काठमाडौं– शुक्रबारबाट प्रदर्शनमा आएको फिल्म ‘कबड्डी ४: द फाइनल म्याच’ सिनेमा हलमा हाउसफुल भइरहेको छ। फिल्मले पहिलो दिनमै ३ करोड रुपैयाँको व्यापार गर्दै हालसम्मकै सबैभन्दा बम्पर ओपनिङ गर्ने नेपाली फिल्म पनि बनेको छ।
तर, फिल्म बक्सअफिसमा हाउसफुल र दर्शकमाझमा चर्चा भइरहँदा फिल्मको निर्माण पक्ष भने तनावमा परेको छ। यो तनावको कारण हो टिकटकमा छताछुल्ल भएको क्लिपहरु। टिकटकमा फिल्म हलबाट आधा घण्टासम्म लाइभमार्फत फिल्म देखाइएको भेटिएको छ।
फिल्म हेर्न पुगेका दर्शकहरुले शुक्रबारबाट सामाजिक सञ्जालअन्तर्गतको भडियो सेयरिङ प्लेटफर्म टिकटकमा फिल्मका क्लिपहरु राखेका छन्। फिल्मका विभिन्न भागका क्लिपहरु टिकटकमा फिल्म हेर्न पुगेका दर्शकहरुले राखेका छन्। यसले फिल्म हेर्न नगएका दर्शकमाझमा फिल्मको कथा छताछुल्ल बनाउनेदेखि पुरै फिल्मले ससाना क्लिपहरुमार्फत सामाजिक सञ्जालमा सार्वजनिक हुने हो कि भन्ने डर पनि निर्माण पक्षले भोगिरहेको छ। यसमा निर्माण पक्ष र फिल्मका कलाकारले आपत्ती पनि जनाएको छ।
टिकटकमा देखिएका कबड्डी–४ का क्लिपहरु
अभिनेता दयाहाङ राईले टिकटकमा आफू अभिनित फिल्मको क्लिपहरु गैरकानुनी रुपमा सार्वजनिक र प्रचार भइरहेकोमा आपत्ती जनाउँदै सामाजिक सञ्जालमार्फत दर्शकलाई फिल्मको क्लिप नखिच्न आग्रह गरेका छन्।
‘तपाईं सम्पूर्ण दर्शकहरुप्रति हामी आभारी छौं यति धेरै साथ र मायाको लागी,’ दयाहाङले लेखेका छन्, ‘तर, यसरी तपाईंहरूले सिनेमा हेरिरहँदा मोबाइल निकालेर भिडियो बनाउँदा तपाईंलाई पनि बाधा हुन सक्छ। झनै तपाईंको नजिकको साथीलाई धेरै बाधा भइरहेको हुन्छ र हामीलाई पनि। त्यसैले सबैजना बिना बाधा सिनेमा हेर्नुहोस्, आनन्द लिनुहोस्।’
फिल्मका निर्देशक राम बाबु गुरुङले हल सञ्चालकको कमजोरीका कारण फिल्मका क्लिपहरु पाइरेसी भइरहेको बताएका छन्। उनले हलमा दर्शक बस्दा फिल्म हेरेको मात्रै छ वा हलमा मोबाइलबाट भिडियो पनि खिच्दै गरेको छ भन्ने कुराको नियन्त्रण गर्नुपर्ने काम हल सञ्चालकको भएको बताउँदै त्यसमा कमजोरी भएकाले फिल्मका क्लिपहरु भाइरल हुने अवस्था निर्माण भएको बताएका छन्।
फिल्मको निर्माण पक्षमा नेपाल चलचित्र संघले पनि विज्ञप्ति जारी गर्दै फिल्म प्रदर्शन गर्नेहरूलाई हलभित्र मोबाइल वा क्यामेराले दृश्यहरू कैद गरिएको छ वा छैन भन्ने विषयमा ध्यान दिन आग्रह गरेको छ।
शुक्रबार साँझ संघले विज्ञप्ति जारी गर्दै भनेको छ, ‘चलचित्र प्रदर्शन भइरहेको अवस्थामा क्यामेरा, मोबाइलबाट चलचित्रका केही दृश्यहरू कैद गरी युटुब, फेसबुक आदि सञ्चारमाध्यमहरुबाट सार्वजनिक भएको भन्ने निर्माता पक्षले जानकारी गराएको हुनाले यस सम्बन्धमा यस संघको गम्भीर ध्यानाकर्षण भएको छ।’
संघले यस्तो गर्न नदिन हल सञ्चालकलाई र दर्शकलाई यस्तो नगर्न पनि आग्रह गरेको छ। फिल्मको क्लिपहरू पाइरेसी भइरहेको विषयमा चलचित्र क्षेत्रका अन्य कलाकारले पनि आवाज उठाइरहेका छन्।
अभिनेता निश्चल बस्नेतले फिल्मकै पक्षमा आवाज उठाएका छन्। उनले सामाजिक सञ्जालमा लेखेका छन्, ‘चलचित्रलार्इ माया गर्नु भनेको मनपरेको चलचित्र हेर्न टिकट काटेर हलसम्म पुगेर मस्त मजा लिनु हो। टिकटकमा क्लिप बनाउँदै हाल्नुभयो भने अरु हेर्न पर्खिरहेका दर्शकको मजा खराब गर्नु हो र कबड्डीका निर्मातालाई घाटा तिर धकेल्नु हो। यति त बुझिदिनुपर्यो दर्शकहरूले। कसैले खिचेको देखे त्यसो नगर्न भनिदिन हुन अनुरोध। हल संचालकहरले पनि याद गर्नुपर्यो हजुर !!! सुरुमा लेखेको डिस्क्लेमरले मात्र पुगेन।’
शुक्रबारबाट प्रदर्शनमा आएको ‘कबड्डी–४ः द फाइनल म्याच’ राम बाबु गुरुङको निर्देशनमा निर्माण भइरहेको फिल्म श्रृंखला हो। यसअघि यो श्रृंखलाका तीन फिल्महरू निकै चर्चित भएका छन्। चौथो भागअन्तर्गत बनेको फिल्ममा भने अभिनेता दयाहाङ राई, सौगात मल्ल, मिरुना मगर, विजय बराल, बुद्धि तामाङलगायतका कलाकारहरू रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771851152.png)
-1764146706.png)
