काठमाडौं- 'लिभिङ टुगेदर रिलेसनसिप'मा रहेका युवा-युवती बिहीबार राति काठमाडौंको फैकास्थित राधाकृष्ण मन्दिर नजिकको एक घरको कोठामा मृत भेटिए। मृत भेटिनेमा संखुवासभा घर भएका २६ वर्षीय अनिश जिमी र खोटाङ घर भएकी अन्दाजी २२ वर्षीया युनिशा राई छन्।
उनीहरु दुवैको शव पोस्टमार्टमका लागि त्रिवि शिक्षण अस्पताल महाराजगञ्ज पठाइएको छ। बन्द कोठाभित्र दुवैजना मृत भेटिएकाले अहिलेसम्म उनीहरुको मृत्युमा तेस्रो व्यक्तिको संलग्नता नदेखिएको महानगरीय प्रहरी अपराध महाशाखाका प्रहरी वरिष्ठ उपरीक्षक (एसएसपी) चन्द्रकुवेर खापुङ बताउँछन्।
यद्यपि, उनीहरुको मृत्यु के कारण भयो भन्ने विषय अहिलेसम्म रहस्यको गर्भमै छ। बाह्य प्रमाण केही छैन। ‘बन्द कोठाभित्र रहेका दुवै जनाको मृत्यु भइसकेकाले यही कारणबाट विवाद भयो वा हानाहान भएर मृत्यु भयो भन्ने अवस्था छैन,’ एसएसपी खापुङ भन्छन्। यद्यपि, उनीहरुको मृत्युको कारणमध्ये मदिरा र 'पब्जी तथा फ्री–फायर (भर्चुअल गेम)' हुनसक्ने प्रहरी अधिकारी बताउँछन्।
पब्जीबाट जोडिएको सम्बन्ध २० दिनमै टुंगियो
अनिश र युनिशा गेमबाटै साथी बनेका थिए। पब्जी खेल्ने क्रममै उनीहरुको चिनजान भएको प्रहरी अनुसन्धानबाट खुलेको छ। अनिश सानीआमाको घरमा आमासँगै बस्दै आएका थिए। एक तले घरको एउटा कोठामा उनी सुत्थे भने अर्को कोठामा अनिशकी आमा। उनका बाबु भने वैदेशिक रोजगारीमा मेलेसियामा थिए। कक्षा १२ सम्म अध्ययन गरेका उनी विदेश जाने योजनामा थिए।
अनिशकी आमाले प्रहरीलाई बताएअनुसार उनी मोबाइलमा विभिन्न गेमहरु खेल्थे। रातिराति हान् हान्, मार् मार् भन्दै कराउँथे। यसरी पब्जी, फ्री–फायर खेल्ने क्रममा त्यही माध्यममार्फत् उनी युनिशासँग साथी बनेका थिए। त्यसपछि उनले युनिशालाई आफू बस्दै आएको घरमा ल्याएका थिए। बिहे नगरेको छोराले 'गर्लफ्रेण्ड' भन्दै केटी ल्याएपछि आफूले पनि बुहरीको रुपमा स्वीकारेको र उनीहरु करिब २० दिन अघिदेखि सँगै बस्दै आएको अनिशकी आमाले बताएको एसएसपी खापुङ बताउँछन्।
मृत केटा-केटी दुवैको अवस्था बुझ्दा उनीहरु अलि 'ट्रयाक आउट' भएजस्तो देखिएको महाशाखाकै एक अनुसन्धान अधिकारी बताउँछन्। यसरी करिब २० दिन अघिमात्रै पब्जीमार्फत् साथी बनेर लिभिङ-टुगेदरसम्मको अवस्थामा पुगेका उनीहरु गएराति मृत अवस्थामा भेटिए।
चक्कु प्रहारबाट मुत्यु
आइतबार राति उनीहरु सुतेको कोठामा आवाज आएको, कराएको जस्तो सुनिएको थियो। अघिल्ला दिनहरुमा जस्तै पब्जी, फ्री–फायर गेम खेलेर कराएका होलान् भन्ने अशिनकी आमाले सोचेकी थिइन्। तर, निकै समयसम्म पनि ढाङढुङ गरेको आवाज आएको र घ्यार, घ्यार... गरेको आवाज सुनेपछि अनिशकी आमाले ढोका खोल्न खोज्दा ढोका खुलेन। त्यसपछि अर्को कोठामा बस्ने मान्छेलाई बोलाएर ढोका फोडेर हेर्दा नग्न र अर्धनग्न अवस्थामा रगतले लतपतिएको अवस्थामा दुवै जना ढलेको अवस्थामा देखिएपछि उनीहरुले प्रहरीलाई खबर गरेका थिए।
