काठमाडौं– केन्द्रका शीर्ष नेता र जिल्ला पार्टी नेतृत्वको फरक मतको समेत बेवास्ता गर्दै नेपाली कांग्रेसका सभापति शेरबहादुर देउवाले गृहजिल्ला डडेल्धुरामा वडा अधिवेशन गराएका छन्।
वरिष्ठ नेता रामचन्द्र पौडेल, उपसभापति विमलेन्द्र निधि, महामन्त्री डा शशांक कोइराला, नेताहरु प्रकाशमान सिंह, अर्जुन नरसिंह केसी, डा शेखर कोइराला, डा मिनेन्द्र रिजाल र जीवन परियारले डडेल्धुराको अधिवेशन स्थगित गर्न देउवालाई आग्रह गरेका थिए। यही आग्रह कांग्रेसका डडेल्धुरा जिल्ला सभापति कर्णबहादुर मल्लले पनि गरेका थिए। तर, ती सबैलाई बेवास्ता गरेर देउवाले अधिवेशन गरेरै छाड्ने मूड बनाए।
क्रियाशील सदस्यता विवादकै वीच डडेल्धुराका ५२ वडामा शुक्रबार वडा अधिवेशन भइरहेको छ। सत्ता र शक्तिको दुरुपयोग गरेर वडा अधिवेशन भइरहेको कांग्रेस डडेल्धुराका सभापति मल्लले बताए। ‘आज भइरहेको वडा अधिवेशनका लागि जिल्ला बाहिरबाट सुरक्षाकर्मी ल्याएर वडा/वडामा भरिएको छ’, उनले भने।
वडा अधिवेशन र त्यसक्रममा हुने निर्वाचन निष्पक्ष र धाँधलीरहित नहुनेमा पौडेलपक्षले आशंका व्यक्त गरेको छ। शुक्रबार बिहान मात्रै पौडेलपक्षका नेताहरु बालुवाटार पुगेर देउवालाई भेटेका थिए। ‘पार्टीको महाधिवेशनमा राज्यको पुलिस र प्रशासनको दुरुप्रयोग हुन नपाओस् भनेर ध्यानाकर्षण गरायौं’, देउवासँगको भेटबारे पौडेलले भने।
पौडेल पक्षका नेताहरुले बिहीबार पनि देउवालाई भेटेका थिए। क्रियाशील सदस्यता विवाद रहेकाले डडेल्धुराको वडा अधिवेशन रोक्न पौडेलपक्षले देउवासँग माग गरेको थियो। त्यसअघि उपसभापति निधिले सभापति देउवालाई पत्र लेखेर डडेल्धुराको वडा अधिवेशन रोक्न माग गरेका थिए। ‘गम्भीर विवादको समाधान नगरी अधिवेशन र निर्वाचन गराउनु सर्वथा अनुचित’ हुने निधिले पत्रमा उल्लेख गरेका छन्। क्रियाशील सदस्यता सम्बन्धी विवाद समाधान गरेर मात्र अधिवेशन र निर्वाचनको कार्यसम्पन्न गर्न उनको माग थियो।
पार्टी विधान तथा निर्देशिकाका सबै प्रक्रिया पु¥याएर जिल्लाबाट पठाइएका नामावली हटाइएको र केन्द्रबाट नाम थपिएको भन्दै डडेल्धुरामा सदस्यताको विवाद निम्तिएको थियो। जिल्ला सभापति मल्लले केन्द्रबाट सिधै अन्य नाम थपिएको बताए। प्रधानमन्त्रीसमेत रहेका पार्टी सभापतिको जिल्लामा विवादकैबीच एकपक्षीय रुपमा अधिवेशन गरिनु बिडम्बना भएको उनले बताए।
मल्लका अनुसार जिल्लामा भएको विवाद निरुपण नभएपछि निर्वाचन समितिलाई लिखित जानकारी गराइएको थियो। तर, त्यसको सुनुवाई भएन। समायोजन, नयाँ वितरण र नवीकरण गरिएका सहित ५ सय बढी क्रियाशील सदस्यतामा विवाद रहेको मल्लले बताए। निर्वाचन समितिका सदस्य तेज रावल भने डडेल्धुरामा विवाद नै नरहेको दाबी गर्छन्। उनले नेपाल लाइभसँग भने, ‘निर्वाचन अधिकृतले वडा अधिवेशन गर्न लागेपछि सहभागी हुन मन नलाग्नेहरु आउँदैनन्।’
