काठमाडौं– सुन भरिया रामेश्वर रामलाई अपहरण गरेको आरोपमा पक्राउ परेका तीनै जना प्रतिवादी जेल चलान भएका छन्। काठमाडौं जिल्ला अदालतका न्यायाधीश नारायणप्रसाद सुवेदीको इजलासले पक्राउ परेका तीनै जनालाई पुर्पक्षका लागि कारागार पठाउने आदेश दिएको हो।
माघ २७ गते उनीहरुलाई पुर्पक्षका लागि कारागार पठाउने आदेश भएसँगै कारागार चलान गरिएको महानगरीय प्रहरी परिसर काठमाडौंले जानकारी दिएको छ।
सिरहाको सखुवानाकारकट्टी गाउँपालिका–५ का ३० वर्षीय रामेश्वर रामले गत असोज ६ गते दुबईबाट सुन ल्याएका थिए। उनलाई तस्करको समूहले भरियाको रुपमा प्रयोग गर्दै सुन बोकाएर पठाएको थियो। उक्त सुन लुटाएको भन्दै रामलाई एक समूहले अपहरण गरेर बन्धक बनाएको थियो।
उक्त घटनामा चार महिनापछि परिसर काठमाडौंले तारकेश्वर नगरपालिका–८, जरङ्खुका ३२ वर्षीय संजोग राई, सोही ठाउँका ३० वर्षीय रमेश अर्याल र मकवानपुरको मकवानपुरगढी गाउँपालिका–५ घर भई हाल काठमाडौं महानगरपालिका–१६ बस्ने ३१ वर्षीय गोकुल घिमिरेलाई पक्राउ गरेको थियो।
पक्राउ परेका तीनै जनालाई थुनामा पठाउने आदेश जिल्ला अदालतले गरेको हो। सुन तस्करका एजेन्टले नै दोहोरो भूमिका खेलेपछि भरिया रामेश्वर राम अपहरणमा परेको प्रहरी अनुसन्धानले देखाएको थियो।
पक्राउ परेका तीन जनामध्ये एक जना सुन तस्करका एजेन्ट भएको र उनकै योजनाअनुसार सुन लुटिएको बहाना बनाई रामलाई अपहरण गरेको खुलेको थियो।
दुबईबाट पठाएको सुन अर्कैले लुटेर लगेको र आफूले सुन रिसिभ गर्न नपाएको बताएर उक्त सुन आफ्नो पार्ने उद्देश्यले अपहरणसम्मको घटना रचिएको प्रहरी अनुसन्धानको निष्कर्ष थियो।
रामलाई बल्खुस्थित कन्चन्जंघा होटलबाट अपहरण गरी ठमेलको होटल प्लेजरमा पुर्याएर बन्धक बनाई कुटपिट गरिएको थियो। दुई तलाबाट हाम फालेर रामले ज्यान जोगाएका थिए।
सुनबारे भन्सारले अनुसन्धान गर्दै
लुटिएको भनिएको सुनबारे अहिलेसम्म प्रहरीदेखि भन्सार कार्यालयसम्म अनभिज्ञ छ। कति मात्रामा सुन थियो, उक्त सुन कसले लिए भन्नेबारे अहिलेसम्म यथष्ट प्रमाण छैन।
भन्सार छलेर ल्याइएको उक्त सुनबारे थप अनुसन्धान गर्न प्रहरी परिसर काठमाडौंले त्रिभुवन अन्तर्राष्ट्रिय विमानस्थल भन्सार कार्यालयलाई पत्र काटेपछि भन्सार कार्यालयबाट सुनबारे अनुसन्धान भइरहेको छ।
अपहरणमा परेका भनिएका व्यक्तिको बयान अनुसार करिब १ किलोसम्म सुन थियो भन्ने बुझिएको छ। सुनको घोल (लिक्वीड) बनाएर ल्याएको खुलेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770979298.jpg)
-1764146706.png)
-1770562345.jpg)
