काठमाडौं– गायक योगेश्वर अमात्यको जग्गाको नक्कली लालपुर्जा बनाएर १९ करोड रुपैयाँ ऋण लिएको घटनामा कुमारी बैंककै भूमिका शंकास्पद देखिएपछि बैंकिङ कसूरमा सुरु भएको अनुसन्धानका क्रममा १३ जनाको संलग्नता खुलेको छ।
प्रहरीको केन्द्रीय अनुसन्धान ब्यूरो (सीआईबी)ले नक्कली कागजातलाई समेत कुमारी बैंकले कर्जा दिएको पाइएपछि बैंकका कर्मचारीसहित १३ जनाविरुद्ध अनुसन्धान गरेको थियो। सीआईबी स्रोतका अनुसार बैंकका उच्च पदस्थ कर्मचारीको समेत घटनामा संलग्नता देखिएको छ। बैंकिङ कसूर मुद्दामा अनुसन्धान सकाएर गत सोमबार मात्रै सीईबीले विशेष सरकारी वकिल कार्यालयमा प्रतिवेदन बुझाएको थियो। उक्त प्रतिवेदनमा सीआईबीले १३ जनालाई प्रतिवादी बनाउँदै मुद्दा दर्ता गर्ने सिफारिस गरेको छ।
सीईबीले १३ जनाको संलग्नता देखिएको भन्दै उनीहरुविरुद्ध बैंकिङ कसूरमा मुद्दा चलाउन सिफारिस गरेपनि विशेष सरकारी वकिल कार्यालयले भने उनीहरुविरुद्ध मुद्दा नै नचल्ने निर्णय गरेको स्रोतले नेपाल लाइभलाई जानकारी दियो। जानकार स्रोतले नेपाल लाइभसँग भन्यो, ‘बैंकका उच्च पदस्थसहित १३ जना संलग्न रहेको तथ्यसहित उनीहरुविरुद्ध मुद्दा दर्ता गर्न भनेर सीआईबीले अनुसन्धान प्रतिवेदन बुझाएको थियो। तर विशेष सरकारी वकिलले उनीहरुविरुद्ध मुद्दा नचल्ने निर्णय गरेछ। विशेष सरकारी वकिलले के–कति कारणले यस्तो निर्णय गर्यो, त्यो थाहा भएन।’
अझ रोचक त के भने सीआईबीले सुरुआती अनुसन्धानका क्रममा बैंकिङ कसूरको मुद्दामा अनुसन्धान गरेको थिएन। बैंकिङ कसूर नभएको र किर्ते भएको भन्दै लिखतसम्बन्धी कसूरमा अनुसन्धान गरेर सीआईबीले जिल्ला सरकारी वकिल कार्यालयमा फाइल पेस गरेको थियो। जिल्ला सरकारी वकिल कार्यालयले त्यसबेला किर्तेमात्रै नभएर बैंकिङ कसूरसमेत जोडिएको देखिएकाले बैंकिङमासमेत अनुसन्धान गर्नू भनेर फाइल फिर्ता गरेको थियो। पहिला बैंकिङ कसूरमा अनुसन्धान गर्नु भनेर फाइल नै फिर्ता भएपछि सीआईबीले पुनः बैंकिङ कसूरमा अनुसन्धान गरेको थियो। तर, अहिले भने त्यही मुद्दा नै नचल्ने भन्दै विशेष सरकारी वलिक कार्यालयले फाइल थन्क्याएको छ।
सीआईबी स्रोतले पनि विशेष सरकारी वकिल कार्यालयबाट मुद्दा नचल्ने भन्ने निर्णय भएको नेपाल लाइभलाई बतायो। 'पहिला बैंकिङ कसूरमा अनुसन्धान गर भन्ने अहिले बैंकिङ कसूर नै भएको छैन, मुद्दै चल्दैन भनेर फाइल थन्क्याइयो,' सीआईबी स्रोतले भन्यो, 'बैंकिङ कसूरमा १३ जनालाई प्रतिवादी बनाइएको भनिए पनि उनीहरु को-को हुन् भन्ने विषय अहिलेसम्म गोप्य राखिएको छ।'
अमात्यको जग्गाको नक्कली कागजात बनाएर अर्कै व्यक्तिले १९ करोड रुपैयाँ ऋण लिएको र पछि त्यो विषय बैंकले थाहा पाएपछि उनीहरुबाट ऋण चुक्ता गरेकाले बैंकिङ कसूर हुन नपाएको भन्दै मुद्दा नचल्ने तर्क सरकारी वकिल कार्यालयले गरेको स्रोतले जानकारी दियो।
यस प्रकरणमा प्रहरीले पर्सास्थित कुमारी बैंक शाखाका ऋण अधिकृत सोनु ठाकुर, मूल्याङ्कनकर्ता राजेश चौरसिया, काठमाडौंका एसके महर्जन, मुक्तिलाल गौतम र अर्का बिचौलिया कुसुम प्रधानलाई पक्राउ गरेर किर्तेमा मुद्दा चलाएको थियो। बैंकको पर्सा शाखाका एक कर्मचारीसहित चार जनालाई फरार प्रतिवादी बनाइएको थियो।
जग्गाको लालपुर्जा नक्कली भएको थाहा हुँदाहुँदै कुमारी बैंकको पर्सा शाखाका कर्मचारीको मिलेमतोमा नै ऋण दिइएको प्रहरीले दाबी गरेको छ।
गायक अमात्यको बाराको विश्रामपुरमा बिरुवा भूमि वनकाली कम्पनीको नाममा १२ बिघा जग्गा थियो। उक्त जग्गा नै अर्कै कम्पनीमा रहेको भन्ने कागजात बनाएर योजनाबद्ध तरिकाले १९ करोड रुपैयाँ हत्याउन नक्कली लालपुर्जा बनाइएको खुलेको थियो।
एसके र मुक्तिलालको डेनियल ट्रेडिङको नाममा उक्त जग्गा नामसारी गरेर नक्कली लालपुर्जा बनाएर उनीहरुको कम्पनीको नाममा १२ बिघा जग्गा रहेको प्रमाण देखाइ १९ करोड रुपैयाँ कर्जा लिइएको थियो।
नक्कली लालपुर्जा राखेर १९ करोड रुपैयाँ ऋण दिने प्रकरणको नेक्सस पर्सा, काठमाडौंको न्यूरोड शाखादेखि काठमाडौं नक्सालमा रहेको कुमारी बैंकको केन्द्रीय कार्यालयसम्म जोडिएको सीआईबीका अनुसन्धानले देखाएको थियो।
१२ बिघा जग्गाको नक्कली लालपुर्जा राखेर ऋण लिन भन्दै कुमारी बैंकको पर्सास्थित शाखामा २०७८ भदौमा कागजात पेस भएको थियो। उक्त कागजात अध्ययनका लागि भनेर काठमाडौंको न्यूरोड शाखा हुँदै केन्द्रीय कार्यालय नक्सालसम्म पठाएको देखिएको अनुसन्धानबाट खुलेको थियो। केन्द्रीय कार्यालयलेसमेत उक्त कागजातलाई सदर गर्दै ऋणका लागि स्वीकृत गरेको देखिएपछि ऋण प्रवाह भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
