काठमाडौं– पछिल्लो समयमा नेपाली क्रिकेटमा धेरै उत्तरचढाव आए। कहिले प्रशिक्षकको राजीनामा त कहिले खेलाडी वर्गीकरणको विवादले नेपाली टोलीको प्रदर्शन सन्तोषजनक हुन सकेन। यता, राष्ट्रिय टोलीमा १६ वर्ष योगदान दिएका ज्ञानेन्द्र मल्ल पनि लामो समय मैदान बाहिर रहे।
करिब ५ महिना मैदान बाहिर रहेर सबैभन्दा भरपर्दा र अनुभवी ब्याट्सम्यानको रुपमा नेपाली टोलीमा पुनरागमन गरेका ज्ञानेन्द्रबाट मुख्य प्रशिक्षक मनोज प्रभावकरले कम्तिमा सुधारिएको प्रदर्शनको आशा राख्दै आएका छन्। त्यसैले होला उनले केन्याविरुद्धको ५ टी२० आई सिरिजका सुरुआती खेलमा मल्ललाई नै मौका दिइरहेका छन्।
तर, ज्ञानेन्द्रले भने आशाअनरुप खेल प्रदर्शन गर्न सकेका छैनन्। नैरोबीस्थित जिमखाना क्लब ग्राउन्डमा जारी सिरिजमा मल्लले दुई खेलमा ३४ बलमा २४ रन मात्र बनाए। पहिलो सिरिजमा ३० बलमा २३ रन बनाएका मल्ल दोस्रो खेलमा भने १ रनमै समेटिन पुगे। यी दुवै खेलमा मुख्य प्रशिक्षक मनोजले पछिल्लो समय उत्कृष्ट लयमा रहेका युवा ब्याटर देव खनाललाई बेञ्चमा राख्दै मल्ललाई मौका दिएका थिए। तर, लामो समयपछि मैदानमा देखिएका मल्ल चुस्त देखिएनन्।
पहिलो खेलमा ओपनर पवन सराफ आउट भएपछि मैदान छिरेका मल्ललाई २३ रन बटुल्न निक्कै संघर्ष गर्नुपरेको थियो। ३० बलमा ३ चौका मात्रै प्रहार गरेका मल्लले कुनै समय पनि अनुभवी ब्याट्सम्यानको रंग देखाउन सकेनन्। उनलाई विराज पटेलले ११औं ओभरको अन्तिम बलमा राकेप पटेलको हातबाट क्याच गराए।
लगत्तै रोहित पौडेल आउट भएपछि समस्यामा परेको नेपाललाई मध्यक्रमका दीपेन्द्रसिंह ऐरीले ३३ र आरिफ शेखले २४ रन बटुल्दै नेपाललाई ५ विकेटको जित दिलाएका थिए। तर, दोस्रो दिन भने नेपाली टोलीले केन्यासँग पहिलोपटक हार बेहोर्यो।
सन् २०१३ मा भएको आईसीसी टी–२० विश्वकप क्वालिफायरमा ६ विकेटको पराजय भोगेको केन्याले नेपाललाई १८ रनले पराजित गर्न पुग्यो। यो खेलमा न ज्ञानेन्द्र चले न दीपेन्द्र र आरिफ नै।
सन् २०१३ मा केन्याविरुद्ध मैदान उत्रिँदाको टोलीमा मल्ल पनि थिए। त्यस खेल खेलेका शेम एनगोचे, एलेक्स ओबान्डा, कोलिन्स अबुया, राकेप पटेल, एलिजाह ओटिएनो र नेहेमिह ओडएम्बो अहिले पनि केन्याको टोलीमा छन्। उक्त खेलमा शरद भेषावकरले उत्कृष्ट फिनिसिङ गर्दै नेपाललाई जिताएका थिए। अन्तिम ओभरमा शरदले ३ छक्कासहित २० रन प्रहार गर्दै नेपाललाई जित दिलाएका थिए।
तत्कालीन कप्तान पारस खड्का तथा सुवास खकुरेलले ५४-५४ र शरदको अविजित २३ रन मद्दतमा नेपालले १८३ रनको लक्ष्य दुई बलअगावै ४ विकेट गुमाएर पूरा गरेको थिए। त्यही खेलबाट शरदले ‘मिस्टर फिनिसिर’को उपनाम पाएका थिए। शरदको उत्कृष्ट फिनसिङले केन्याका राकेप पटेलको शतक नै छायामा परेको थियो।
त्यसअघि सन् २०१२ मा भएको टी–२० विश्वकप क्वालिफायरमा पनि नेपालले केन्यालाई ५ विकेटले हराएको थियो। विश्व क्रिकेट लिग डिभिजन टूमा नेपाल र केन्याबीच खेल भएको थियो। उक्त खेल नेपालले ३ विकेटले जितेको थियो।
सामान्य खेल, अपेक्षा धेरै
सन् २०१४ मा हङकङविरुद्धको पहिलो टी–२० आई खेलमा डेब्यू गरेका मल्लले त्यसयता ४२ खेल खेलिसकेका छन्। यसबीचमा ७७७ रन बटुलेका ज्ञानेन्द्रले १ शतक र १ अर्धशतक प्रहार गरेका छन्।
