काठमाडौं– मोरङको धनपालथान गाउँपालिका–७ स्थित उखुबारीमा दुई व्यापारीको शव भेटिएको एक हप्ता पुग्दासम्म संदिग्ध व्यक्तिको पहिचान हुन सकेको छैन। शव भेटिएदेखि नै तालिम प्राप्त कुकुर, फरेन्सिक विज्ञदेखि अपराध अनुसन्धानमा पोख्त प्रहरी अधिकारीहरु अनुसन्धानमा खटिँदै आएका छन्। तर, हालसम्म पनि प्रहरीले उक्त रहस्यमय हत्याको पोको फुकाउन सकेको छैन।
व्यायारी हत्या अनुसन्धानको नेतृत्व गरिरहेका जिल्ला प्रहरी कार्यालय मोरङका प्रहरी प्रमुख तथा प्रहरी उपरीक्षक (एसपी) जनार्दन जिसी भन्छन्, ‘यो हत्याको अनुसन्धान जटिल छ। हत्या हुनसक्ने कारण पहिल्याईसकेपछि बल्ल संदिग्धतर्फ अनुसन्धान मोडिन्छ ।’ हत्या किन भयो भन्ने विभिन्न कारणहरुको विश्लेषण गरिए पनि यही कारण हत्या भयो भन्ने अवस्था अहिलेसम्म आइनसकेको उनको भनाइ छ। उखुबारीमा खाल्डो खनि गाडेको अवस्थामा गत बुधबार र बिहीबार दुई व्यक्तिको शव प्रहरीले निकालेको थियो।
उखु काट्न गएका किसानले भर्खर खनेजस्तो खाल्डो र बाहिर रगत देखेपछि प्रहरी कन्ट्रोल १०० मा फोन गरेर प्रहरीलाई जानकारी गराएका थिए। त्यसपछि एसपी जिसीसहितको टोली गएर खाल्डो उत्खनन् गरेर हेर्दा शव भेटिएको थियो। बुधबार उत्खनन् गरी निकालिएको शव काठमाडौं बस्दै आएका शम्भु चौधरीको भएको खुलेको थियो। एसपी जिसीका अनुसार उक्त शवमा हात डोरीले बाँधिएको र घाँटीमा समेत डोरीको डाम थियो।
रात परेकाले अर्को खाल्डो सुरक्षित राखेर भोलिपल्ट बिहीबार खाल्डो खनेर हेर्दा अर्को पनि शव भेटिएको थियो। उक्त शव भक्तपुर बस्दै आएको धरान घर भएका ३९ वर्षीय राजेन्द्रकुमार श्रेष्ठको भएको खुलेको थियो। उक्त खाल्डोबाट सीमकार्ड, पर्स, सवारी चालक प्रमाणपत्र समेत फेला परेको थियो। करिब २० मिटरको दूरीमा रहेका दुई खाल्डाबाट प्रहरीले दुई शव निकालेको थियो। दुबैलाई एउटै प्रकृतिबाट हत्या गरी खाल्डोमा गाडेको प्रहरीले प्रारम्भिक अनुसन्धानले देखाएको छ। उत्खनन् गरिएका दुबै शव करिब १०/१२ दिन अघि हत्या गरी खाल्डो खनेर गाडिएको हुनसक्ने प्रहरीको अनुमान छ। शव गलाउन नुनको समेत प्रयोग गरिएको पाइएको एसपी जिसीले बताए।
दुई पुरुषको शव भेटिएपछि अनुसन्धानमा जुटेको प्रहरीले उनीहरु दुबै जना घरजग्गा कारोबारी भएको जनाएको छ। करिब एक महिना अघि उनीहरु कारोबार मिलाउन भन्दै घरबाट निस्केको उनीहरुका आफन्तले जनाएका छन्। दुबैजना घरजग्गा कारोबारी भएकाले उनीहरुसँगको लेनदन विवादका कारण अपहरण गरी हत्या हुनसक्ने आशंकामा पनि प्रहरीले अनुसन्धान गरिहेको छ । विभिन्न टेक्निकलदेखि म्यानुअलसम्मको अनुसन्धान भइरहेको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