राति करिब १२ बजेतिर महानगरीय प्रहरी परिसर काठमाडौंका एसएसपी सुदीप गिरी, महाशाखाका एसएसपी खापुङसहितको टोली घटनास्थल पुगेको थियो। ‘युवती नग्न अवस्थामा खाटमै उत्तानो अवस्थामा रगतले लतपतिएको अवस्थामा मृत थिइन्। युवक कट्टुमात्रै लगाएको अवस्थामा ढोका नजिक ढलेको अवस्थामा थिए। उनको शरीर तातै थियो,’ परिसरका एक अनुसन्धान अधिकारीले भने, ‘त्यसपछि हामीले युवकलाई हेल्पिङ ह्याण्ड अस्पताल पठायौं तर, डाक्टरले मृत घोषित गरे।'
प्रहरीका अनुसार युवतीको पेटलगायत शरीरका १८/२० ठाउँमा चक्कुका डाम थिए। युवकको पनि पेटमा चक्कुले रोपेजस्तो डाम थियो भने घाँटी पनि आधा रेटिएको थियो। कपडाहरु छरपस्ट थिए। रातो लेदरको चक्कुको खोल, चक्कु, पनि कोठामै भेटिएको थियो। गोल्डेन वकको बोतल, दुईवटा गिलास, चुरोटका ठुटा, कचौरीमा कुखुराको मासु समेत भेटिएको थियो।
अहिलेसम्मको प्रहरी अनुसन्धान अनुसार कुनै विषयमा विवाद हुँदा अनिशले पहिला युनिसाको हत्या गरेर आफूले आत्महत्या गरेको हुनसक्ने ठम्याइ छ। युवतीको मृत्यु पहिला हुनुले पनि आक्रोशित हुँदा युवतीको हत्या गरेर अनिशले घाँटी रेटेर आत्महत्या गरेको हुनसक्ने अनुसन्धान अधिकारी बताउँछन्।
हत्यासम्मको अवस्था किन आयो, के कारण उनीहरुबीच विवाद भयो भन्ने विषय दुवै जनाको मृत्यु भएकाले रहस्यको गर्भमै छ। उनीहरुबीच कस्तो सम्बन्ध थियो लगायतको विषय पनि सार्वजनिक हुन सकेको छैन। प्रहरीका अनुसार उनीहरुसँगै अर्को एक युवती पनि केही दिन सँगै बस्दै आएकी थिइन्। ती युवतीले आफू मृतक युवतीको फूपु दिदी बताएकी थिइन्। तर, घटना हुने दिनबाटै ती युवती त्यो घरबाट हिँडेको पाइएको छ। उनीमाथि सोधपुछ गर्न प्रहरीले ती युवतीको बारेमा जानकारी लिइराखेको छ।
एउटा कारण बन्नसक्छ- मदिरा र फ्री–फायर
'क्राइम सिन'मा मदिराको बोतल भेटिनुले उनीहरु मदिराको नशामा रहेको भन्ने देखिएको प्रहरीको बुझाइ छ। अर्कोतर्फ पब्जी, फ्री–फायरमार्फत् चिनजान भएर लिभिङ टुगेदरसम्मको अवस्थामा रहेको पनि देखिएको छ।
फ्री–फायरले मान्छेलाई क्रुर बनाउने र उनीहरुका अघिल्ला दिनका गतिविधिहरुले पनि उनीहरु फ्री–फायरको लतमा रहेको भन्ने बुझिएको एसएसपी गिरी बताउँछन्।
‘उहाँका आमाका अनुसार उनीहरु दुवैजना फ्री–फायरको लतमा रैछन्। बेलुका भएपछि हान् हान्, मार् मार् भन्ने गरेको पनि आमाले सुन्नु भएको रहेछ,’ एसएसपी गिरीले नेपाल लाइभसँग भने, ‘एकातर्फ मदिराको नशामा हुनु र अर्कोतर्फ मान्छेलाई क्रुर बनाउने फ्री–फायरको लतमा हुनुले सामान्य विवाद हुँदा पनि आक्रोशमा आएर हत्या भएको जस्तो देखिन्छ।’
फ्री–फायरले मान्छेलाई क्रुर र आक्रोशित बनाउने हुँदा त्यो राति उनीहरुबीच केही कुरामा सामान्य विवाद हुँदा पनि त्यसले हत्यासम्मको अवस्थामा पुर्याएको हुनसक्ने प्रहरीको प्रारम्भिक अनुमान छ। गिरी भन्छन्, ‘वास्तवमा भन्नुपर्दा पब्जी, फ्री–फायर जस्ता गेम बन्द नै हुनुपर्छ। यसले मान्छेलाई क्रुर बनाउँछ र जस्तो पनि अपराध गर्न मान्छे पछि पर्दैनन्। जसकारण सामान्य विवादमा पनि मान्छेले ठूलो अपराध गर्नसक्ने अवस्था आउँछ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
