काठमाडौं– नयाँ सारथी लघुवित्त वित्तीय संस्थाको पर्सा बढनिहारस्थित शाखाबाट बचतकर्ताको ५ करोडबढी रकम हिनामिना प्रकरणमा ४ जना जेल चलान भएका छन्।
उच्च अदालत जनकपुरको वीरगञ्ज अस्थायी इजलासबाट भएको आदेशानुसार लघुवित्तका शाखा प्रबन्धकसहित ४ जनालाई पुर्पक्षका लागि जेल चलान गरिएको हो।
जेल चलान हुनेमा लघुवित्तका बढनिहार शाखाका शाखा प्रबन्धक रौतहटको चन्द्रपुर नगरपालिका–४ घर भएका ४२ वर्षीय भोजेन्द्र ठाकुर लोहार तथा लघुवित्तका कर्मचारीहरु; पर्साको पर्सागढी नगरपालिका–७ घर भएका २४ वर्षीय गेनालाल पटेल, वीरगञ्ज महानगरपालिका–२७ घर भएका २६ वर्षीय प्रदीप कुमार पटेल र वीरगञ्ज–२७ नै घर भएका २४ वर्षीय शेषनाथ कुवाहा छन्।
नयाँ सारथी लघुवित्त वित्तीय संस्थाको काभ्रे धुलिखेल–३ स्थित कार्यालयले पर्साको बढनिहार शाखामा बचतकर्ताको रकम हिनामिना भएको भन्दै पर्सा प्रहरीमा उजुरी दिएको थियो।
बढनिहार शाखामा २०७४ पुस २० गतेदेखि शाखा प्रबन्धकमा कार्यरत भोजेन्द्र ठाकुर लोहारले अन्य कर्मचारीहरूको सहयोग लिइ विभिन्न मितिमा ३०८ जना वचतकर्ता सदस्यहरूको जानकारीबिना उनीहरूको नामको नक्कली ऋण आवेदन र अन्य नक्कली कागजात तयार गरी ऋण स्वीकृत गरी ५ करोड ३४ लाख ५५ हजार ४७९ रुपैयाँ आफैँले निकाले उजुरीमा उल्लेख थियो।
लघुवित्तको जाहेरीपछि पर्सा प्रहरीले गत मंसिर २४ गते लोहारलाई नियन्त्रणमा लिएको थियो। लोहारले दिएको बयानका आधारमा प्रहरीले अन्य ६ जनालाई पनि नियन्त्रणमा लिएको थियो।
अनुसन्धानका क्रममा लोहारले अरु कर्मचारीसँगको मिलेमतोमा नक्कली ऋणी खडा गरी कीर्ते सहीछाप र नक्कली कागजात तयार गरी १५ जना बचतकर्ताको ऋण रकम र कर्जाको ब्याजबापतको रकम समेत गरी ५ करोड ५७ लाख ४२ हजार २७४ रुपैयाँ हिनामिना गरेको देखिएको जिल्ला प्रहरी कार्यालय पर्साले जानकारी दिएको छ।
प्रहरीले लोहारसहित ७ जनाविरुद्ध मुद्दा चलाउन भन्दै जिल्ला सरकारी वकिल कार्यालय पर्सामा अनुसन्धान प्रतिवेदन पेस गरेको थियो। जिल्ला सरकारी वकिलले ३ जना व्यक्तिविरुद्ध मुद्दा नचल्ने निर्णय गरेर बाँकी ४ जनाविरुद्ध मुद्दा दर्ता गरेको थियो।
उच्च अदालत जनकपुरको वीरगञ्ज अस्थायी इजलासले फागुन २ गते आरोपीमध्येका लोहारलाई कारागार चलान गर्न र अन्य ३ जनासँग १–१ करोड धरौटी लिएर तारेखमा राखी मुद्दाको पुर्पक्ष गर्न आदेश जारी गरेको थियो।
तर, अदालतको आदेशानुसार धरौटी रकम बुझाउन नसकेपछि लघुवित्तको बढनिहार शाखाका कर्मचारीहरु गेनालाल पटेल, प्रदीप कुमार पटेल र शेषनाथ कुशवाहा पनि कारागार चलान भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
