डडेलधुरा–आसन्न स्थानीय तहको निर्वाचनमा नेपाली कांग्रेसलाई सभापति तथा प्रधानमन्त्री शेरबहादुर देउवाको गृह जिल्ला डडेलधुरामा चुनौती थपिएको छ। २०७४ को निर्वाचनमा डडेलधुराका दुई नगरपालिका र पाँच गाउँपालिकामध्ये एक नगरपालिका र तीन गाउँपालिकामा विजयी भएको कांग्रेसलाई पुरानो विरासत जोगाउन सकस भइरहेको छ।
कांग्रेसले डडेलधुराका परशुराम नगरपालिका, भागेश्वर, आलिताल तथा गन्यापधुरा गाउँपालिकामा अध्यक्ष र नवदुर्गा गाउँपालिका उपाध्यक्ष जितेको थियो। तर अहिले कांग्रेस यी स्थानीय तह जोगाउन नसक्ने अवस्थामा पुगेको छ।
जिल्लाको सबैभन्दा बढी मतदाता रहेको परशुराम नगरपालिकाको मेयर पदमा नेकपा माओवादी, नेपाली कांग्रेस र नेकपा एमालेको त्रिपक्षीय प्रतिस्पर्धा रहेको छ। एमालेलाई बीपी कांग्रेसको साथ छ।
अघिल्लो निर्वाचनमा कांग्रेसले ५४५ मतले जितेको थियो। झिनो मतले पराजित भएका नेकपा माओवादी केन्द्रका शेरसिंह माल (डायमण्ड) फेरि चुनावी मैदानमा छन्। नगरमा नेपाली कांग्रेसका युवानेता भरत जोशी र नेकपा एमालेका केशव बोहरा प्रतिस्पर्धामा उत्रिएका छन्।
जिल्ला सदरमुकाममा रहेको अमरगढी नगरपालिकामा नेपाली कांग्रेस र नेपाली कांग्रेस (बीपी)को मुख्य प्रतिस्पर्धा छ। गत निर्वाचनमा नगर प्रमुख, उपप्रमुखसहित बहुमत वडा विजयी भएको नेकपा एमालेले यस पटक नेपाली कांग्रेस (बीपी) सँग तालमेल गरेर उपप्रमुखमा चित्त बुझाएको छ। नगरप्रमुखमा बीपी कांग्रेसलाई समर्थन गरेको छ।
कांग्रेसबाट २०७४ को निर्वाचनमा पराजित उम्मेदवार डिल्लीराज जोशी प्रमुखमा र उपप्रमुखमा पार्वती झुकाल पुनः उमेदवार बनेका छन्।
एक कार्यकाल उपप्रमुखको जिम्मेवारी सम्हालेकी संगीता भण्डारी पनि नेकपा एकीकृत समाजवादीबाट नगरप्रमुख बन्ने दौडमा छिन्। भण्डारी २०७४ को निर्वाचनमा झुकाललाई पराजित गर्दै एमालेका तर्फबाट उपप्रमुख भएकी थिइन्।
नवदुर्गा गाउँपालिकामा नेकपा एकीकृत समाजवादी, नेपाली कांग्रेस र नेपाली कांग्रेस बीपीबीच त्रिपक्षीय प्रतिस्पर्धा छ। नवदुर्गामा यसअघि प्रमुख एमालेले र उपप्रमुख कांग्रेसले जितेको थियो।
उपाध्यक्ष डम्बरी ओली अहिले नेपाली कांग्रेस बीपीमा लागेकी छन्। आसन्न निर्वाचनमा नेकपा एकीकृत समाजवादीका कवीन्द्र बिष्ट, नेपाली कांग्रेसका लक्ष्मी अवस्थी र कांग्रेस बीपीका गोकुल शाहीबीच प्रतिस्पर्धा हुने स्थानीय बताउँछन्।
कांग्रेसका अवस्थी तत्कालीन एमालेका उम्मेदवार बिष्टसँग पराजित भएका थिए। अहिले कांग्रेसमा दुई समूहकाे फाइदा समाजवादीका बिष्टलाई हुने देखिन्छ। एमाले र बीपी कांग्रेस तालमेल गरेर चुनावमा होमिएकाले उनीहरुलाई पनि कम ठान्न नसकिने स्थानीय नेता बताउँछन्
