काठमाडौं–सुन तस्करले नयाँ–नयाँ तरिका अपनाएर तस्करीको धन्दा सञ्चालन गर्ने गरेको रहस्य खुलेको छ। काठमाडौं उपत्यका अपराध अनुसन्धान कार्यालयले सुन तस्करीको आरोपमा जेठ २१ गते सात जनालाई पक्राउ गरेसँगै तस्करीको नयाँ तरिका बाहिरिएको हो।
सुन तस्करीमा संलग्न भएको आरोपमा प्रहरीले ७ जनालाई पक्राउ गरेर सार्वजनिक गरेको छ। एक भारतीय, एक चिनियाँ र ५ नेपाली गरी सात जनालाई पक्राउ गरी प्रहरीले सार्वजनिक गरेको हो।
पक्राउ पर्नेहरुमा रुपन्देहीको सैनामैना नगरपालिका–१ बनकट्टाका ४२ वर्षीय सुरेशबहादुर शाही, कपिलवस्तुको बाणगंगा नगरपालिका–८ बोडेगाउँका २९ वर्षीय सन्दीप चन्द ठकुरी, बाराको जितपुर सिमरा उपमहानरपालिका–१६ कि २२ वर्षीया निर्मला घलान, धनुषाको बडेश्वर गाउँपालिका–४ घर का ४१ वर्षीय बरुनभक्त माथेमा, चीनको तिब्बत छेन्दु घर भइ काठमाडौंको बौद्ध बस्ने २७ वर्षीय लोब्सान ग्याल्सेन, नवलपरासीको सुनवल नगरपालिका–१० घर भएका ४२ वर्षीय युवराज भुषाल र भारतको नयाँदिल्ली घर भइ ललितपुरको बागडोल बस्ने ५१ वर्षीय अमन राजपुत छन्।
यसरी भयो तस्करी
जेठ २१ गते दुबईबाट नेपाल एअरलाइन्सको फ्लाइट आरए२३० बाट सुरेशबहादुर शाही र सन्दीप चन्द ठकुरी त्रिभुवन अन्तर्राष्ट्रिय विमानस्थल काठमाडौं उत्रिए। उनीहरुले सुन लिएर आउँदै गरेको भन्ने 'सूचना' पाएपछि काठमाडौं उपत्यका अपराध अनुसन्धानको टोलीले निगरानी बढाएको थियो।
उनीहरुलाई दुबईमा भीम लाहुर भनेर चिनिने व्यक्तिले विमानस्थलमा कपडा लगाउन लगाइ नेपाल पुगेपछि निर्मला घलानलाई उक्त कपडाहरु दिनु भनेका थिए।
सुरेशबहादुर शाहीले शरीरमा एउटा सर्ट र एउटा पाइन्ट तथा सन्दीपले एउटा अन्डरवयेर, एउटा भेस्ट, एउटा सर्ट र एउटा पाइन्ट लगाएका थिए।
उनीहरुले लगाएको कपडाहरुको वजन असाधारण पाइएपछि कपडा खोल्न लगाएर हेर्दा भित्र सुनको लेपन लगाएर सुन तस्करी गरेको खुलेको थियो।
दुबईबाट काठमाडौं आएका सुरेशबहादुर र सन्दीपबाट सुन लेपन गरिएको कपडा लिन निर्मला विमानस्थल पुगेकी थिइन्। प्रहरीले विमानस्थलको सवारी पार्किङ क्षेत्रबाट निर्मलालाई पक्राउ गर्यो।
अपराध अनुसन्धान कार्यालयका प्रमुख प्रहरी वरिष्ठ उपरीक्षक (एसएसपी) वसन्तबहादुर कुँवरका अनुसार दुबईबाट सन्देश तामाङ नाम गरेका व्यक्तिले निर्मलालाई म्यासेन्जरमा सम्पर्क गरी आवश्यक निर्देशन दिँदै ती कपडाहरु लिन लगाएका थिए।
उक्त निर्देशनअनुसार कपडाहरुलाई दुई भाग लगाएर झोलामा राखेर दुई वटा प्याकेज बनाउने र कपडा लिएर आउने सुरेश र सन्दीपलाई खाना खुवाएर दुई/दुई हजार रुपैयाँ दिन भन्दै दुबईबाट सन्देशले निर्मलालाई निर्देशन दिएका थिए।
तस्करको कोड पाँच रुपैयाँको नोट!