पार्टी केन्द्रले वडा अधिवेशन नगर्ने निर्णय नगर्दासम्म निर्वाचन समितिले स्थगित गर्न नमिल्ने रावलले बताए। डडेल्धुरामा जिल्ला सभापति मल्ल पक्षको अधिवेशन बहिष्कार गर्ने कार्यले १० प्रतिशत मतदातामा प्रभाव पर्ने नेपाल विद्यार्थी संघका पूर्व अध्यक्ष नैनसिंह महर बताउँछन्। वडा अधिवेशनका लागि गृहजिल्ला पुगेका महरले नेपाल लाइभसँग भने, ‘कर्णबहादुर मल्लले राखेको माग कांग्रेसले पुरा गर्न नसक्ने खालको छ। तल्लो तहको सिफारिसविना पनि उनले नाम पठाएका थिए।’ क्रियाशील सदस्यता छानविन समितिका संयोजक रमेश लेखकसँगको परामर्शमा सहमति भइसकेको विषयलाई पनि मल्लले उठाएको महरको आरोप छ।
जिल्लाका कुनै निकायमा थाहा नै नभएका ३१२ जनाको नाम केन्द्रबाट संस्थापन पक्षले थपेको संस्थापनइतरको दाबी छ। प्रक्रियासंगत आएका नाम हटाएर अरु नाम थप्नु लोकतान्त्रिक प्रक्रिया हुनै नसक्ने नेता डा शेखर कोइराला बताउँछन्। डडेल्धुरा घटनाले झस्काएको बताउँदै डा. शेखरले प्रश्न गरे, ‘यो (डडेल्धुरा विवाद) कतै नेपाली कांग्रेसको महाधिवेशन नगर्ने बहाना त हैन ?’ डडेल्धुरा घटनाले महाधिवेशनको प्रक्रिया पुरा हुनेमा आशंका उब्जिएको उल्लेख गर्दै उनले भने, ‘साथीहरु सबै सचेत बनौं। आ–आफ्नो स्थानबाट विरोध गरौं।’
सभापतिकै जिल्लामा क्रियाशील सदस्यताको विवाद हुनु र जिल्ला सभापतिले वहिष्कार गर्नुमा व्यक्तिगत ‘इगो’ पनि प्रमुख कारण रहेको छ। कांग्रेस सभापति देउवापत्नी डा. आरजु राणाका कारण देउवासँग जिल्ला सभापति मल्ल टाढिएको बताइन्छ। विगतमा देउवाका ‘विश्वासपात्र’ रहेका मल्लको राणाकै कारण देउवासँग दूरी बढेको बताउँदै एक नेताले भने, ‘संस्थापनइतर पक्षमा रहेका मल्ल जिल्लामा संस्थापन पक्षको विरोधमा बोल्दै आएका छन्।’
मल्ललाई जिल्लामा कमजोर बनाउनकै लागि देउवाले जबरजस्ती वडा अधिवेशन गराएको आरोप लागेको छ। देउवाको यस्तो जोडबल किन पनि छ भने उनले डडेल्धुराको राजनीतिमा आफ्ना पुत्र जयबीरसिंह देउवालाई स्थापित गराउने प्रयास गरेका छन्। जयवीरसिंहले डडेल्धुराको गन्यापधुरा गाउँपालिका–१ बाट क्रियाशील सदस्यता लिएका छन्।
संस्थापनइतरलाई ‘पेल्न’कै लागि निर्वाचन अधिकृत संस्थापन पक्षबाट खटाइएको बुझाई कांग्रेसवृत्तमा छ। देउवापक्षीय लोकेन्द्र बहादुर बमलाई निर्वाचन अधिकृत बनाइएको छ। उनले जिल्ला सभापतिसँग परामर्श नगरी वडा अधिवेशनको मिति तोकेको मल्लको भनाई छ। जिल्ला सभापति मल्लले वडा अधिवेशन स्थगन गर्ने निर्णय गरेपछि बमले अधिवेशन तोकिएकै समयमा हुने भनेर विज्ञप्ति निकालेका थिए।
डडेल्धुराको विवाद यतिसम्म चर्को बनेको छ कि निर्वाचन समितिका संयोजक महादेव यादवले पदबाट राजीनामा घोषणा गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
