काठमाडौं– ‘मसिनो हिसाबले परिणामुखी काम गर्छौं। तडकभडक गर्दैनौं,’ सोमबार सपथ ग्रहणपछि नवनियुक्त श्रम, रोजगार, तथा सामाजिक सुरक्षामन्त्री शेरबहादुर कुँवरले मन्त्रालयमा पदभार ग्रहण गर्दै भने।
रोजगारी प्रवर्द्धन गर्ने विषय महत्वपूर्ण भएको भन्दै मन्त्रालयले प्राथमिकताका साथ काम गर्ने उनको प्रतिबद्धता छ। उनले आफ्नो कार्यकालभर सामाजिक सुरक्षा, रोजगारी प्रवर्द्धनलगायत श्रम क्षेत्रमा देखिएका समस्या समाधानमा केन्द्रीत हुने पनि बताए।
नेकपा एकीकृत समाजवादीबाट मन्त्री हेरफेर भएपछि कुँवरले श्रम, रोजगार तथा सामाजिक सुरक्षामन्त्रीको जिम्मेवारी सम्हाल्ने अवसर प्राप्त गरेका हुन्। उनलाई पार्टीले शेरबहादुर देउवा नेतृत्वको मन्त्रिमण्डलमा गैरसांसदका रूपमा प्रतिनिधित्व गराएको छ।
गत जेठ २२ मा नै पार्टी केन्द्रीय सचिवालयको बैठकले सरकारमा रहेका मन्त्रीलाई फिर्ता बोलाएर नयाँ पठाउने निर्णय गरेको थियो। तर, पार्टीको आन्तरिक विवादले उक्त निर्णय तत्काल कार्यान्वयनमा आउन सकेन। निर्णय भएको २१ दिनपछि नयाँ मन्त्रीले नियुक्त हुने अवसर आइतबार प्राप्त गरे।
उनीहरूले सोमबार राष्ट्रपति कार्यालयमा सपथग्रहण पश्चात पदभार ग्रहण गरिसकेका छन्।
को हुन् मन्त्री कुँवर?
नवनियुक्त मन्त्री कुँवर सत्ता साझेदार दल नेकपा एकीकृत समाजवादीका केन्द्रीय सदस्य हुन्। उनी गत फागुन २० गतेसम्म राष्ट्रियसभा सदस्य थिए। तर, अहिले गैरसांसदका रुपमा मन्त्रिपरिषद् सदस्य बनेका हुन्।
उनको जन्म २०२३ वैशाख २६ गते अछामको चौरपाटी गाउँपालिका–४ मा भएको हो। उनका बुवा कर्णबहादुर र आमा वसुन्धरा हुन्। उनका श्रीमती, एक छोरा र एक छोरी छन्। उनले स्नातकोत्तरसम्मको अध्ययन गरेका छन्।
कुँवरले नेकपा मालेको विद्यार्थी संगठन अनेरास्ववियुबाट राजनीतिक यात्रा प्रारम्भ गरेका थिए। उनी २०४९ सालदेखि मात्र पार्टी राजनीतिमा आएका हुन्। नेकपा एमाले विभाजनपछि अहिले उनी नेकपा एकीकृत समाजवादीतर्फ लागेका छन्।
कुँवर पहिलो पटक २०३८ सालमा अनेरास्ववियुमा आबद्ध भएका थिए। २०४७ सालमा अनेरास्ववियु अछाम जिल्ला कमिटीको अध्यक्ष बने। त्यसबेला तत्कालीन माले र मार्क्सवादी मिलेर एमाले बनिसकेको थियो। उनी २०४९ सालमा पार्टी राजनीतिमा होमिँदा त्यही साल एमाले जिल्ला कमिटी सचिवालय सदस्यको जिम्मेवारी पाउन सफल भए।
