तथ्यांकमा आधारित भएर शासन गर्नु नै सुशासन हो : उपाध्यक्ष डा. पौडेल

अर्थ समाचार

नेपाल लाइभ शुक्रबार, असोज १५, २०७८ १९:१८

काठमाडौं- राष्ट्रिय योजना आयोगका उपाध्यक्ष डा. विश्वनाथ पौडेलले सरकारले तथ्यांक संकलनको कामलाई गम्भीरतापूर्वक अगाडि बढाइरहेको बताएका छन्।

उपाध्यक्ष पौडेलले मुलुकलाई सुशासनको बाटोबाट अगाडि बढाउन पनि सरकारले तथ्यांक संकलनको कामलाई प्राथमिकताका साथ अघि बढाएको तर्क गरे।

नेपाल उद्योग परिसंघले शुक्रबार काठमाडौंमा सार्वजनिक गरेको ‘इन्डस्ट्री स्टेटस रिपोर्ट’को सार्वजनिक गर्दै उनले केन्द्रीय तथ्यांक विभागलाई पनि यथार्थमा आधारित तथ्यांक संकलनको काममा जोड दिन सचेत गराए। उपाध्यक्ष पौडेलले तथ्यांकमा आधारित भएर शासन गर्नु नै सुशासन भएको स्मरण गराउँदै त्यस काममा उद्योगी व्यवसायीहरुको पनि ध्यान जानुपर्नेमा जोड दिए।

‘तथ्यांकमा आधारित भएर शासन गर्नु नै सुशासन हो। हुकुमी शासनमा मात्रै तथ्यांकहरुको जरुरी पर्दैन। तथ्यांकमा आधारित भएर काम गर्नु भनेको राम्रो हो। म तथ्यांक विभागलाई पनि बल गरेर तथ्यांकको काम गर्न आग्रह गर्दछु,’ उनले भने।

कार्यक्रममा बोल्दै नेपाल उद्योग परिसंघका पूर्वअध्यक्ष सतीश मोरले उद्योग व्यवसाय सञ्‍चालनका लागि विद्युतमा लगाइएको महशुल दर घटाउन सरकारसँग माग गरे। उनले विद्युत महशुल घटाउने काम सरकारले गरे नेपालको निर्यात व्यापारसमेत बढेर जाने स्पष्ट पारे। पूर्वअध्यक्ष मोरले विद्युत् महशुल सहुलियत दरमा सरकारले व्यवस्था गर्न नसक्दा नेपालले आयातित वस्तुमा निर्भर हुनुपर्ने अवस्था आएकोतर्फ पनि सरकारको गम्भीर ध्यानाकर्षण गराए।

परिसंघले औद्योगिक क्षेत्रको विकासका लागि सरकारले उद्योगधन्दा सञ्‍चालनका लागि उपयुक्त वातावरण निर्माण गर्नुपर्ने आवश्यक्ता औंल्याउँदै आएको उनले बताए। मुलुकको व्यापार घाटा कम गर्न र बेरोजगारी समस्या समाधान गर्न पनि सरकारले उद्योग व्यवसायमैत्री वातावरण निर्माणमा ढिलाइ गर्न नहुने पूर्वअध्यक्ष मोरको भनाइ थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

स्थिर सरकार बने मात्र राजनीतिक स्थायित्व हासिल गर्न सकिन्छ : महासचिव पोखरेल

चीन अमेरिकासँग 'जस्तोसुकै युद्ध'का निम्ति तयार

जनकपुरमै पांग्रा छोडेर बुद्ध एयरको जहाज काठमाडौं अवतरण गरेपछि छानबिन सुरु