काठमाडौं– गण्डकी प्रदेश भलिबल क्लब, नेपाल पुलिस क्लब र त्रिभुवन आर्मी क्लबले छैटौं आररबीबी एनभीए राष्ट्रिय महिला तथा पुरुष भलिबल क्लब लिगमा आइतबार पुरुषतर्फ विजयी सुरुवात गरेको छ।
त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा आइतबारदेखि सुरु भएको लिगमा गण्डकीले ढोरपाटन स्पोर्टस क्लबलाई ३–१ को सेटमा हराउँदै विजयी सुरुवात गरेको हो। गण्डकीले २५–१६, २३–२५, २५–१९, २६–२४ को जित निकालेको थियो। पहिलो जितसँगै गण्डकीले तालिकामा तीन अंक जोड्न सफल भएको छ। यस्तै आइतबार नै भएको अर्को खेलमा विभागीय टोली नेपाल पुलिसले गलकोट स्पोट्र्स क्लबलाई ३–० को सोझो सेटमा स्तब्ध बनायो । पुलिसले २५–१५, २५–१७, २५–२२ को सेटमा जित निकालेको हो।
आइतबार नै भएको दिनको तेस्रो खेलमा त्रिभुवन आर्मी क्लबले अर्को विभागीय टोली एपीएफमाथि ३–० को सोझो सेटमा जित निकाल्यो। आर्मीले एपीएफमाथि २५–२३, २५–१८ र २५–२२ को सेटमा जित निकाल्दै आइतबारबाट सुरु भएको प्रतियोगितामा विजयी सुरुवात गरेको हो। यससँगै आर्मीले पनि अंक तालिका स्पष्ट तीन अंक जोड्न सफल भएको छ भने एपीएफले हारबाट प्रतियोगिताको सुरुवात गरेको छ।
प्रतियोगितामा सोमबारबाट महिला तर्फका खेल हुनेछन्। जस अनुसार विभागीय टोली त्रिभुवन आर्मी क्लबले एभरेष्ट भलिबल क्लबसँग प्रतिस्पर्धा गर्नेछ भने महिला तर्फको दिनको दोस्रो खेल एपीएफ र नेपाल पुलिस क्लबबीच खेल हुनेछ। यस्तै पुरुषतर्फ भने तीन खेल हुनेछन्। पुरुषतर्फ दिनको पहिलो खेल हेल्प नेपाल स्पोर्ट्स क्लब र ढोरपाटन स्पोर्ट्स क्लब, दोस्रो खेल त्रिभुवन आर्मी र गण्डकी प्रदेश तथा तेस्रो खेल एपिएफ र गल्कोट स्पोटर््स क्लबबीच प्रतिस्पर्धा हुनेछ।
वैशाख २४ गतेसम्म सञ्चालन हुने लिगमा महिलातर्फको खेलमा भने विभागीय टोलीको नेपाल पुलिस क्लब, त्रिभुवन आर्मी क्लब, एपिएफ क्लब, न्यु डायमन्ड र एभरेष्ट माबि रहेका छन्। पुरुषतर्फ नेपाल पुलिस क्लब, त्रिभुवन आर्मी क्लब, एपिएफ क्लब, हेल्प नेपाल, गण्डकी प्रदेश, गल्कोट स्पोट्र्स क्लब र ढोरपाटन स्पोर्ट्स क्लब रहेका छन्।
लिगमा महिला पुरुष दुवै तर्फका विजेताले ६ लाख, उपविजेताले तीन लाख, तेस्रो हुने टोलीले एक लाख ५० हजार र चौथो हुने टोलीले ७५ हजार रुपियाँ पुरस्कार पाउनेछ। लिगको सर्वोत्कृष्ट पुरुष र महिला खेलाडीलाई जनही ३५ हजार र विधागत उत्कृष्ट खेलाडी र प्रशिक्षकलाई जनही १५ हजार रुपियाँ प्रदान गरिने संघले जनाएको छ। लिगमा प्रत्येक टोलीले तीन जना विदेशी खेलाडी समावेश गर्न पाउने प्रावधान राखिएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।