काठमाडौं- वर्षाका कारण भिजेको आउटफिल्ड, पहिलोपल्ट टेस्ट राष्ट्रसँग फाइनल सरहको खेल खेल्नुको तनाव, अनि पाएको विशाल लक्ष्य। सबैखाले चर्को दबाबबीच भ्रमणकारी जिम्बावे ‘ए’लाई तीन एकदिवसीय अभ्यास खेलको अन्तिम दिन घरेलु टोली नेपालले ६ विकेटले पराजित गर्यो। र, सिरिज २–१ ले आफ्नो पोल्टामा पार्न सफल भयो।
सोमबारको खेल कुनै ‘ड्राम’भन्दा रोचक थिएन। यही खेलमा सिनियर टोलीमा पहिलोपल्ट डेब्यू गरेका दायाँहाते मध्यम तीव्र गतिका बलर किशोर महतोले ५ विकेट लिए। ओपनर कुशल भुर्तेलले पनि उनलाई साथ दिँदै सुनमा सुगन्ध थप्ने काम गरे।
महत्त्वपूर्ण खेलमा चुक्ने गरेको नेपालका लागि यी दुई खेलाडीको प्रदर्शन सानदार थियो। यीनिहरुले आफ्नो स्तरअनुसारको प्रदर्शन नगर्दिएको भए नेपाललाई घरेलु मैदानमा लाज छोप्ने कुनै बाहना मिल्ने थिएन।
किशोरको सानदार प्रदर्शन
कीर्तिपुरस्थित टीयू क्रिकेट मैदानमा टस हारेर पहिला ब्याटिङको निम्तो पाएको जिम्बावेले तादिवानाशे मारुमनीको सानदार अर्धशतको मद्दतमा निर्धारित ३३ ओभरमा सबै विकेट गुमाएर रन २१३ बनाएको थियो।
आइतबार रातिको वर्षका कारण आउटफिल्ड भिजेपछि खेल ५० बाट ३३ ओभरमा खेल झारिएको थियो। निर्धारित समयभन्दा ३ घण्टा ढिला सुरु भएको खेलमा किशोरले महत्त्वपूर्ण ५ विकेट लिए।
ब्याटिङमैत्री पिचमा उनले ७ ओभरमा ५ विकेट लिने क्रममा १ मेडनसहित ४३ रन खर्चिए। पहिलो ब्याटिङ गरेको जिम्बावेले ओपनर इनोसेन्ट कायालाई पाँचौ ओभरमा गुमाएको थियो। किशोरले पहिलो विकेट लिने क्रममा कायालाई आसिफ शेखको हातबाट १२ रनमा आउट गरेका थिए। तर, अर्का ओपनर टाडिवान्सेले मारुमानीले आक्रामक ब्याटिङ गर्दै जिम्बावेको स्कोर अघि बढाए। उनले ३१ बलमा ७ चौका र २ छक्कासहित अर्धशतक बनाएका थिए।
मारुमानीको क्याच दुईपल्ट छाडिएको थियो, तर उनी ठ्याक्कै अर्धशतकमै रोकिए। उनलाई १०औं ओभरको अन्तिम बलमा दीपेन्द्रसिंह ऐरीले रोहित पौडेलबाट क्याच गराए। त्यसपछि लगातार विकेट खसेपनि जिम्बावेको रनको गति भने रोकिएन। किशोरको बलमा आउट हुनुअघि कुद्जाई माउन्जेले ३४ बलमा ३९ रन जोडे।
सेफास झुवाओ १८ बलमा २ छक्कासहित १६ रनमा पेभेलियन फर्किए। २३औं ओभरमा किशोरको बलमा आउट हुँदा जिम्बावे १४३–५ को स्थितिमा पुगेको थियो।
कप्तान टोनी मुन्योङगाले आक्रामक ब्याटिङ गर्दै १२ बलमा २ चौका र २ छक्कासहित २४ रनको योगदान दिए। उनलाई पनि किशोरले नै कुशलबाट क्याच गराउँदै पेभेलियन पठाए। लुक जोंग्वेले अन्त्यतिर १५ बलमा १९ रन जोडेपछि जिम्बावेले २ सय रनको आँकडा पार गरेको थियो।
