नेपाली कांग्रेस (बीपी) का उम्मेदवारहरु (बायाँ) र नेपाली कांग्रेसकी नेतृ आरजु देउवा। तस्बिर : नेपाल लाइभ
डडेलधुरा– ‘करुवाको मान्छेको नेता को हो? कोही पनि छैन। करुवावालाको कहाँ छन् सांसद, वडाध्यक्ष कोही छ? किन भोट हाल्ने यो करुवा, सरुवाजस्ता हरुवाहरुको पार्टीमा? भोट कसैले नहाल्नु होला।’
बिहीबार नेपाली काग्रेस डडेलधुराले आयोजना गरेको चुनावी सभालाई सम्बोधन गर्दै नेपाली कांग्रेसका सभापति तथा प्रधानमन्त्री शेरबहादुर देउवा पत्नी आरजु राणा देउवाले गरेको सम्बोधनको अंश हो यो।
जिल्ला सदमुकाम अमरगढी नगरपालिकाको सभालाई सम्बोधन गर्दा उनले ३० मिनेट भाषणमा ८ चोटि 'करुवा पार्टी' भनिन्। खास उनले भनेको करुवा पार्टी नेपाली काँग्रेस (बीपी) हो। कांग्रेसले कारबाही गरेका नेता कर्ण मल्ल पक्षले डडेल्धुरामा एमालेसँग तालमेल गरेर चुनावमा आफ्ना उम्मेदवार उठाएको छ।
दुई कार्यकाल जिल्ला सभापति र केही वर्ष देउवाको स्वकीय सचिव बनेका मल्ल अहिले नयाँ पार्टीको संगठन विस्तारमा छन्। १३औं जिल्ला अधिवेशनमा भएको सदस्यता विवादपछि उनी कांग्रेस छोड्नुपर्ने अवस्थामा पुगे पनि उपसभापतिलगायतका नेताहरु उनीसँगै छन्।
सात स्थानीय तह रहेको डडेलधुरामा नेकपा एमालेसँग नेपाली कांग्रेस (बीपी)ले तालमेल गरेको छ। तालमेलअनुसार नै उम्मेदवारी दर्ता पनि गरेको छ।
जिल्ला सदरमुकाम अमरगढी नगरपालिकामा एमालेले तलामेल गर्दै नेपाली काँग्रेस (बीपी)लाई नगरप्रमुख दिएको छ भने उपप्रमुखमा आफ्नो उम्मेदवार उठाएको छ।
अमरगढी नगरपालिकामा नेपाली कांग्रेस (बीपी)बाट अधिबक्ता हरिप्रसाद भट्ट, उपप्रमुखमा एमालेबाट यज्ञराज अवस्थी चुनावी मैदानमा छन्।
नेपाली काँग्रेस (बीपी)ले अर्को अध्यक्ष पदमा उम्मेदवार बनाएको पालिका नवदुर्गा हो। त्यहाँ युवा नेता गोकुल शाहीलाई अध्यक्षको उम्मेदवार बनाएको छ। एमालेलाई उपाध्यक्ष दिएको छ।
नेपाली काँग्रेस (बीपी)ले प्रधानमन्त्री देउवाको गाउँपालिका गन्यापधुरामा पनि सुरेन्द्र मालीलाई अध्यक्षको उम्मेदवार बनाएको छ। त्यहाँ उपाध्यक्ष उम्मेदवार एमालेका इन्द्र महरा छन्।
यता अजयमेरुमा अध्यक्षमा एमालेबाट पदम पाल तथा उपाध्यक्ष कांग्रेस (बीपी)बाट रामचन्द्र ऐर उम्मेदवार छन्।
परशुराम नगरपालिका एमालेबाट केशब बोहरा मेयर र एमालेकै गोमती पन्त उपमेयर उम्मेदवार छन्। त्यहाँ नेपाली काँग्रेस (बीपी)बाट उपमेयरको उम्मेदवार तोकिएकी गोमा थापाको नाम काँग्रेसको समानुपातिक बन्दसूचीमा परेकाले उम्मेदवारी खारेज भएको थियो।
यता भागेश्वर गाउँपालिकामा एमालेबाट राम शाही अध्यक्ष र बीपी काँग्रेसबाट उपाध्यक्षमा नरेन्द्र ठकुराठीले उम्मेवारी दिएका छन्। आलितालमा एमाले उम्मेदवारलाई समर्थन गरे पनि बीपी कांग्रेसले उम्मेदवारी दिएको छैन। मल्ल पक्षले तीन स्थानीय तहका प्रमुख र दुई स्थानीय तहका उपप्रमुखसहित ५२ मध्ये २० वडामा आफ्ना उम्मेदवार उठाएको छ । बाँकी ठाउँमा भने एमालेलाई सघाएको मल्ल पक्षका नेता हरि भट्टले बताए।