२०५४ सालदेखि २०६२ सालसम्म जिल्ला कमिटी उपसचिव र २०६२ सालदेखि २०६६ सालसम्म जिल्ला कमिटी सचिव भए। एमालेको विधानअनुसार त्यतिबेला जिल्ला कमिटीको नेतृत्व सचिवले गर्ने गर्थे। पार्टी अध्यक्षात्मक प्रणालीमा गएपछि उनी २०६९ सालदेखि २०७५ सालसम्म जिल्ला कमिटी अध्यक्ष बने। नेकपा एमालेको राष्ट्रिय प्रतिनिधि परिषद् सदस्य रहिसकेका उनी २०७५ मा नेकपा एमाले र नेकपा माओवादी केन्द्रबीच एकीकरण भएर बनेको तत्कालीन नेकपाको सुदूरपश्चिम प्रदेश कमिटी सदस्य थिए।
जिल्लाको राजनीतिमा रहेका कुँवरको संसदीय यात्रा भने २०६४ सालबाट सुरु भएको हो। शान्ति प्रक्रियाबाट संसदीय राजनीतिमा आएको तत्कालीन नेकपा माओवादीले देशभर प्रभाव जमाउँदा उनी पहिलो संविधानसभा निर्वाचनमा अछाम–१ बाट निर्वाचित भएका थिए।
उनी संघीय संसद् राष्ट्रियसभा सदस्य निर्वाचन २०७४ सालमा सुदूरपश्चिम प्रदेशबाट निर्वाचित भएका थिए। राष्ट्रिय सभा सदस्य हुँदा उनी विधायन व्यवस्थापन समिति सदस्य थिए।
समाजसेवामा विशेष रुचि राख्ने मन्त्री कुँवर राजनीतिमा पूर्ण रुपमा लाग्नुअघि लेखा व्यावसायमा आबद्ध थिए। उनी विभिन्न आन्दोलनका क्रममा पटकपटक प्रहरी हिरासतमा बसेका छन्।
आगामी निर्वाचनमा भीम रावलसँग प्रतिस्पर्धा!
२०६४ सालको पहिलो संविधानसभा निर्वाचनमा उनी अछाम–१ बाट एमालेको उम्मेदवार भएर निर्वाचित भएका थिए, जुन क्षेत्रमा भीम रावल चुनाव लड्थे। त्यति बेला रावल समानुपातिकबाट संविधानसभा सदस्य बनेका थिए।
२०७८ भदौ २ मा नेता माधवकुमार नेपाल नेतृत्वमा एमालेबाट विभाजित भएर नेकपा एकीकृत समाजवादी गठन भएपछि उनी त्यतै लागेपछि अब प्रत्यक्षमा उम्मेदवार बन्नसक्ने अनुमान गरिएको छ। उनलाई उम्मेदवार बनाउन नै मन्त्री बनाइएको बताइन्छ।
यदि, एमालेले रावललाई उम्मेदवार बनाए सो क्षेत्रमा यी दुई नेताको प्रतिश्पर्धा हुनेछ। २०७४ सालको संसदीय निर्वाचनमा रावल सो क्षेत्रबाट निर्वाचित भएका थिए। तर, एमाले अध्यक्ष केपी ओलीसँगको टसलका कारण एमालेले रावललाई उम्मेदवार बनाउने निश्चित चाहिँ छैन।
एमालेका झपट रावल पनि सो क्षेत्रबाट टिकटका आकांक्षी हुन्। उनी एमाले विभाजनका बेला रावललाई साथ दिँदै एमालेमै बसेका थिए। एमालेले रावललाई समानुपातिकमा राखेर बोहोरालाई टिकट दिने पनि धेरैको अनुमान छ।
उता एकीकृत समाजवादीमा मन्त्री कुँवरसँगै कुलबहादुर कुँवर पनि संभावित उम्मेदवार हुन्। नेपाली कांग्रेसबाट भने गोविन्दबहादुर शाह र भरत स्वाँर टिकटको प्रतिश्पर्धामा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751037173.png)
-1751036182.jpeg)
-1749826086.png)
