काठमाडौं- नेकपा एमालेको १०औँ महाधिवेशनबाट निर्वाचित केन्द्रीय सदस्य (खुला) र थारु क्लस्टरको विजेताको नाम घोषणा गर्दा ‘प्राविधिक त्रुटि’ देखिएको छ। उक्त त्रुटिका कारण चार उम्मेदवारले जितेको वा पराजय व्यहोरेको अनिश्चित बनेको छ।
खुला केन्द्रीय सदस्य टंकप्रसाद कार्की र भीम रावल तथा थारु क्लस्टरमा रहेका नरुलाल चौधरी र जयप्रकाश चौधरीले केन्द्रीय सदस्यमा हारेका वा जितेका स्पष्ट हुन सकेको छैन।
एमाले निर्वाचन आयोगका अध्यक्ष विजय सुब्बाले सुरुमा कार्कीलाई सदस्यमा विजयी भएको घोषणा गरेका थिए। तर, पछि सच्याउँदै उनी पराजित भएको बताए।
निर्वाचन आयोगले उम्मेदवारको अन्तिम नामावली निकाल्दा १०० जनाको नाम थियो। मत परिणाममा ९९ जनाको मात्र नाम छ। अन्तिम नामावलीमा भएका तर, मत परिणाममा नभएका उम्मेदवार हुन्, सुरेन्द्र मानन्धर। उनी आफूले उम्मेदवारी फिर्ता लिएको बताउँछन्।
केन्द्रीय सदस्य (खुला) मा ८४ जनाको कोटा छ। १९ पदाधिकारीमध्ये निर्विरोध नभएका १४ जना पनि केन्द्रीय सदस्यको प्रतिश्पर्धामा थिए। ९९ उम्मेदवार कायम हुँदा पदाधिकारीमा विजयी १४ जना स्वतः केन्द्रीय सदस्यको प्रतिश्पर्धाबाट बाहिरिन्छन्। त्यसपछि ८५ प्रतिश्पर्धी मात्र कायम रहने कारण एक जना उम्मेदवार मात्र पराजित हुनुपर्छ।
आयोग अध्यक्ष सुब्बाले पढेको उक्त सूचीअनुसार कार्कीले ९०५ मत पाएका छन्। जबकि, आयोगले केन्द्रीय सदस्यमा विजयी भनेको र अध्यक्षमा पराजित भीम रावलको ९०४ मत मात्रै छ। यसाे हुँदा कार्की विजयी भएर रावल केन्द्रीय सदस्यमा पनि पराजित हुन्छन्।
घोषणा गर्दागर्दै ओलीतिर हेर्दा आशंका
टंकप्रसाद कार्कीले अध्यक्ष केपी शर्मा ओलीको प्रस्ताव बाहिरबाट सचिवममा उम्मेदवारी दिएका थिए। ओलीको सूचीविरुद्ध गएका उनी सचिवमा पराजित भए।
सदस्यमा कार्कीको नाम पढेपछि अध्यक्ष विजय सुब्बा ओलीतिर हेर्छन् र भन्छन्, ‘यहाँ विजयी लेखिएको छ।’ विजयीहरुको नाम घोषणापछि पोडियमबाट गएको उनी पछि फेरि आएर सच्याइएको बताउँदै कार्की पराजित भएको उल्लेख गरे। सुब्बाले नाम पढ्दै गर्दा ओलीतिर हेरेको र ‘विजयी लेखिएको’ भन्ने भाषाको प्रयोग गरेकाले नियतवश हराउन खोजिएको कार्की निकटहरू आशंका गरिरहेका छन्।
उम्मेदवार कार्की भन्छन्, 'आयोगका अध्यक्षले नाम घोषणा गर्दा अध्यक्ष ओली तिर हेर्नुले निर्वाचन प्रकृयानै एकपक्षीय भएको जस्तो आशंका सिर्जना गरेको छ।'
कतिपयले सबैभन्दा कम मत देखिएका रावललाई केन्द्रीय कमिटीमा निरन्तरता दिन अध्यक्ष केपी शर्मा ओलीले अर्को उम्मेदवार हराउन खोजेको रुपमा पनि बुझेका छन्। केन्द्रीय कमिटीमा नरहने पहिल्यै घोषणा गरेका रावललाई केन्द्रीय कमिटीमै हराएको आरोपबाट मुक्त हुन ओली पक्षले यस्तो गर्न खोजेको हुनसक्ने केहीको आशंका छ।
पहिलोपटक भोटिङ मेसिनबाट मतदानको अभ्यास गरेको एमाले निर्वाचन आयोगले भने पुनः त्यसको परीक्षण गरिरहेको छ। राम्रोसँग परीक्षण गरेर मात्रै अन्तिम परिणाम प्रमाणित गर्ने तयारीमा आयोग छ।
आयोगका अध्यक्ष सुब्बा हतारमा नतिजा प्रकाशित गर्दा केही प्राविधिक गडबडी भएको बताउँछन्। अहिले आफ्नो टिम त्यसलाई फेरि रुजु गर्नेतर्फ लागेको उनको भनाइ छ। उनले भने, ‘मेसिनमा मत परिणाम उस्तै राखिएको छ। त्यसलाई वर्णानुक्रमअनुसार सार्दा गडबडी भएको हुनसक्ने देखिएकाले हेर्दैछौं। हस्ताक्षर गरेर पार्टीलाई बुझाइने विजेताको नामवली दुरुस्त हुन्छ।’
थारु क्लस्टरमा के भयो?
थारु खुला कोटामा पनि अध्यक्ष सुब्बाले विजेताको नाम जयप्रकाश थारु भएको सुरुमा घोषणा गरे। सुब्बाले जयप्रकाश थारुको १७५३ भोट आएको बताएका थिए। यसैगरी नरुलाल चौधरी ७१९ मत ल्याएर पराजित भएको उनले बताए।
विजयी भनिएका जयप्रकाश अध्यक्ष ओलीले प्रस्ताव गरेको सूचीबाहिरका हुन्। उनले अनपेक्षित जित निकालेको धेरैले अनुमान लगाए। तर, लामो समय उनको जित टिकेन बरु प्राविधिक गडबडी भएको बताउँदै सुब्बाले सच्याए। नरुलाल नै विजय बनेको उनले घोषणा गरे।
आयोगले नतिजा सार्वजनिक गर्दा उम्मेदवारको वर्णानुक्रमअनुसार गरेको थियो। त्यहाँ कृपाराम राना र गौरीशंकर थारुपछि जयप्रकाश चौधरीको नाम आउनुपर्थ्यो। तर, नरुलालको आयो। वर्णानुक्रममा नरुलाल चौथौमा आउनुपर्छ र जयप्रकाश तेस्रो नम्बरमा आउनुपर्छ। उम्मेदवारी दर्तामा जयप्रकाश अन्तिममा र नरुलाल तेस्रोमा थिए।
मतपरिणाम वर्णानुक्रम तर, नाम टाइप भने उम्मेदवारी अनुसार नै पर्न जाँदा गल्ती भएको अध्यक्ष सुब्बा बताउँछन्। समग्र परिणाम हेर्दा पनि आयोगको दाबी सही देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
