काठमाडौं- कोरोना महामारीको समयमा ज्वरो नाप्ने थर्मल गन कालोबजारी गरेको आरोपमा रंगेहात पक्राउ गरेर मुद्दा चलाइएका जगदम्बा ग्रुपका अध्यक्ष सुलभ अग्रवाल सफाइ पाउनका लागि चलखेलमा लागेका छन्।
सुलभको कालोबजारी सम्बन्धी मुद्दा सोमबार पेसी चढ्दै छ। जिल्ला अदालत काठमाडौंमा विचाराधीन उक्त मुद्दामा जसरी पनि सफाइ लिने पक्षमा उनले लबिङ गरिरहेको काठमाडौं जिल्ला अदालत उच्चस्रोतले जनाएको छ।
सोमबार मुद्दाको पेसी गोलाप्रथाद्वारा तोकिने र उक्त गोलाबाट आफू अनुकुल न्यायाधीशको इजलासमा पेसी परेमा फैसला गराउने पक्षमा सुलभका केही 'विचौलिया'हरु लागेका छन्। उनले भट्ट थरका एक विचौलियामार्फत् अदालतमा चलखेल गरेको सूचना जिल्ला सरकारी वकिलको कार्यालय काठमाडौंसम्म पुगेको छ।
उक्त मुद्दा ठूलै व्यापारीको भएको र भट्ट थरका ती व्यक्तिले 'न्यायाधीश मिलाउने' भन्दै हिँडेको सूचना आफूहरुले थाहा पाएको जिल्ला सरकारी विकिल कार्यालय उच्च स्रोतले बतायो। सरकारी पक्षले उक्त सूचना पाएलगत्तै न्यायाधीशको इजलास हेरेर स्थगितको निवेदन दिने तयारी गरेको जनाइएको छ।
जिल्ला सरकारी वकिल कार्यालय काठमाडौंका प्रमुख गंगाप्रसाद पौडेलले सोमबार पेसी रहेको र मुद्दा हेर्ने सरकारी वकिल तोकिएको बताए। ‘पेसी सूची प्रकाशन भएपछि मुद्दा कसरी अगाडि बढ्ला भन्ने थाहा होला,' उनले भने, 'कुन न्यायाधीशको इजलासमा पेसी पर्छ र कति जना सरकारी वकिलले बहस गर्ने भन्नेमा हामी छलफलमै छौं।'
अग्रवालले चीनको गोन्जाउबाट २०७७ चैत २१ गते थर्मल गन ल्याएका थिए। अग्रवालको कम्पनीले चीनबाट सेटिङमा आफ्नो मात्रै सामान ल्याएको थियो। सेटिङमा आफ्नो कम्पनीको मात्रै मेडिकल उपकरण तथा औषधि ल्याउँदै सामान कालोबजारीमा बिक्री गरिरहेको थियो।
शंकर ग्रुपले कालोबजारीमा सामान बिक्री गर्नकै लागि अन्य व्यवसायीको सामान नेपाल एयरलाइन्सको चार्टर उडानबाट ल्याउन दिएको थिएन। अग्रवाल कालोबजारीका सामान बिक्री गर्ने क्रममै पक्राउ परेका थिए।
उनलाई प्रहरीले आफैं ग्राहक बनेर महंगोमा थर्मल गन किन्ने बहना बनाउँदै पक्राउ गरेको थियो। उनका साथबाट प्रहरीले ६७ थान थर्मल गन बरामत गरेको थियो।
प्रहरीले त्यसपछि अग्रवालको घर र अफिसमा समेत छापा मारेको थियो। तर, थप थर्मल गन फेला पार्न सकेको थिएन। पछि अनुसन्धानका क्रममा उनले उक्त गनहरू महंगो मूल्यमा बिक्री गरेको अभियोगपत्रमा दाबी गरिएको छ।
अग्रवालले २०७६ चैत २१ गते नेपाल एयरलाइन्सको वाइडबडी जहाजमा १२ सय थर्मल गन ल्याएका थिए। अग्रवालको कम्पनीले उक्त गन चीनमा २० डलरमा खरिद गरेको थियो। उक्त कुरा उनले बयानमा स्वीकार गरेका छन्।
उनले सामान खरिद गरको समयमा डलरको भाउ १२१ रुपैयाँ थियो। सोही दरअनुसार अग्रवालको कम्पनीले थर्मल गन २ हजार ४२० रुपैयाँमा खरिद गरेको देखिएको छ। नेपाल लाइभले यअसघि उनले सेटिङमा कसरी सफाइ पाउने चलखेल गरे भन्ने खुलासा गरेका थियो।
यसअघि २०७८ चैत १ गते पनि उनले उक्त मुद्दामा सफाइ पाउने चलखेल गरेका थिए। उनले चाहे अनुसार विवादित न्यायाधीश अम्बिकाप्रसाद निरौलाको इजलासमा पेसी परेको थियो। तर, सरकारी पक्षले स्थगितको निवेदन दिएपछि उक्त इजलासले फैसला गर्न पाएन।
अब हुने पेसी अग्रवालका लागि सहज नभएको जिल्ला सरकारी वकिलको निष्कर्ष छ। पछिल्लो समय विवादमा परेका न्यायाधीशहरुलाई न्याय परिषद्ले धमाधम अनुसन्धानमा तानिरहेकाले कालोबजारीमा थर्मल गनसहित पक्राउ परेका अग्रवाललाई सफाइ दिन सहज नभएको सरकारी वकिलको भनाइ छ।
जिल्ला अदालतमा रहेका न्यायाधीशमध्ये कुनै शंकास्पद न्यायाधीशमा गोलाबाट पेसी परे स्थगित गर्ने तयारी भएको र विश्वासयोग्य न्यायाधीशको पेसीमा परे सशक्त रुपमा बहस गर्ने सरकारी वकिलको तयारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
