काठमाडौं– स्वीडेनका कलाकार लार्स विल्क्सको सडक दुर्घटनामा मृत्यु भएको छ। उनी एक विवादित कार्टुनका कारण विश्वभर नै चर्चमा आएका थिए। उक्त कार्टुनमा उनले एउटा कुकुरको शरीर बनाएका थिए, जसमा पैगम्बर मोहम्मदको टाउको जोडेका थिए।
विल्क्स सवार रहेको प्रहरीको सवारी साधन दक्षिणी स्वीडेनस्थित मारकरद शहरमा एक ट्रकसँग ठोक्किएको थियो। उक्त दुर्घटनामा दुई प्रहरीको पनि मृत्यु भएको छ भने ट्रक ड्राइभर पनि घाइते भएका बीबीसीले जनाएको छ।
विल्क्स ७५ वर्षका थिए। पैगम्बर मोहम्मदको कार्टुन बनाएपछि उनलाई कैयौं धम्की आएको थियो, जसकारण उनलाई प्रहरीको सुरक्षा प्रदान गरिएको थियो। विल्क्सले बनाएको त्यो कार्टुन सन् २००७ मा छापिएको थियो।
उक्त कार्टुनका कारण कैयौं मुसलमान समूदायका मानिसहरु उनीसँग रिसाएका भएका थिए। उनीहरुको नजरमा पैगम्बरको चित्र बनाउनु भनेको उनको निन्दा गर्नु हो।
डेनमार्कको एक पत्रिकाले पैगम्बर महोम्मदको कार्टुन प्रकाशित गरेको थियो। उक्त पत्रिकामा छापिएको कार्टुनलाई व्यंग्यात्मक पत्रिका ‘चार्लि हेब्दो’मा छापिएको थियो।
विल्क्सको मृत्युलाई लिएर प्रहरीले दुर्घटनाको कारण पत्ता लगाउन नसकेको बताएको छ। सुरुवाती अनुसन्धानमा उक्त दुर्घटना हुनुमा कसैको पनि भूमिका नरहेको देखिएको प्रहरीले जनाएको छ।
समाचार एजेन्सी एएफपीसँग कुराकानी गर्दै प्रहरीका प्रवक्ताले भनेका छन्, ‘यो दुर्घटनालाई पनि अन्य सडक दुर्घटना जस्तै अनुसन्धान गरिएको छ। दुई प्रहरीको पनि मृत्यु भएको छ। यो अनुसन्धानको जिम्मा विशेष शाखालाई दिइएको छ।’
सँगै ती प्रहरी प्रवक्ताले दुर्घटनामा कसैको पनि भूमिका नरहेको देखिएको जनाएका छन्।
स्थानीय मिडियामा आएका समाचारका अनुसार प्रहरीको गाडी तिव्र गतिमा कुदिरहेको थियो। दुर्घटनाका प्रत्यक्षदर्शीले ‘अफटोनब्लैडेट’ नामक स्थानीय सञ्चारमाध्यमसँगको कुराकानीमा तिव्र गतिका कारण विल्क्सको गाडिको सन्तुलन बिग्रिएर सडकको अर्को लेनमा पुगेको थियो। सामुन्नेबाट आइरहेको ट्रकले रोक्न समय नपाउँदा दुई गाडिबीच ठक्कर भएको उनल बताएका छन्।
विल्क्सले सन् २००७ मा बनाएको कार्टुनलाई लिएर विश्वभर नै उनीविरुद्ध आवाज उठेका थिए। स्वीडेनका तत्कालीन प्रधानमन्त्री फ्रेडरिक रेनफेल्डले विल्क्सको कार्टुनले सिर्जना गरेको विवादलाई साम्य पार्न २२ मुसलमान देशका राजदूतसँग भेटवार्ता गरेका थिए।
यसको केही दिनपछि इराकमा सक्रिय अल–कायदाले विल्क्सको ज्यान मार्नेलाई एक लाख अमेरिकी डलर पुरस्कार दिने घोषणा गरेको थियो।
सन् २०१५ मा विल्क्स कोपनहेगनमा भएको एक अभिव्यक्ति स्वतन्त्रतासम्बन्धी कार्यक्रममा भाग लिन पुगेका थिए, जहाँ उनीमाथि गोलीबारीसहित हमला भएको थियो। तब विल्क्सले पनि हमलाको शिकार आफू नै भएको बताएका थिए।
विल्क्सले मोहम्मदको कार्टुनकै कारण सबैभन्दा धेरै चर्चा कमाए। उनी यस्तो कलाकार थिए, जो आफ्नो चित्रकलामार्फत अधिकारको कुरा गर्थे।
उनले दक्षिणी स्वीडेनको एक संरक्षित क्षेत्रमा बिना अनुमति केही युवतीको मुर्ती बनाएका थिए। उक्त घट्नालाई लिएर विल्क्सले लामो समय कानुनी संघर्ष गर्नु परेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791363924.png)
-1786602170.png)
