काठमाडौं– काठमाडौंको लैनचौरमा प्रहरीले नै ३५ लाख रुपैयाँ लुटेको खुलेको छ। प्रहरी समेतको मिलेमतोमा करिब दुई साताअघि ३५ लाख रुपैयाँ लुटिएको हो।
करिब दुई साता अघि एउटा समूहले सुन व्यापारीलाई आफूसँग एक किलो सुन भएको बताएको थियो। उक्त सुन सस्तो मूल्यमा बिक्री गर्न आफूहरु तयार रहेको बताएका थिए। सुन ३५ लाख रुपैयाँ बेच्ने ‘डिल’ भयो।
बजार भाउभन्दा निकै सस्तो मूल्यमा सुन पाउने भएपछि ती व्यापारी पनि लोभिए। उनले सुन किन्नका लागि पैसा जुटाए। सुन बेच्ने गिरोहले लोकेशन दियो–लैनचौरको ब्याडमिन्टन कोर्ट। झोलामा ३५ लाख रुपैयाँको बिटो बोकेर ती व्यापारी सुन किन्न लैनचौर पुगेका थिए।
डिल भएअनुसार ३५ लाख रुपैयाँ लिने र सुन दिने तयारी भइरहेका बेला व्यापारीको ३५ लाख लुटेर सुन बेच्न लागेको भन्ने समूह फरार भएको थियो।
नक्कली सुनको फोटोहरु लगायत देखाएर प्रलोभनमा पारेर उनीहरुले ३५ लाख रुपैयाँ लुटेर फरार भएको पाइएको छ। यसरी ३५ लाख रुपैयाँ लुटेर फरार भएको घटनामा प्रहरी कर्मचारी नै संलग्न रहेको तथ्य समेत खुलेको छ।
उक्त घटनालाई प्रहरीले गुपचुमा राखेर अनुसन्धान गरिरहेको छ। यसबारे जिल्ला प्रहरी परिसर काठमाडौंले अनुसन्धान गरिरहेको छ। तर, घटनामा संलग्न भएकामध्ये केही व्यक्ति पक्राउ परे पनि प्रहरी कर्मचारी भने अझै फरार रहेका पाइएको छ।
उक्त घटनाका विषयमा अनुसन्धान भइरहेको र लुटपाटमा संलग्न सबै जना पक्राउ परेपछि घटना सार्वजनिक गरिने परिसरका प्रमुख प्रहरी वरिष्ठ उपरीक्षक (एसएसपी) सुदिप गिरीले बताए। ‘घटनाका बारेमा हामीले अनुसन्धान गरिरहेका छौं। केहीलाई पक्राउ गरिसकेका छौं। केही फरार छन्। उनीहरुलाई पनि पक्राउ गरेपछि सार्वजनिक गर्छौं,’ एसएसपी गिरीले भने।
मोबाइल छाडेर भागेपछि खुल्यो प्रहरीको संलग्नता
सुन खरिद गर्ने व्यापारीसँग डिल भएपछि पैसा लिन भन्दै ३/४ जना लैनचौर पुगेका थिए। लैनचौर पुगेर उनीहरु व्यापारीको पैसा लिएर त्यहाँबाट भागे। भाग्ने क्रममा १ जनाको मोबाइल घटनास्थलमै खसेको थियो।
पैसा लुट्ने व्यक्ति भाग्ने क्रममा खसेको मोबाइल टिपेर व्यापारी प्रहरीकहाँ गएर घटनाबारे बताएका थिए। ३५ लाख लुटिएको भन्दै मोबाइलसहित जाहेरी दिएपछि प्रहरीले अनुसन्धान सुरु गरेको थियो।
सो क्रममा उक्त मोबाइल प्रहरीकै एक सिपाहीको भएको खुलेको स्रोतले नेपाल लाइभलाई जानकारी दियो। ‘मोबाइल नखसेको भए लुटेरा अहिलेसम्म पहिचान नलाग्न पनि नसक्थ्यो। तर मोबाइलले गर्दा लुटेरोको पहिचान भइसकेको छ। उनी प्रहरी नै भएको खुलेको छ,’ स्रोतले नेपाल लाइभसँग भन्यो।
स्रोतका अनुसार मोबाइल नै छाडेर भाग्ने ती व्यक्ति नेपाल प्रहरीको संगीत विद्यालय सामाखुसीमा कार्यरत सिपाही भएको खुलेको छ। उक्त घटनापश्चात अहिलेसम्म उनी फरार छन्। उनको खोजी भइरहे पनि प्रहरीले पक्राउ गर्न सकेको छैन। स्रोतका अनुसार उक्त घटनामा संलग्न अर्का एक व्यक्ति पनि प्रहरी भएको खुलेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