‘प्लेयर अफ द म्याच’ भएका किशोरले खेलपछि उनले प्रतिक्रिया दिँदै भने,‘पहिलो बलका बेला म केही आत्तिएको थिएँ, त्यसपछि केही पनि भएन। तर, मैले ५ विकेट हात पार्नेछु भनेर सोचेको थिइनँ। राम्रो खेल्छु भन्ने चाहिँ लागेको थियो।’
कुशल र दीपेन्द्रको खुलेको ब्याटिङ
ब्याटिङभन्दा बलियो बलिङ रहेको नेपाललाई यो विशाल लक्ष्य नै थियो। यसअघि ब्याटिङ नचल्दा पहिलो खेलमा १३७ रनको सामान्य लक्ष्य प्रस्तुत गरेको नेपालले जिम्बावेसँग ३ विकेटले पराजित भोगेको थियो। तर, दोस्रो खेलमा तीव्र गतिका बलरद्वय सोमपाल कामी र करण केसी कसिलो बलिङ गरेसँगै नेपालले ९ विकेटको जित हात पारेको थियो।
टेस्ट राष्ट्रसँग दुई दिन अगाडि सानदार जित हात पारेको नेपाल सिरिज रक्षा गर्ने लक्ष्यमै थियो। तर, सोमबार जिम्बावेले दिएको २१४ रनको लक्ष्य नेपालका लागि कुनै पहाडभन्दा कम भने थिएन। त्यसैले ३३ ओभरमा नेपालले यो लक्ष्य सहजै भेटाउन सक्ने पनि कल्पना गरिएको थिइएन।
तर, नेपालका लागि ओपनर ब्याट्सम्यान कुशल भुर्तेल र दीपेन्द्रसिंह ऐरीले जितको आधार खडा गरिदिए। दुई रनको स्थितिमा जीवनदान पाएका भुर्तेलले ६१ बलमा ७ चौका र ४ छक्कासहित सर्वाधिक ८४ रन बनाए। यस्तै, मध्यक्रमका ब्याटर दीपेन्द्रसिंह ऐरीले ४३ बलमा ४ चौका र ३ छक्कासहित ६० रन बनाए।
शुक्रबार भएको पहिलो खेलमा जिम्बावेसँग ३ विकेटले पराजित भएपछि मुख्य प्रशिक्षक पुबुदु दासानायकेले ब्याटिङ बलियो बनाउन भन्दै लामो समय नेपाली राष्ट्रिय टोलीमा नपरेका ओपनर सुनिल धमलालाई प्रयोगमा ल्याएका थिए। शनिबार भएको खेलमा ३८ रन बनाउँदै नेपालको जितमा महत्त्वपूर्ण योगदान गरे। उक्त खेलमा कुशलको जोडी आसिफ शेखलाई ३ नम्बरमा राखिएको थियो।
सोमबार पनि प्रशिक्षक पुबुदुले सो कार्ड प्रयोग गर्ने योजना बनाएका थिए। तर, असम्भवजस्तै लक्ष्य पाएपछि उनी पछाडि हटे र कुशल र आसिफलाई ओपनिङमै ल्याए। जुन सफल रह्यो।
आसिफले ३७ बलमा २ चौका र १ छक्कासहित २९ बनाए। उनी र कुशलबीच पहिलो विकेटको लागि ७३ रनको साझेदारी भएको थियो। सुनिल १८औं ओभरमा मात्र ६ रनमा आउट भए। त्यसको ३ ओभरपछि कुशल र रोहित पौडेल लगातार बलमा आउट हुँदा नेपाल दबाबमा परेको थियो।
रोहित क्रेन्डन मभुताको एलबीडब्लु धरापमा ‘गोल्डेन डक’आउट भए। त्यसपछि दिपेन्द्र र विनोद भण्डारीले नेपाललाई जितसम्म पुर्याए। दीपेन्द्रले ४३ बलमा ६० रन जोडे। विनोद २६ बलमा २८ रन जोड्दै नटआउट रहे। र, २ सय १४ रन पछ्याइरहेको नेपाल १७ बलको खेल बाँकी छँदै ४ विकेट गुमाएर जितसम्म पुग्यो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
