काठमाडौं- नेकपा (एमाले)का अध्यक्ष केपी शर्मा ओलीले बुधबार १० बुँदे सहमतिको पूर्ण कार्यान्वयन आवश्यक नरहेको अभिव्यक्ति दिए। बुधबार एमाले बागमती प्रदेश कमिटीको बैठकमा सम्बोधन गर्ने क्रममा ओलीले १० बुँदेको सन्दर्भलाई एकतारेसँग तुलना गर्दै त्यसलाई बजाउनु आवश्यक नभएको बताए।
ओलीको यो अभिव्यक्तिले एमालेमा १० बुँदे सहमतिलाई अक्षरश कार्यान्वयन हुनुपर्ने माग राखिरहेका नेताहरुलाई सशंकित बनाएको छ। पार्टीको विधान महाधिवेशनलगत्तै बसेको स्थायी कमिटी बैठकमा पनि यस विषयलाई नेताहरुले उठाएका छन्। पार्टी अध्यक्षले दिएको अभिव्यक्तिले एमालेभित्र एक खालको तरङ्ग ल्याएको छ।
माधवकुमार नेपालले पार्टी विभाजन गर्ने निर्णय लिँदा साथ नदिएर एमालेमै रहेका नेताहरु ओलीको पछिल्लो अभिव्यक्तिले सशङ्कित बनेका छन्।
‘उहाँ (अध्यक्ष)ले मिनिमाइज गर्ने, पेलेर जाने र हल्का रुपमा लिएको देखिन्छ,’ एमालेका एक नेता भन्छन्, ‘जे-जस्तो विषयमा बाहिर आए पनि छलफल गर्दै त्यसलाई सन्तुलनमा पुर्याउनुपर्छ।’
ओलीको अभिव्यक्तिलाई लिएर एमाले उपाध्यक्ष भीम रावल र उपमहासचिव घनश्याम भुसालले सामाजिक सञ्जालमार्फत् प्रतिक्रिया जनाएका थिए। उपाध्यक्ष रावलले १० बुँदे सहमति ‘एकतारे’ नभइ पार्टी एकता बचाएर देशहितको लागि बजाइएको ११ तारे विगुल भएको जवाफ ओलीलाई दिएका छन्।
बिहीबारको पार्टीको स्थायी कमिटीको बैठक र सामाजिक सञ्जालमार्फत् नै नेताहरुले १० बुँदे कार्यान्वयनको विषयमा कुरा उठाएपछि भने यसमा ओली छलफल गर्न तयार देखिएका छन्।
एमालेका तत्कालीन वरिष्ठ नेता माधवकुमार नेपाल समूहले पार्टी विभाजन गर्नुअघि पार्टी एकता कायम राख्न भन्दै १० बुँदे सहमति गरिएको थियो। तर, नेता नेपालले पार्टी विभाजन गरी नेकपा (एकीकृत समाजवादी) पार्टी गठन गरिसकेका छन्।
नेता नेपाललाई छाडेर ओलीसँग एमालेमै फर्केका उपाध्यक्ष रावललगायत नेताहरुले १० बुँदे सहमति कार्यान्वयन गर्नुपर्नेमा जोड दिँदै आएका छन्। अध्यक्ष ओली भने त्यसमा सकारात्मक थिएनन्।
बिहीबारको पार्टीको स्थायी कमिटीको बैठक र सामाजिक सञ्जालमार्फत् नै नेताहरुले १० बुँदे कार्यान्वयनको विषयमा कुरा उठाएपछि भने यसमा ओली छलफल गर्न तयार देखिएका छन्।
बिहीबार स्थायी कमिटीको बैठक बस्नुअघि १० बुँदे सहमति कार्यान्वयन गर्न गठित कार्यदलको बैठक बसेको थियो।
एमाले प्रवक्ता प्रदीप ज्ञवालीले अध्यक्ष ओलीको अभिव्यक्तिलाई बचाऊ गर्दै १० बुँदे ९५ प्रतिशत क्षेत्रमा कार्यान्वयनको तहमा गइसकेको भन्दै पुनः १० बुँदेलाई सर्त बनाएर अघि बढ्नु आवश्यक नरहेको बताएका थिए।
‘धेरै ठाउँमा पूर्णरुपमा सहमति कार्यान्वयनमा गइसकेको छ। केही ठाउँमा बाँकी रहेको ठाउँमा पनि कार्यदलले रचनात्मक हिसाबले टुंगो लगाउने भन्ने छ,' बिहीबार स्थायी कमिटी बैठकपछि उनले भने।
बिहीबार बसेको एमाले स्थायी कमिटी बैठक।
बिहीबारको बैठक विधान महाधिवेशनको समीक्षा तथा १०औं राष्ट्रिय महाधिवेशनका बारेमा नै केन्द्रित भएको थियो। एमालेको बिहीबारदेखि सुरु भएको स्थायी कमिटीको बैठकको मुख्य अजेन्डा वडा र पालिका अधिवेशन, विधान महाधिवेशनको समीक्षा लगायतका विषयमा नै केन्द्रित थियो। तर, बुधबार एमाले अध्यक्ष ओलीले १० बुँदे सहमतिका विषयमा दिएको अभिव्यक्तिले एमालेमा तरङ्ग ल्यायो।
नेताहरुले यस विषयमा सार्वजनिक रुपमा नै आफ्नो असन्तुष्टि जनाए। बिहीबारको स्थायी कमिटी बैठकमा पनि यस विषयले प्रवेश पायो। १० बुँदेको विषय उठेपछि एमालेको स्थायी कमिटी बैठकमा यो विषयले अजेण्डाकै रुपमा प्रवेश पाएको हो।
‘१० बुँदे सहमति र अपानि १२ को कार्यान्वयनका विषय पनि बैठकको अजेण्डाका रुपमा राखिएको छ,’ एक स्थायी कमिटी सदस्यले भने, ‘भोलिको बैठकमा प्रस्ट रुपमा बृहत् छलफल हुन्छ।’
पार्टी विभाजन गर्ने माधव नेपालको निर्णयलाई साथ नदिएर एमालेमै रहेका नेताहरुले भने नेतृत्वबाट पार्टीलाई एकताबद्ध बनाएर लैजानेभन्दा पनि गुटका रुपमा नै विकास गर्न खोजिएको बताउँदै आएका छन्।
नेतृत्वले कात्तिक ६ गते देशैभर वडा तहको अधिवेशन र कात्तिक ९ गते पालिका अधिवेशन गर्ने निर्णयमा पनि माधव नेपाल छोडेर एमालेमै रहेका नेताहरुको असन्तुष्टि छ। एमाले उपाध्यक्ष एवं बागमती प्रदेशकी मुख्यमन्त्री अष्टलक्ष्मी शाक्यले पनि यस विषयमा बुधबार बागमती प्रदेश कमिटीको बैठकमा असन्तुष्टि प्रकट गरेकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768049575.png)
-1764146706.png)
