काठमाडौं– इन्धनको मूल्य वृद्धिको विरोधमा आन्दोलनमा रहेका विद्यार्थी संगठन र सरकार (उद्योग वाणिज्य तथा आपूर्ति मन्त्रालय र नेपाल आयल निगम)बीचको वार्ता असफल भएको छ।
आयल निगमले अहिलेकै अवस्थामा (घाटामाथि घाटा बेहोर्ने गरी) इन्धनको मूल्य घटाउन नसकिने बताएपछि सोमबारको वार्ता असफल भएको हो।
इन्धनमा भएको मूल्यवृद्धिविरुद्ध आन्दोलनरत विद्यार्थी संगठन र आयल निगम तथा मन्त्रालयका अधिकारीहरुबीच सोमबार उद्योग वाणिज्य तथा आपूर्ति मन्त्रालयमा वार्ता भएको थियो। वार्तामा विद्यार्थी संगठनहरुले पछिल्लो समय गरिएको मूल्यवृद्धि फिर्ता हुनुपर्ने अडान राखेका थिए।
निगमले भने पछिल्लो समय गरिएको मूल्यवृद्धि पछि पनि निगमलाई मासिक ५ अर्ब २० करोड रुपैयाँ घाटा हुने अवस्था रहेकाले मूल्य घटाउन नसिकने बताएको थियो।
वार्तामा वाणिज्य तथा आपूर्ति सचिव दिनेश भट्टराईले घाटा मिलानको लागि आफूले प्रधानमन्त्री र मुख्य सचिवसँग कुरा गर्ने र सकारात्मक जवाफ आए मूल्य घटाउन सकिने बताएका थिए।
आयल निगमका सहायक प्रवक्ता पुष्कर कार्कीले सरकारले घाटा मिलानको लागि सकारात्मक जवाफ दिए पछिल्लो समय बढाइएको मूल्य घटाउन सकिने भनेर वार्तामा छलफल भएको जानकारी दिए।
'विद्यार्थी संगठनले इन्धनको बढाइएको मूल्य फिर्ता नै आफूहरुको १ सुत्रीय माग भएको बताउनुभयो। तर, उहाँहरुले भनेअनुसार निगमले चाहेर मात्रै मूल्य घटाउन सिकने अवस्था छैन भनेर निगमका तर्फबाट कुरा राखियो,' कार्कीले नेपाल लाइभसँग भने, 'सचिब ज्यूले आज (सोमबार) साँझसम्म प्रधानमन्त्री ज्यू र मुख्य सचिव ज्यूसँग छलफल गर्ने भन्नुभएको छ। प्रधानमन्त्री र मुख्यसचिव ज्यूले घाटा मिलानका विषयमा सकारात्मक जवाफ दिए बढेको मूल्य फिर्ता हुन्छ भन्ने कुरा राख्नुभयो।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
