चोभारको सुख्खा बन्दरगाह सञ्चालनको तयारी

अर्थ समाचार

नेपाल लाइभ आइतबार, असोज १७, २०७८ १३:१५

काठमाडौं- चोभारमा निर्माण गरिएको सुख्खा बन्दरगाह सञ्चालनको अन्तिम तयारी गरिएको छ।

नेपाल इन्टरमोडल यातायात विकास समितिको कार्यकारी निर्देशक आशिष गजुरेलले सुख्खा बन्दरगाहको निर्माणका काम सम्पन्न भएकाले बन्दरगाह सञ्चालनको लागि तयारी गरिरहेको बताए। आइतबार बिहान न्यूज एजेन्सी नेपालसँग कुरा गर्दै कार्यकारी निर्देशक गजुरेलले बन्दरगाहमा सञ्चालनका लागि भन्सार कार्यालय, क्‍वारेन्टिन, बैंक, सुरक्षा निकायलगायतका सम्बन्धित निकायसँग छलफल भइरहेको भन्दै उनले चाँडै नै पूर्ण तयारीका साथ सञ्चालनमा ल्याउन लागिएको उनले बताए।

सुख्खा बन्दरगाह सुरु भएसँगै काठमाडौंको व्यवसायीहरुले सिधै काठमाडौंमा सामान ल्याउनसक्ने र छिट्टै उपभोक्ताको माझमा पुर्‍याउन सकिने तथा आयात, निर्यातको मूल्य घटाउन सकिने उनले उल्लेख गरे। उनले भने, ‘अहिले हामी यसको सञ्चालनको लागि तयारीको अवस्थामा छौँ। र हामी चाँडै नै यसलाई सञ्चालन गर्ने भनेर अगाडि बढिराखेको छौँ। यसको लागि यहाँको सम्बन्धित निकाय भनेको भन्सार कार्यालय, क्‍वारेन्टिन, बैंक, सेक्युरिटी, पोर्ट सञ्चालनका लागि सञ्चालक हुनुभयो यति सबै जनाको सहकार्यमा हामीबीच छलफल पनि भइराखेको छ र चाँडै नै हामी तयारी पूरा गरेर यसलाई सञ्चालनमा ल्याउने हिसाबले काम अगाडि बढाइरहेका छौँ।’

चोभारस्थित २२० रोपनी जग्गाको क्षेत्रफलमा एक अर्ब ६० करोड रुपैयाँको लगानीमा सुख्खा बन्दरगाह बनेको हो। यसभित्र दुई वटा गेट, तीन वटा धर्मकाँटा, भन्सार, क्‍वारेन्टिन र प्रशासनिक गरी तीन वटा भवन, तीन वटा ठूला गोदाम, चेकजाँच गर्ने तीन वटा खुल्ला भवन, ५०० वटा कन्टेनर राख्नसक्ने कन्टेनर यार्ड, ५०० ट्रक व्यवस्थापन गर्न सकिने पार्किङस्थल निर्माण सम्पन्न भइसकेको कार्यकारी निर्देशक गजुरेलले जानकारी दिए। सीसीटीभी जडान र फायर फाइटरसमेत जडान गरिसकेको उनले बताए।

भारत र चीनसँग सिमा जोडिएको जिल्लाहरुमा मात्रै सुख्खा बन्दरगाह भए पनि भित्री जिल्लामा भने चोभारको सुख्खा बन्दरगाह पहिलो हो। वीरगञ्ज, विराटनगर, भैरहवा, काँकडभिट्टा, तातोपानीमा सुख्खा बन्दरगाह सञ्चालनमा छन् भने रसुवा र नेपालगञ्जमा पनि निर्माणाधिन अवस्थामा रहेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

स्थिर सरकार बने मात्र राजनीतिक स्थायित्व हासिल गर्न सकिन्छ : महासचिव पोखरेल

चीन अमेरिकासँग 'जस्तोसुकै युद्ध'का निम्ति तयार

जनकपुरमै पांग्रा छोडेर बुद्ध एयरको जहाज काठमाडौं अवतरण गरेपछि छानबिन सुरु