काठमाडौं– बलात्कार आरोपमा पक्राउ परेका ग्लोबल भिसाज कन्सल्टेन्सीका सञ्चालक मनोज पाण्डेले इन्कारी बयान दिएका छन्। जिल्ला प्रहरी परिसर काठमाडौंको हिरासतमा रहेका पाण्डेले प्रहरीसँगको बयानमा आफूमाथि लागेको आरोप झुटो रहेको दाबी गर्दै आएका छन्।
सुन्दरी प्रतियोगिताकी एक प्रतिस्पर्धी किशोरीले ८ वर्ष अगाडि आफूमाथि बलात्कार भएको घटनाविवरण सार्वजनिक गरेपछि प्रहरीले जेठ ७ गते पाण्डेलाई काठमाडौंको स्वयम्भूबाट पक्राउ गरेको थियो। काठमाडौं उपत्यका अपराध अनुसन्धान कार्यालयले पक्राउ गरेका पाण्डेमाथि अहिले जिल्ला प्रहरी परिसर काठमाडौंले अनुसन्धान गरिरहेको छ।
पहिलो पटकका लागि ५ दिन र दोस्रो पटकका लागि ७ दिन गरी १२ दिनको म्याद लिएर परिसरले पाण्डेमाथि अनुसन्धान गरिरहेको छ। अनुसन्धानको क्रममा पाण्डेले आफूमाथि लागेको आरोप षड्यन्त्र मात्रै भएको दाबी गर्दै इन्कारी बयान दिएको परिसरका एक प्रहरी अधिकारीले नेपाल लाइभलाई जानकारी दिए।
जेठ ४ गते सामाजिक सञ्जाल टिकटकमार्फत एक किशोरीले सौन्दर्य प्रतियोगिताको आयोजना गरी पाण्डेले आफूमाथि ६ महिनासम्म बलात्कार गरेको भन्दै भिडियो सार्वजनिक गरेकी थिइन्। किशोरीले २० वटा भिडियोमार्फत् ८ वर्षअघि सौन्दर्य प्रतियोगिता आयोजना गर्दा पाण्डेले आफूमाथि बलात्कार गरेको बताएकी थिइन्।
भिडियो सार्वजनिक भएपछि उक्त विषयले सडकदेखि संसदसम्म प्रवेश पाएको थियो। आरोपी पाण्डेलाई पक्राउ गरेर कानुनी दायरामा ल्याउन दबाब सिर्जना भएको थियो। जेठ ७ गते प्रहरीले पाण्डेलाई स्वयम्भूबाट पक्राउ गरेको थियो।
बलात्कारको कसुरमा अनुसन्धान गरेर मुद्दा चलाउने हदम्याद सकिएकाले प्रहरीले पाण्डेमाथि मानव बेचबिखन तथा ओसारपसारको कसुरअन्तर्गत अनुसन्धान गरिरहेको छ। उक्त घटनामा आसोरपसारको कसुर आकर्षित हुने प्रहरीले जनाएको छ।
मानव बेचबिखन तथा ओसारपसारको कसुरमा अनुसन्धान गरिरहेको प्रहरीलाई पाण्डेले भने आफूमाथि सबै आरोप निराधार रहेको र आफूलाई फसाउने उद्देश्यले यो कुरालाई उछालिएको बयान दिएका छन्।
‘अब कसरी अगाडि बढ्ने भनेर म वकिलसँग परामर्शको तयारीमा थिए। त्यतिबेलै मलाई पक्राउ गरिएको हो। आरोप लगाएजस्तो बन्धक बनाएर बलात्कार गरेको छैन,’ पाण्डेले आरोप इन्कार गर्दै बयानमा भनेका छन्।
सौन्दर्य प्रतियोगिता सम्पन्न भएपछि सक्सेस पार्टीको नाममा एभरेस्ट होटलमा कार्यक्रम गरिएको र उक्त होटलमा आफूमाथि बलात्कार भएको किशोरीको भनाइ छ। उक्त विषयको बारेमा पूर्व मिस नेपाल माल्भिका सुब्बालाई समेत जानकारी गराएकोमा सुब्बाले सहयोग नगरेको किशोरीले बताएकी छन्।
प्रहरीले सुब्बासँग पनि बयान लिइसकेको छ। सुब्बा उक्त कार्यक्रको कोरियोग्राफर थिइन्। घटनाबारे पीडितले आफूलाई फोनमा जानकारी गराएको र आफैं तनावमा भएकाले पछि कुरा गरौंला भनेको सुब्बाले प्रहरीसमक्ष बयान दिएकी छन्।
प्रतियोगीसहित अन्यको बयान लिने तयारी
किशोरीमाथि भएको बलात्कारको घटना बारे प्रहरीले सौन्दर्य प्रतियोगिताका अन्य सहभागी र प्रतिस्पर्धीसँग पनि बयान लिने तयारी गरेको छ। एक प्रतियोगी भने बेल्जियममा रहेको भन्ने जानकारी आएपछि प्रहरीले ती प्रतियोगीसँग बयान लिन अहिले सम्भव नरहेको जनाएको छ।
बाँकी रहेका प्रतियोगीहरुको बारेमा बयान लिने काम अघि बढाइने परिसरले बताएको छ। त्यसैगरी यो घटनामा साक्षी हुनसक्ने अन्य व्यक्तिमाथि पनि बयान लिइने प्रहरीले जनाएको छ। प्रहरी स्रोतका अनुसार यो घटनामा अर्का एक पुरुषको पनि बयान लिइएको छ। तर, प्रहरीले ती व्यक्तिको नाम भने खुलाएको छैन।
घटनाबारे परिसरका प्रवक्ता तथा एसपी दिनेशराज मैनालीले भन्छन्, ‘अनुसन्धान भइरहेको छ। अरुभन्दा यो केस अली गम्भीर नै छ। सक्दो प्रमाण जुटाएर प्रहरीले फाइल पेस गर्छ।’
पाण्डेलाई आरोप गलत सावित गर्न चुनौती !
