० सेप्टेम्बरसम्म सेन्ट किट्स एन्ड नेभिसमा आयोजना हुँदैछ। सन्दीप हाल क्यानडामा छन्। क्यानडासँगको दुई एकदिवसीय सिरिजमा १–० ले पराजित भएसँगै नेपाली टोली अब आईसीसी विश्वकप लिग–२ त्रिकोणात्मक ओडीआई सिरिज खेल्न स्कटल्यान्ड जानेछ। नेपाल, स्कटल्यान्ड र नामिबियाबीचको खेल खेल १७ जुलाईमा सकिनेछ।