प्रधानमन्त्री शेरबहादुर देउवाको मतदाता रहेको गन्यापधुरा गाउँपालिकामा बीपी कांग्रेस एमालेसँग तालमेल गर्दै चुनावमा होमिएको छ। प्रधानमन्त्री देउवाको गृह वडामै कांग्रेस कमजोर रहेको कांग्रेस बीपीका नेता कर्ण मल्ल पक्षको दाबी छ।
गन्यापधुुरामा बीपी कांग्रेसले प्रधानमन्त्री देउवाको वडासहित पालिकामा गठबन्धन विजय हुने दाबी गरेकाे छ। कांग्रेस पूर्वजिल्ला सदस्य सुरेन्द्र माली गन्यापधुरामा अध्यक्षका उम्मेदवार छन्। ‘उम्मेदवार धेरै छन्, धेरै पार्टीले उम्मेदवार उठाएका छन्, तर यो स्थानीय चुनाव हो, नातागोता, आफन्त र छिमेकीको मत जहाँ पनि जान सक्छ,’ शिक्षक हरिश क्षेत्रीले भने, ‘जितबारे केही भन्न सकिन्न।’ कांग्रेसबाट इन्द्रबहादुर कार्की पालिका अध्यक्षका उम्मेदवार छन्।
प्रधानमन्त्रीको गृह जिल्ला भएकाले कांग्रेसको प्रभाव रहेको बताउँदै दुई वटा नगरपालिकासहित आलिताल, भागेश्वर र गन्यापधुरा गाउँपालिकामा जित सुनिश्चित भएको जिल्ला सभापति भीमबहादुर साउदको दाबी छ।
२०७४ को निर्वाचनमा नेपाली कांग्रेसले परशुराम नगरपालिका, आलिताल गाउँपालिका, गन्यापधुरा गाउँपालिका र भागेश्वर गाउँपालिकामा जित हात परेको थियो। नेकपा एमाले अमरगढी नगरपालिका र नवदुर्गा गाउँपालिकामा विजयी भएको थियो भने नेकपा माओवादी केन्द्रले अजयमेरु गाउँपालिकामा जित हात पारेको थियो ।
यस पटकको निर्वाचनमा नेपाली कांग्रेस एकल रुपमा निर्वाचनमा हाेमिएको छ भने नेकपा एमाले र नेपाली कांग्रेस (बीपी) ले सातवटै स्थानीय तहमा तालमेल गरेका छन्। नेकपा माओवादी केन्द्र र नेकपा एकीकृत समाजवादीले अजयमेरु गाउँपालिकार गन्यापधुरा गाउँपालिकामा गठबन्धन गरेको छ भने अन्य पालिकामा एकल रुपमा चुनावमा सहभागी भएको छ।
२७ गते देउवा डडेलधुरा आउँदै
देशभर गठबन्धन गरेको कांग्रेसलाई गठबन्धनका मुख्य नेता शेरबहादुर देउवाको गृहजिल्ला डडेलधुरामा स्थानीय तह जित्न सकस भइरहेको छ। उनी यही २७ गते डडेलधुरा आउने कार्यक्रम रहेको नेपाली कांग्रेस डडेलधुराले जनाएको छ।
गतसाता देउवा पत्नी आरजु राणाले अमरगढी नगरपालिका बसपार्कमा भएको एक कार्यक्रममा गरेकाे भाषणले यहाँ कांग्रेसको माहोल थप कमजोर भएको छ। त्यसले पनि देउवा डडेलधुरा आउन तयार भएका हुन्। उनको जोड अमरगढी नगरपालिकामै रहने कांग्रेस निकट एक नेताले बताए।
अमरगढीमा नेपाली कांग्रेस बीपी र एमालेले तालमेल गरेर गरेको छ। त्यहाँ बीपी कांग्रेसका नेता करुवा चुनाव चिह्न लिएर चुनावी मैदानमा छन्। कांग्रेसले कारबाही गरेका कर्ण मल्ल पक्षले पनि अहिले मेयर जिताउन गाउँ गाउँमा भोट माग्ने अभियान चलाइरहेका छन्।
सम्बन्धित समाचार
आरजु तर्सिएको 'करुवा' को अवस्था के छ डडेलधुरामा?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
