काठमाडौं– बैंक तथा वित्तिय संस्था परिषद्का अध्यक्ष पवन गोल्यानले बैंकसँग भएको अधिकांश पैसा आयातमा गएको कारण अहिलेको तरलता समस्या तथा आर्थिक संकटको अवस्था आएको बताएका छन्।
अहिले बजारमा गएको कर्जाको ६०/७० प्रतिशत पैसा आयातित सामान खरिदमा गएको र उत्पादनशील क्षेत्रमा एकदमै कम लगानी भएको कारण तरलता लगायत देशमा आर्थिक संकटको अवस्था आएको उनले बताए।
गोल्यानले नेकपा एमालेले गरेको देशको वर्तमान आर्थिक अवस्था समस्या र समाधान छलफल कार्यक्रममा बोल्दै अहिले देशमा उद्योग कलकारखानाको आवश्यकता रहेको औंल्याए।
यसैगरी, अहिले देशको मूख्य समस्या भनेको व्यापार घाटा रहेको नेपाल उद्योग वाणिज्य महासंघकी पूर्वअध्यक्ष भवानी राणाले बताइन्। सोही कार्यक्रममा सहभागी उद्योगी मोतिलाल दुगडले देशमा आर्थिक संकटको घोषणा गर्नुपर्ने अवस्था आएको बताए।
उनी भन्छन्, ‘अहिले देशमा फण्ड छैन। बैंकहरु रित्तिएको छ। सरकारको ढुकुटी रित्तिएको छ। पैसा छैन कसैसँग। तरलताको अभाव छ।’
उनले केपी ओली सरकारमा हुँदा व्यापारीको हितमा रहेर काम गरेको बताएका छन्। उनी भन्छन्, ‘ओली व्यापारीहरुको गार्जियन जस्तो हुनुन्थ्यो। उहाँको पालामा मन्त्रालयमा तीन दिन भन्दा बढी फाइल अड्केको रेकर्ड छैन। तर, अहिले उद्योग, वाणिज्य तथा आपूर्ति मन्त्रालय महिनौंदेखि बन्द छ।’ उनले अहिले उद्योगीलाई डराउने, धम्क्याउने काम भइरहेको पनि बताए।
कार्यक्रममा नेपाल उद्योग वाणिज्य महासंघका उपाध्यक्ष दिनेश श्रेष्ठले अर्थतन्त्रको अहिलेको मूख्य समस्यामा पहिलो बाह्य असन्तुलन र दोस्रो तरलताको अभाव रहेको बताए।
कोभिडपछि केही लयमा आएको अर्थतन्त्रमा स्वदेशमा उत्पादन कम भएका कारणले बाहिरबाट आयायित सामानको वृद्धि हुनु स्वाभाविक रहेको श्रेष्ठले बताए।
नेपाल राष्ट्र बैंकले लागू गरेको भन्सार सम्बन्धी नियममा श्रेष्ठले आक्रोश व्यक्त गरेका छन्। उनी भन्छन्, ‘कतिपय आयात चाडपर्वलक्षित भएर पनि आएका थिए। जसले आयात बढेको देखियो।’
नेपाल उद्योग परिसंघका अध्यक्ष विष्णु अग्रवालले अहिले उद्योग व्यवसाय सञ्चालन गर्न नसक्ने अवस्था रहेको बताएका छन्। उनले अहिलेको अवस्थामा उद्योगीहरुले ऋण नपाउने, ऋण पाइहाले पनि चर्को ब्याजदर तिर्नुपर्ने तथा उद्योग व्यवसायीमैत्री वातावरण नै नभएको जानकारी दिएका छन्। अहिले देखिएको तरलता अभावको कारणले यस्तो स्थिति आएको उनको भनाइ छ।
अहिले देखिएको विदेशी मुद्राको सञ्चिती खासै नराम्रो नभएता पनि अहिलेको तरलताको समस्या धेरै भयानक रहेको उनको भनाइ छ। अहिलेको अवस्थालाई सुधार गर्न बैंकले विदेशी बैंकबाट कसरी ऋण ल्याउन सक्छ त्यसमा जोड दिनुपर्ने बेला आएको अग्रवालले बताए।
‘अहिले पनि धेरै बैंकले विदेशबाट लोन ल्याउन सफल भएका छन्। तर, यसमा ह्याजिङको समस्या छ। टीडीएसको समस्या छ। यो समस्याको समाधान गर्न सरोकारकवाला निकायले ध्यान दिनुपर्छ’, उनले भने, ‘यसले ठूलो पैसा नेपाली उद्योगमा लगाउन सकिन्छ।’
नेपाल राष्ट्र बैंकले सीसीडी रेसियोलाई खारेज गरेर सीडी रेसियो लागू गरेका कारण तरलतामा समस्या देखिएको नेपाल चेम्बर अफ कमर्सका अध्यक्ष राजेन्द्र मल्लले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768221200.png)
-1764146706.png)
