बेरुजु फछ्र्यौट गर्न सरकार निरन्तर प्रयत्नशील छ : अर्थमन्त्री शर्मा

अर्थ समाचार

नेपाल लाइभ बुधबार, असार १५, २०७९ १७:३२

काठमाडौं– अर्थमन्त्री जनार्दन शर्माले सरकार बेरुजु फछ्र्यौट गर्न प्रयत्नशील रहेको दाबी गरेका छन्। महालेखा परीक्षकको कार्यालयको ६३ औं वार्षिक उत्सव समारोहमा सम्बोधन गर्दै मन्त्री शर्माले यस्तो दाबी गरेका हुन्।

उनले बेरुजु फछ्र्यौटलाई सरकारले उच्च प्राथमिकतामा राखेको बताए। उनले भने, ‘यस वर्षको नीति तथा कार्यक्रममासमेत बेरुजु फछ्र्यौटलाई प्राथमिकतामा राखिएको छ। सार्वजनिक आर्थिक कारोबार सञ्चालनमा पारदर्शीता र स्वच्छता कायम गर्न सरकार प्रतिबद्ध रहेको छ।’

उनले लेखा परीक्षकहरुबाट प्राप्त सुझावहरु कार्यान्वयन गर्न तथा बेरुजु फछ्र्यौट गर्न सरकारले निरन्तर प्रयत्न गरिरहेको जानकारी दिए। बेरुजु फछ्र्यौटका लागि अहिलेसम्म अपनाएका विधि र प्रकृयाका बारेमा समीक्षा गर्नुपर्ने आवश्यकता देखिएको उनको भनाइ छ।

‘बेरुजु किन बढदै गएको छ? कहाँनेर हाम्रो कमी कमजोरी भयो? भन्ने कुराको अध्ययन, अनुसन्धान गरेर निराकरण गर्नुपर्ने आवश्यकता छ’ उनले भने।

संघीयता कार्यान्वयनका लागि संघ, प्रदेश र स्थानीय तहको लेखा परीक्षण गर्नुपर्ने जिम्मेवारी पूरा गरी वित्तीय व्यवस्थापन चुस्त, दुरुस्त बनाउन पहिले झै यस वर्ष पनि महालेखा परीक्षकबाट सुझाव प्राप्त हुने अर्थमन्त्री शर्माले बताए।

मन्त्री शर्माले सविधान र प्रचलित कानुनअनुसार सुशासन कायम गर्न उल्लेखनीय कार्य गरेको भन्दै उनले महालेखा परीक्षक र मातहतका कर्मचारीको प्रशंसा गरेका छन्।

‘सार्वजनिक खर्च तथा स्रोतको दुरुपयोग, राजस्वतर्फ भएका चुहावट, हिनामिना, न्यून बिजकीकरण, अनौपचारिक क्षेत्रबाट अर्थतन्त्रमा परेको नकारात्मक असर, सार्वजनिक तथा संगठित संस्था संचालनका विषयहरुमा भने थप ध्यान दिनुपर्ने देखेको छु’, उनले भने।

अर्थमन्त्री शर्माले वर्तमान अर्थतन्त्रका बारेमा महालेखा परीक्षकको कार्यालयबाट अध्ययन र विश्लेषण भई सुझाव पाउने अपेक्षा व्यक्त गरेका छन्। ‘एकातिर अर्थतन्त्रको आकार दिन प्रतिदिन फराकिलो बन्दै गएको छ भने अर्कोतर्फ आर्थिक परिसूचकहरुमा उचार चढाव आइरहेको छ। यसो हुँदा अर्थतन्त्रका समग्र पक्षमा गहन अध्ययन, विश्लेषण र मूल्यांकन गर्नुपर्ने आवश्यकता देखेको छु,’ उनले भने, ‘यसमा महालेखा परीक्षकको कार्यालयका तर्फबाट सशक्त अध्ययन, विश्लेषण भई सुधारका लागि सुझाव पेस हुने अपेक्षा गरेको छु।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

हमासले आज थप चार शव इजरायललाई हस्तान्तरण गर्ने

राज्यले तराई-मधेशका उत्पीडित वर्गलाई विभेद गर्दै आएको छ : अध्यक्ष प्रचण्ड

ताप्लेजुङको आलोचुङगालामा बुनेको गलैँचाको माग उच्च