मानव बेचबिखन तथा ओसारपसार (नियन्त्रण) ऐन, २०६४ ले मानव बेचबिखन तथा ओसारपसारको कसुरमा आरोपीतलाई नै आरोप गलत सावित गर्नुपर्ने चुनौती दिएको छ। पीडित पक्षले लगाएको आरोपमा थप अनुसन्धान तथा प्रमाण जुटाएर प्रहरीले सरकारी वलिकमार्फत् अदालतमा मुद्दा पेस गर्छ।
यस्तो कसुरमा जति प्रमाण जुटाएर प्रहरीले आरोपितलाई अदालतमा पेस गर्छ त्योभन्दा बलियो प्रमाण जुटाएर आफू निर्दोष रहेको दलिल पेस गर्ने भार आरोपितलाई हुन्छ।
आफूलाई लागेको आरोप सही होइन भनेर आरोपितले दिएको इन्कारी बयान मात्रै मान्य नहुने ऐनमा व्यवस्था गरिएको छ। ऐनको दफा ९ मा भनिएको कुनै व्यक्तिलाई ऐनअन्तर्गतको कसुर गरेको अभियोग लागेमा सो कसुर आफूले गरेको छैन भन्ने कुराको प्रमाण स्वयं व्यक्ति (आरोपी)ले नै पुर्याउनुपर्ने व्यवस्था गरिएको छ।
मानव बेचबिखन तथा ओसारपसारको अन्तर्गको कसुरमा ठूलो 'र्याकेट' हुनसक्ने र एकले अर्कोलाई नचिन्ने तथा एकले अर्को व्यक्तिको भूमिका थाहा नपाउने हुँदा प्रहरी अनुसन्धानबाट मात्रै कसुरको प्रमाण जुटाउन नसकिने देखिएकोले प्रमाणको भार आरोपितमा राखिएको कानुनका जानकाहरु बताउँछन्। त्यसकारण यो कसुरमा पनि पाण्डेले आफूमाथि लागेका आरोपमा एक–एक प्रमाणसहित खण्डन गरी पुष्टि गर्नुपर्ने चुनौती छ।
यो कसुरअन्तर्गत किन्ने, बेच्न वा वेश्यावृतमा लगाउने उदेश्यले नेपाल भित्रै एक ठाउँबाट अर्को ठाउँमा लगेको अवस्थामा १० वर्षसम्म कैद हुनसक्ने व्यवस्था छ।
बाल यौन दुरुपयोगमा पनि अनुसन्धान
पाण्डेबाट आफू पनि पीडित भएको भन्दै अर्की एक किशोरी पनि प्रहरीको सम्पर्कमा पुगेकी थिइन्। ती किशोरीको पनि जाहेरी लिएर प्रहरीले पाण्डेमाथि अनुसन्धान अघि बढाएको छ।
किशोरीले पाण्डेविरुद्ध बाल यौन दुरुपयोगको कसुरमा जाहेरी दिएकी थिइन्। अहिले दुबै मुद्दाको छुट्टा–छुट्टै फाइल बनाएर परिसरले अनुसन्धान अघि बढाइरहेको छ। ‘यो केसमा हिरासतको म्याद एउटै हुन्छ। फाइल भने फरक–फरक मुद्दाको फरक–फकर बनाएर पेस हुन्छ। अहिले दुबै केसलाई हामीले एकैपटक अनुसन्धान गरेर अघि बढाइरहेका छौं,’ परिसरका एक अनुसन्धान अधिकृतले नेपाल लाइभसँग भने।
पाण्डे पक्राउ परेपछि आफू पनि पीडित भएको भन्दै तेस्रो महिला पनि प्रहरीकोमा पुगेकी थिइन्। तर उनले भने जाहेरी नदिएको पाइएको छ। ‘हामीले जाहेरी दिनुस्, अनुसन्धान अघि बढ्छ भनेर काउन्सिल पनि गर्यौं। तर, उहाँले जाहेरी दिन मान्नु भएन। अहिले दुईटा मात्रै मुद्दाको अनुसन्धान भइरहेको छ,’ परिसरका एक अधिकारीले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
