काठमाडौं– नेपालको वैदेशिक व्यापारमा सुधार देखिएको छ। नेपाल राष्ट्र बैंकले मंगलबार प्रकाशित गरेको आर्थिक वर्ष २०७८/७९ को पहिलो तीन महिनाको तथ्यांकअनुसार नेपालको निर्यातको अवस्था सुदृढ भएको उल्लेख छ।
चालु आर्थिक वर्षको तीन महिनामा कुल वस्तु निर्यात १०९.५ प्रतिशतले वृद्धि भई ६५ अर्ब ५ करोड पुगेको तथ्यांकमा उल्लेख छ। अघिल्लो वर्षको सोही अवधिमा यस्तो निर्यात १४.३ प्रतिशतले मात्र वृद्धि भएको थियो।
यो अवधिमा भारत, चीन तथा अन्य मुलुकतर्फ भएको निर्यातसमेत क्रमशः १४७.१ प्रतिशत, १९.४ प्रतिशत र २७.२ प्रतिशतले वृद्धि भएको छ। त्यसैगरी, वस्तुगत आधारमा सोयाविन तेल, पाम तेल, पिना, धागो (पोलिष्टर तथा अन्य), जुटका सामानलगायतका वस्तुको निर्यात बढेको छ। सो अवधिमा चिया, अलैंची, जस्तापाता, तार, आयुर्वेदिक औषधीलगायत वस्तुको निर्यात भने घटेको छ।
समीक्षा अवधिमा कुल वस्तु आयात भने ६३.७ प्रतिशतले वृद्धि भएको छ। सो अवधिमा ४ खर्ब ७८ अर्ब ५२ करोड रुपैयाको विभिन्न सामग्री आयत भएको तथ्यांक छ। अघिल्लो वर्षको सोही अवधिमा यस्तो आयात १२.७ प्रतिशतले घटेको थियो।
भारत, चीन तथा अन्य मुलुकबाट भएको आयात क्रमशः ४८.४ प्रतिशत, ५५.२ प्रतिशत र १२४.२ प्रतिशतले वृद्धि भएको छ। वस्तुगत आधारमा पेट्रोलियम पदार्थ, यातायातका साधन तथा पार्टपुर्जा, कच्चा सोयाविन तेल, कच्चा पाम तेल, सुन लगायतका वस्तुको आयात बढेको छ। सिमेन्ट, रासायनिक मल, दाल, मोलासिस सुगर, सुर्ती लगायतका वस्तुको आयात भने घटेको छ।
चालु आवको पहिलो तीन महिनामा कुल वस्तु व्यापार घाटा ५८.३ प्रतिशतले वृद्धि भई ४ खर्ब १३ अर्ब ४७ करोड रुपैयाँ पुगेको छ। अघिल्लो वर्षको सोही अवधिमा यस्तो घाटा १५.१ प्रतिशतले घटेको थिया ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
