समाचार

खेलाडी–प्रशिक्षक विवाद : किरणको विकल्पमा भारतीय आर्मीका गोलकिपर भित्र्याउने तयारी

दीप सुवेदी बिहीबार, वैशाख १५, २०७९ १६:०९

काठमाडौं– नेपाली राष्ट्रिय फुटबल टोलीका मुख्य प्रशिक्षक अब्दुल्लाह अल्मुताइरीले आफूविरुद्ध ‘विद्रोह’ गरेका खेलाडीहरुको विकल्प खोज्न थालेका छन्।

बन्द प्रशिक्षणमा रहेका नेपाली राष्ट्रिय टोलीका मिडफिल्डर रोहित चन्दलाई दुर्व्यवहार गरेको भन्दै विशाल राई, अनन्त तामाङ, विशाल श्रेष्ठ, अञ्जन विष्ट, सुजल श्रेष्ठ र विमल घर्तीमगरलगायतका करिब एक दर्जन खेलाडीले मुख्य प्रशिक्षकविरुद्ध ‘विद्रोह’ गरेका थिए।

उनीहरू मंगलबार बेलुका होटलबाट बाहिरिएका थिए। नेपाली टोली त्रिपुरेश्वरस्थित वर्ल्ड ट्रेड सेन्टरको बिजनेस होटलमा बसेको थियो।

मुख्य प्रशिक्षक अल्मुताइरीले आफूविरुद्ध ‘विद्रोह’ गरेका खेलाडीको विकल्पमा १४ नयाँ खेलाडी बोलाइसकेका छन्। यता, खेलाडीको ‘विद्रोह’मा साथ दिएका कप्तान तथा गोलकिपर किरण चेम्जोङको पनि विकल्प खोज्न थालिएको छ।

किरणको विकल्पको रूपमा भारतको आर्मी टिमबाट खेलिरहेका भवीन्द्र मल्ल ठकुरीलाई बोलाउने तयारी भइरहेको अखिल नेपाल फुटबल संघ (एन्फा)का एक पदाधिकारीले बताए।

‘खेलाडीहरुले पछिल्लो घटनाक्रमलाई लिएर ग्रुपिज्म गरिरहेका छन्। विद्रोह गर्ने खेलाडीलाई अब नबोलाउने सम्भावना छ। उनीहरु आउँदो प्रतियोगिता खेल्ने या नखेल्ने पनि टुङ्गो लागेको छैन। त्यसैले प्रशिक्षकले उनीहरुको विकल्प खोज्न थाल्नुभएको हो,’ ती पदाधिकारीले नेपाल लाइभसँग भने।

यो पनि पढ्नुहोस्

खेलाडी–प्रशिक्षक विवाद : होटल र होस्टलले निम्त्याएको द्वन्द्व

मुख्य प्रशिक्षक अल्मुताइरीविरूद्ध खेलाडीले विद्रोह गरेको विषयलाई माल्दिभ्समा व्यवसायिक लिग खेलिरहेका किरणले सामाजिक सञ्जाल फेसबुकमार्फत् साथ दिएका थिए।

उनले लेखेका छन्, ‘राष्ट्रिय टोलीको प्रशिक्षणमा खेलाडीप्रति प्रशिक्षकबाट गरिएको व्यवहारप्रति मेरो असन्तुष्टी छ। राष्ट्रिय टोलीको क्याम्पमा जायज विषय उठाउँदा खेलाडीलाई क्याम्प नै छोड्न लगाउनु पक्कै सही होइन। टोलीको कप्तान र एक सदस्यको हिसाबले म सधैं खेलाडीको पक्षमा छु।’

एन्फाका अनुसार २९ वर्षीय गोलकिपर भवीन्द्र भारतीय आर्मीको रेड फुटबल टिमबाट खेलिरहेका छन्। उक्त क्लबमा उनी ५ वर्षदेखि आवद्ध छन्।

‘उनी भारतीय सेनामा कार्यरत गोर्खालीका छोरा हुन्। उनको जन्म मेघालयमा भएको थियो। भवीन्द्रको पुर्ख्यौली घर लम्जुङ हो। उनीसँग हामीले कुरा अगाडि बढाइसक्यौं,’ ती पदाधिकारीले भने।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।