प्रहरी अनुसन्धानबाट खुलेअनुसार निर्मला घेलानको जिम्मेवारी विमानस्थलमा कपडा रिसिभ गर्ने थियो। दुबईबाट आएका सुरेशबहादुर सन्दीपबाट कपडा बुझेर निर्मलाले अर्का एक व्यक्तिलाई ती कपडा दिनुपर्ने 'जिम्मेवारी' तोकिएको थियो।
त्यसका लागि केही कोडसहितको हुलिया सन्देशले दुबईबाट निर्मलालाई बताउँछन्। उनले म्यासेन्जरमै भनेका हुनछन्, ‘पहिला एउटा व्यक्ति आउँछ । उसले ण/४७०१७६२१ नम्बरको पाँच रुपैयाँको नोट देखाउँछ । उसलाई एउटा प्याकेज दिएर पठाउनु। ‘त्यसपछि अर्को मान्छे आउँछ। उसले थ/९४१५७५१० नम्बरको पाँच रुपैयाँको नोट देखाउँछ। त्यसलाई अर्को प्याकेज दिनु।’
तर, सामान रिसिभ गर्नुभन्दा पहिला नै प्रहरीले सुन ल्याउने र रिसिभ गर्ने निर्मलासहित तीनै जनालाई पक्राउ गरिसकेको हुन्छ। उता पाँच रुपैयाँको नोट कोड लिएर सुनको लेपन लगाएका कपडा लिन बसेका हुन्छन् चिनियाँ नागरिक लोब्साङ र नेपाली नागरिक बरुणभक्त माथेमा।
उनीहरुले निर्मलालाई फोन सम्पर्क गरेर लोकेशन माग गर्छन्। उता प्रहरीको नियन्त्रणमा रहेकी निर्मलाले प्रहरीले सिकाएअनुसार नै लोकेसन दिन्छिन्।
सोही अनुसार पाँच रुपैयाँको ण/४७०१७६२१ नम्बरको नोट बोकेर लोब्साङ र पाँच रुपैयाँकै थ/९४१५७५१० नम्बरको नोट बोकेर सुनको लेपन लगाएको कपडा लिन बौद्ध पुगेका दुबै जनालाई प्रहरीले पक्राउ गर्छ। उनीहरुबाट उक्त नम्बरका पाँच रुपैयाँको नोट समेत बरामद हुन्छ।
अनि पक्राउ पर्छन् युवराज र अमन
बरुण पक्राउ परेसँगै उनलाई निर्देशन दिने व्यक्तिको पहिचान प्रहरीले गर्यो। उनलाई युवराजले निर्देशन दिएर नोट लिएर कपडा लिन पठाएको खुल्यो। बरुणले उक्त सामान रिसिभ गरेपछि पुनः अमन राजपुत आएर सामान रिसिभ गर्ने योजना बनाएको प्रहरी अनुसन्धनबाट खुलेको छ।
राजपुतले थ/७४९३८०३६ नम्बरको पाँच रुपैयाँको नोट देखाएपछि बरुणले त्यो सामान अमनलाई दिनुपर्ने भन्दै युवराजलाई निर्देशन दिएको प्रहरी समक्ष बताए। त्यसपछि अमनलाई कपडा लिन बोलाएर बानेश्वरस्थित सिभिल अस्पताल अगाडिबाट थ/७४९३८०३६ नम्बरको पाँच रुपैयाँको नोटसहित पक्राउ गरिएको अपराध अनुसन्धान कार्यालयका एसपी तथा प्रवक्ता कृष्ण कोइरालाले जानकारी दिए।
उनी पक्राउ परेपछि उनीहरुलाई निर्देशन दिने भुषाललाई माछापोखरीबाट पक्राउ गरिएको प्रहरीले जानकारी दिएको छ। जेठ २१ गते नै साँझ साढे ६ बजे दुबईबाट सन्देशले बरुणलाई फोन गरी अब सबै फोनहरु अफ गर्नु समेत भनेर निर्देशन दिएका थिए।
उता लोब्साङबाट सामान रिसिभ गरी पठाउनु पर्ने जिम्मेवारी पाएका ठिन्ले लामा भन्ने व्यक्ति भने फरार भएका छन्। दुबईबाट यसरी कपडामा लेपन लगाएर ल्याइएको सुनको तौल ८८६ ग्राम रहेको पाइएको छ। उक्त सुन नेपालको बाटो हुँदै भारत तस्करी गर्न लागिएको प्रहरी अनुसन्धानबाट खुलेको छ।
पक्राउ परेका सातै जनालाई सुनसहित थप अनुसन्धान तथा कारबाहीका लागि विमानस्थल भन्सार कार्यालय पठाउन लागिएको अपराध अनुसन्धान कार्यालयले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752138127.png)
-1752137143.jpg)
-1752043710.jpg)
-1749826086.png)
