सौराहा (चितवन)– नेकपा एमालेको दशौं राष्ट्रिय महाधिवेशनको बन्द सत्रको तयारी चितवनको सौराहामा भइरहेको छ।
बिहान १० बजे भनिए पनि बन्द सत्र सुरु हुन समय लाग्ने देखिएको छ। सर्वसम्मत नेतृत्व चयन गर्नुपर्ने दबाब चौतर्फी रुपमा नेतृत्वलाई परेको छ।
एमाले अध्यक्ष केपी शर्मा ओलीले पनि बिहानैदेखि आफू निकटका नेताहरुसँग आन्तरिक छलफल गरिरहेका छन्। बन्द सत्र आयोजना हुने होटल सेभेन स्टार क्षेत्रमा पनि प्रतिनिधि र एमालेका नेता कार्यकर्ताहरूले सर्वसम्मत रुपमा नेतृत्व चयन गर्नुपर्ने भन्दै नाराबाजी गरिरहेका छन्।
बाँके जिल्लाबाट महाधिवेशनमा सहभागी हुन आएकी बसन्ती अधिकारी अहिलेको परिस्थितिमा सर्वसम्मत रुपमा नै नेतृत्व चयन हुनुपर्ने बताउँछिन्।
‘हामीले नेतृत्वलाई दबाब पनि दिइरहेका छौं। एकताको महाधिवेशन भन्ने सन्देश दिनका लागि पनि त्यो गर्नुपर्छ,’ उनी भन्छिन्, ‘अहिले मात्रै होइन तीनवटै तहको निर्वाचन नजिक आइरहेका बेला त्यसलाई पनि ध्यान दिनुपर्छ।’
बाँकेकै तेज भुसाल पार्टीको वडा र पालिका तहका अधिवेशन सर्वसम्मत गरिएको भन्दै केन्द्रीय नेतृत्व पनि सर्वसम्मत हुनुपर्ने बताउँछन्।
‘हामीले पार्टीको वडा, नगर अधिवेशन जसरी सम्पन्न गर्यौं, त्यो केन्द्रमा किन नहुने?,’ उनको प्रश्न छ, ‘अहिले सर्वसम्मत गरिएन भने झन् समस्या हुन्छ।’
महाधिवेशन भइरहेको जिल्लाका प्रतिनिधि कृष्णप्रसाद भुर्तेलले हिजोको उद्घाटन समारोहले नै अहिलेको नेतृत्व सर्वसम्मत चयन गर्नुपर्ने सन्देश दिइसकेको भन्दै त्यसमा सबै नेताहरु तयार हुनुपर्ने बताउँछन्।
नेकपा एमालेकी केन्द्रीय सदस्य निरुदेवी पाल पनि तलका सबै कमिटी सर्वसम्मत गर्न दबाब दिने नेतृत्वले केन्द्रीय कमिटी पनि त्यसै अनुसार चयन गर्नुपर्ने बताउँछिन्।
‘हामीले वडा र पालिका तहमा सर्वसम्मत गर्न दबाब दिएर त्यसै अनुसार निर्माण गर्यौं,’ उनले भनिन्।
युवा नेता बचनबहादुर सिंह संविधान कार्यान्वयन गर्ने जिम्मेवारी एमालेकै काँधमा रहेको भन्दै नेतृत्व पनि सर्वसम्मत गर्नुपर्ने बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