बीपी काँग्रेस डडेल्धुरा काँग्रेसलाई चुनौती
देशभर एमालेविरुद्ध पाँच दलको गठबन्धन गरेका काँग्रेस सभापति देउवालाई आफ्नै गृह जिल्लामा चुनाव जित्न बीपी कांग्रेस चुनौती बनेको छ। सत्तारूढ दलभित्रै गठबन्धन नहुनु, आफ्नै पार्टीका पूर्वसंगठकहरूले असन्तुष्ट भएर एमालेसँगको तालमेलमा उम्मेदवारी दिनु र आफ्नै गुटभित्र समेत टिकट वितरणमा असन्तुष्टि हुनुले देउवालाई डडेलधुरामा कांग्रेसको विरासत जोगाउन हम्मे पर्ने देखिएको छ।
दुई नगरपालिका र चार गाउँपालिका गरी सात स्थानीय तह रहेको जिल्लामा कांग्रेस, माओवादी, एकीकृत समाजवादी र राप्रपासमेतले एकल उम्मेदवारी दिएका छन्।
एमालेले जिल्लैभरि कांग्रेसको असन्तुष्ट मल्ल पक्षसँग तालमेल गरेको छ। जिल्लामा गुट चलाउनसमेत नदिने देउवाविरुद्ध पहिलोपटक खडा भएका मल्लले कांग्रेसकै नेता तिलक हमालको संयोजकत्वमा बीपी कांग्रेसको जिल्ला कार्यसमिति गठन गरेर उम्मेदवारी दिन लगाएका छन्। मल्लले भने आफूले कांग्रेस नछाडेको, बरु देउवाले नै पार्टीको साधारण सदस्यबाट समेत निकालेर आफूमाथि एकपछि अर्को अन्याय गरेको आरोप लगाएका छन्।
सबैको ध्यान सदरमुकामको अमरगढी नगरपालिकामा
जिल्ला सदरमुकामको अमरगढी नगरपालिका नेपाली काँग्रेसकै बाहुल्यता भएको क्षेत्रको रुपमा चिनिन्छ। तर गत स्थानीय तहको निवार्चनमा मेयर तथा उपमेयर एमालेले जित्यो । तर कार्यपालिकामा बहुमत भने काँग्रेसकै थियो। त्यस समयमा पनि काँग्रेसका आधिकारिक उम्मेदवार एवं अहिलेका समेत उम्मेदवार दिल्लीराज जोशी र उपप्रमुख पार्वती झुकाललाई मल्ल पक्षले सहयोग नगरेको देउवा समूहको आरोप थियो। २०७४ को चुनावमा मल्ल जिल्ला सभापति थिए। आसन्न निर्वाचनमा एमाले र बीपी काँग्रेसका नगरप्रमुखका उम्मेदवार हरिप्रसाद भट्ट र काँग्रेसका नगरप्रमुखका उम्मेदवार दिल्लीराज जोशीबीच प्रतिस्पर्धा हुने निश्चित छ।
बीपी कांग्रेसका उम्मेदवार पराजित गर्ने ‘मिसन’ साथ अहिले देउवापत्नी आरजु देउवा तथा काँग्रेस केन्द्रीय स्तरका नेतासमेत यहाँ आइरहेका छन्। जिल्लाको मुख्य केन्द्र अमरगढी जित्नै पर्ने दबाबमा नेपाली कांग्रेस तथा नेपाली कांग्रेस (बीपी) छन्। कर्ण मल्लको राजनीतिक भविष्यसँग जोडिएको विषयसमेत भएकाले उनको जोडबल अहिले देउवाको गृह वडा तथा गाउँपालिकामा बढी देखिन्छ।
काँग्रेसलाई अमरगढी जित्न समस्या देखिएकाले देउवा २७ गते अमरगढीमा आउन लागेको समेत यहाँका जानकारको आँकलन छ। कांग्रेस डडेलधुराका सातवटै पालिकामा एक्लै भिड्दैछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