सन् २०१९ मा सिंगापुरमा आयोजना भएको आईसीसी टी–२० विश्वकप क्वालिफायरमा ५१ रन प्रहार गरेका मल्लले त्यसैवर्ष घरेलु मैदानमा आयोजना भएको १३औं दक्षिण एसियाली खेलकुद (साग)मा भुटानविरुद्ध कीर्तिमानी शतक बनाएका थिए। ५५ बल खेल्दै १०७ रन मल्लले ५ चौका र ९ छक्का प्रहार गरेका थिए।
त्यसयता मल्ल खराब प्रदर्शन र लगातार पाइरहेको अवसर सदुपयोग गर्न नसकेको भन्दै लगातार आलोचनाको शिकार भइरहेका थिए। सञ्चारमाध्यमदेखि सामाजिक सञ्जालमासमेत आलोचना हुन थालेपछि तत्कालीन प्रशिक्षक पुबुदु दासानायकेले मल्ललाई यूएईमा गत मार्च २१ मा भएको विश्वकप लिग टू अन्तर्गत घरेलु टोलीसँग खेलेको खेलयता टोलीबाट बाहिर राख्दै आएका थिए। उनको अनुपस्थितिमा नेपालले यस अवधिमा ३ आधिकारिक र २ अनौपचारिक सिरिज खेलेको थियो। यी ५ सिरिजमा ज्ञानेन्द्रलाई नै बाहिर राखेर पूर्वप्रशिक्षक पुबुदुले युवा खेलाडीको प्रयोग गरेका थिए।
मल्लको अनुपस्थितमा यू–१९ टोलीका कप्तानसमेत रहेका देव खनाललाई मैदान उतारिएको थियो। ३ नम्बरमा उत्रिएका देवले यसैवर्ष मार्च २५ मा घरेलु मैदानमा आयोजना भएको पपुवा न्यू गिनीविरुद्धको एकदिवसीय खेलबाट राष्ट्रिय टोलीमा डेब्यू गरेका थिए। त्यसयता १० एकदिवसीय खेल खेलेका देवले २ अर्धशतकसहित ५३ रन बनाइसकेका छन्।
बलिङकै भरमा नेपाल
केन्या भ्रमणमा रहेको नेपाली टोलीले बलिङमा भने उत्कृष्ट प्रदर्शन गरिरहेको छ। दुवै खेलमा टस जितेर पहिला बलिङमा उत्रिएको नेपालले केन्यालाई सस्तैमा समेटेको थियो। पहिलो खेलमा निर्धारित २० ओभरमा केन्यालाई १३० रनमा रोकेको नेपालले दोस्रो खेलमा पनि आफ्नो दबदबा कायमै राखेको थियो।
जारी प्रतियोगितामा नेपाली टोलीका कप्तानसमेत रहेका सन्दीप लामिछानेले ५ विकेट लिसकेका छन्। यता, दीपेन्द्र ४ विकेट लिँदा सोमपाल कामीले भने ३ विकेट लिएका छन्।
नेपालले पहिलो जित बलरको राम्रो प्रदर्शनले हासिल गरेको बताउँछन् कप्तान सन्दीप। ‘हामीले सोच अनुसार नै बलिङ गरेका छौं। यसले केन्यालाई दबाब राखेको छ। हामीले दुवै खेलमा सामान्य लक्ष्य पाएका थियौं, बलियो ब्याटिङ लाइनअप हुँदा पनि लक्ष्य पूरा गर्न सकेनौं।’
करण चम्किँदै
नेपाली क्रिकेट टोलीका अलराउन्डर करण केसी नेपालबाट अन्तर्राष्ट्रिय क्रिकेटमा एक सय विकेट पूरा गर्ने तेस्रो खेलाडी बनेका छन्। शुक्रबार केन्यासँगको दोस्रो टी–२० म्याचमा २ विकेट लिएसँगै करणले सय विकेट पूरा गरेका हुन्।
उनले १०१ अन्तर्राष्ट्रिय विकेट लिइसकेका छन्। ४० टी–२० आईमा उनले ५९ रन विकेट लिएका छन्। जसमा एक ह्याट्रिक पनि समावेश छ। २१ रन दिएर ५ विकेट लिनु करणको उच्च टी–२० आई बलिङ स्पेल हो। यसका साथै उनले २५ एकदिवसीयमा ४३ विकेट लिएका छन्। एकदिवसीय उनको उच्च प्रदर्शन ३३ रन दिएर ५ विकेट लिनु हो।
नेपालका लागि अन्तर्राष्ट्रिय क्रिकेटमा सबैभन्दा बढी विकेट लिने कीर्तिमान कप्तान सन्दीपको नाममा रहेको छ। उनले कूल १ सय ४७ विकेट लिइसकेका छन्। उनले टी–२० आईमा ७८ र एकदिवसीयमा ६९ विकेट लिएका छन्। यस सूचीको तेस्रो स्थानमा सोमपाल कामी छन्। उनले कूल ८० अन्तर्राष्ट्रिय विकेट लिएका छन्। उनले एकदिवसीय ४३ र टी–२० आईमा ३७ विकेट लिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
