काठमाडौं– लुम्बिनी प्रदेशको बुटवल उपमहानगरपालिकामा २०७४ को स्थानीय तहको चुनावमा माओवादी केन्द्र र नेपाली कांग्रेसबीच गठबन्धन हुँदा पनि एमालेका उम्मेदवारसँग पराजय भोग्नु परेको थियो।
उक्त निर्वाचनमा गठबन्धनको तर्फबाट खेल राज पाण्डेय उम्मेदवार रहेका थिए भने नेकपा एमालेका तर्फबाट शिवराज सुवेदी चुनावी मैदानमा थिए।
सुवेदीले २३ हजार २४९ भोट पाए भने गठबन्धनका तर्फबाट उम्मेदवार रहेका पाण्डेयले २० हजार ८५१ भोट पाएका थिए। यसपटक पनि चुनावी मैदानमा गठबन्धन (कांग्रेस र माओवादी)का तर्फबाट कांग्रेसका उम्मेदवार खेल राज पाण्डेय नै उठेका छन्।
अघिल्लो स्थानीय तहको चुनावमा पराजय भोगेका पाण्डेयले यो पटक भने एमालेका तर्फबाट प्रमुख पदमा उठाइएका बाबुराम भट्टराईसँग प्रतिस्पर्धा गर्दैछन्।
बुटवल उपमहानगरपालिकामा २०७४ मा ६६ हजार ६६३ जना मतदाता थिए। अहिले त्यो संख्या ९० हजार ६५ पुगेको छ। मतदाताको संख्यामा नयाँ थपिएका मतदाताहरु २३ हजार ३७२ रहेका छन्। कुल मतदातामध्ये थपिएका २५.९५ प्रतिशत नयाँ मतदाताहरुको भोट कुन उम्मेदवार र पार्टीलाई जान्छ भन्नेले यसपटक बुटवलको मेयर विजय हुनमा भूमिका खेल्ने देखिन्छ।
बुटवलमा अघिल्लो स्थानीय तहको चुनावमा ४९ हजार ८९२ मत खसेको थियो, जुन कुल मतदाताको ७४.८४ प्रतिशत मत हो। यसमध्ये एक प्रतिशत मत बदर भएको थियो। सोही संख्यालाई आधार मान्दा यसपटकको चुनावमा ६७ हजार ४०० हराहारी भोट खस्ने देखिएको छ।
यसपटक खस्ने भोटमा एमाले र गठबन्धनका तर्फबाट कांग्रेसले उठाएको उम्मेदवारबीच प्रतिस्पर्धा हुने देखिन्छ। भोट अन्य उम्मेदवारमा बाँडिए पनि मुख्य गरि कांग्रेसका उम्मेदवार खेलराज पाण्डेय र एमालेका उम्मेदवार बाबुराम भट्टराईबीचको प्रतिस्पर्धा भने मुख्य रहेको छ।
दोस्रो पटक स्थानीय तहको चुनावमा उठिरहेका पाण्डेय र एमाले उम्मेदवार भट्टराईबीचको प्रतिस्पर्धाले बुटवल उपमहानगरको निर्वाचन रोचक हुने देखिएको छ।
यस्तो थियो २०७४ को मत परिणाम
बुटवलमा २०७४ को स्थानीय तहको चुनावमा कुल मतदाता ६६ हजार ६६३ जना थिए। तीमध्ये ७४. ८४ प्रतिशत मत खसेको थियो। ४९ हजार ८९२ मत खसेकोमा विभिन्न पार्टीदेखि स्वतन्त्र रुपमा प्रमुख पदका लागि उम्मेदवारी दिएका उम्मेदवारहरुमा मत बाँढिएको थियो।
संख्यात्मक रुपमा धेरै मत ल्याउनेमा एमालेका उम्मेदवार सुवेदी र गठबन्धनका तर्फबाट उठाइएका पाण्डेय नै थिए। त्यसबाहेक अन्यले भने सिमित संख्यामा मत पाएका थिए।
कुल १६ जनाले २०७४ मा प्रमुख पदका लागि उम्मेदवारी दिएका थिए। यीमध्ये प्रमुख पार्टीबाट पाण्डेय र सुवेदी नै थिए। त्यसबाहेक मधेश जनअधिकार फोरम नेपाल (लोकतान्त्रिक)का तर्फबाट उठेका लोकनाथ पाण्डे, राष्ट्रिय जनमोर्चाका तर्फबाट ढुण्डिराज शर्मा, राष्ट्रिय प्रजातन्त्र पार्टीका तर्फबाट टिका पौड्याल, राष्ट्रिय जनमुक्ति पार्टीका तर्फबाट जनक बहादुर थापा मगर र नेपाल मजदुर किसान पार्टीका तर्फबाट हरि सुन्दर बासी पनि प्रमुख पदका लागि उठेका थिए। यी बाहेक स्वतन्त्र उम्मेदवारका रुपमा ऋषिराम काफ्ले, गणेश बहादुर उचै, धिरेन तुलाधर, राज कुमार पोख्रेल, शिव नेपाल, शान्त वीर बज्राचार्य, सरोज गौतम र होम बहादुर बासी चुनावी प्रतिस्पर्धामा उत्रिएका थिए।
निर्वाचनमा एमाले उम्मेदवार शिव राज सुवेदीले सर्वाधिक मत २३ हजार २४९ ल्याएका थिए भने दोस्रो बनेका गठबन्धनतर्फका कांग्रेस उम्मेदवार खेल राज पाण्डेयले २० हजार ८५१ मत पाएका थिए। १ हजारभन्दा धेरै मत ल्याउने अर्का उम्मेदवार जनक बहादुर थापा मगर थिए। राष्ट्रिय जनमुक्ति पार्टीका तर्फबाट उम्मेदवार रहेका उनले १ हजार १५१ मत ल्याएका थिए।
स्वतन्त्र उम्मेदवारतर्फ बुटवल उपमहानगरपालिकाको ४२१ भोट बाँढिएको थियो, जुन मत परिणाममा ठूलो प्रभाव पार्ने संख्या थिएन्। त्यसबाहेक राजनीतिक दलका तर्फबाट उठेका तीन जनाले ल्याएको मत बाहेक अन्यको कूल मत ३८९ मात्रै थियो।
एमालेमा फेरिएको अनुहार, अग्निपरीक्षामा कांग्रेस उम्मेदवार
अघिल्लो स्थानीय तहको चुनावमा बुटवल उपमहानगरपालिकामा कांग्रेस र माओवादीको गठबन्धन भएको थियो। यो पटक पनि दुई पाटीले गठबन्धन गरेका छन् भने प्रमुखको उम्मेदवारको रुपमा खेल राज पाण्डेयलाई उठाइएको छ।
यता अघिल्लो पटक आफ्नो जीत सुनिश्चित गरेको एमालेले भने यसपटक बुटवलका लागि आफ्नो उम्मेदवार परिवर्तन गरेको छ। अघिल्लो पटक एमालेले शिव राज सुवेदीलाई उठाएको थियो। यसपटक उम्मेदवार परिवर्तन गर्दै एमालेले बाबुराम भट्टराईलाई प्रमुख पदको उम्मेदवारको रुपमा उठाएको छ।
एमालेले उठाएका भट्टराई पार्टीका पूर्व केन्द्रिय स्वास्थ्य विभाग सदस्य हुन्। औषधी व्यवसायको पृष्ठभूमिबाट आएका उनी बुटवल क्षेत्रका पुराना कार्यकर्ता, उद्योग व्यवसायी र युवा विद्यार्थी माझमा लोकप्रिय मानिन्छन्।
यता दोहोरिएका कांग्रेस उम्मेदवार पाण्डेयको पकड पनि बुटवलमा उल्लेखनिय छ। कांग्रेसको बुटवल नगरका सभापति समेत रहेका उनी अघिल्लो स्थानीय तहको चुनावमा २३ सय मतले पराजित भएका थिए। एमालेले २०५६ सालपछि स्थानीयदेखि संसदीय निर्वाचनमा पनि बुटवलमा जीत हासिल गरिरहेको छ।
तर, यसपटक अवस्था फेरिएको छ। नेकपा एमाले विभाजित भएको छ भने कांग्रेसलगायत गठबन्धनको अवस्थामा सुधार आएको दाबी ती दलहरुको छ। यसले गर्दा एमालेको गढ बुटवलमा गठबन्धनको 'धावा' लाई चासोका साथ हेरिएको छ। तर, यसअघि माओवादीमा मत दिएकाहरु अहिले एमालेमा रहेकाले पार्टी विभाजनको असर नपर्ने एमाले नेताहरुको दाबी छ।
भोटको समीकरणमा राजनीतिक दल र परिवेशमा आएका यी परिवर्तनहरुले पनि असर गर्ने देखिन्छ। यो सबैको केन्द्रमा भने अघिल्लो पटक प्रमुख पदबाट पराजित भएका कांग्रेस उम्मेदवार खेल राज पाण्डेय देखिन्छन्।
गत निर्वाचनमा पराजित भएका उम्मेदवार पाण्डेय यसपटक गठबन्धनकै बलमा जित हात पार्ने दाउमा छन्। उनलाई यसपटक जनता समाजवादी पार्टी र राष्ट्रिय जनमोर्चाको पनि समर्थन छ।
मनोनयन दर्ताको क्रममा प्रमुख पदका लागि उम्मेदवारी दिएका जसपाका सुरज हितान र राजमोका कृष्ण प्रसाद पोखरेलले आफ्नो उम्मेदवारी फिर्ता लिएका छन्।अन्तिम समयमा आएर गणबन्धनमा भएको सहमतिले पनि बुटवल उपमहानगरपालिकाको चुनावी परिणाममा फरक पार्ने आकलन गरिएको छ।
मेयर उम्मेदवार खेलराज पाण्डेय यसपटकको चुनावमा विगतको अवस्था नदोहोरिनेमा आफू विश्वस्त भएको बताउँछन्। नेपाल लाइभसँग उनले भने, ‘अहिले घरदैलो कार्यक्रममा पनि उहाँहरुले पहिले नै छान्नुपर्ने भन्नु भएको छ। यसपटक बुटवलबासीहरुको माया र स्नेहले पहिलेको जस्तो अवस्था हुँदैन भन्नेमा म विश्वस्त छु। गठबन्धनको समर्थन, जनताको माया र मतले बुटवलमा यसपटक पहिलेजस्तो हुने छैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
