काठमाडौं– 'गुण्डा नाइके' पर्शुराम बस्नेतले सम्पत्ति शुद्धीकरणको मुद्दामा सर्वोच्च अदालतबाट सफाइ पाएका छन्।
सर्वोच्च अदालतका न्यायाधीशद्वय दीपककुमार कार्की र टंकबहादुर मोक्तानको इजलासले बस्नेतलाई सफाइ दिने फैसला सुनाएको हो।
यसअघि विशेष अदालतले पनि बस्नेतविरुद्धको अभियोग पुष्टि नहुने भन्दै सफाइ दिने फैसला सुनाएको थियो। सर्वोच्चले पनि विशेषको फैसला सदर गरेको हो।
गैरकानुनी गतिविधिबाट आर्थिक लाभ लिइ सम्पत्ति आर्जन गरेको अभियोगमा सम्पत्ति शुद्धीकरण अनुसन्धान विभागले शुरुमा विशेष अदालतमा मुद्दा दायर गरेको थियो।
विशेष अदालतले सफाइ दिएपछि त्यसविरुद्ध सरकारीपक्ष सर्वोच्चमा पुगेको थियो। सरकारी पक्षले २०७५ असार १५ गते सर्वोच्चमा पुनरावलोकन दर्ता गराएको थियो।
सम्पत्ति शुद्धीकरणको मुद्दामा प्रतिवादी बनाइएका ५ जनामध्ये विशेषले गणेश लामालाई मात्र दोषी ठहर गर्दै अन्यलाई सफाइ दिएको थियो।
सम्पत्ति शुद्धीकरण ऐन आउनुभन्दा पहिले सम्पत्ति आर्जन गरेको देखिएको भन्दै विशेषले लामा बाहेक अन्य सबैलाई सफाइ दिइएको थियो।
सम्पत्ति शुद्धीकरण अनुसन्धान विभागले प्रहरीको केन्द्रीय अनुसन्धान ब्यूरो (सीआईबी)को अनुसन्धानमा आधारित भएर २०७० साल जेठ ५ गते बस्नेतसहित पाँच जना गुण्डा नाइकेविरुद्ध विशेष अदालतमा मुद्दा दायर गरेको थियो। अवैधानिक गतिविधिबाट सम्पत्ति आर्जन गर्ने, व्यक्तिलाई धम्काएर असुल गर्ने र उक्त सम्पत्ति वैधानिक बनाउन विभिन्न स्थानमा लगानी गरेको दाबी विभागले गरेको थियो।
विशेष अदालतमा मुद्दा दर्ता गर्दा सम्पत्ति शुद्धीकरण अनुसन्धान विभागले ५ जनालाई प्रतिवादी बनाएपनि सर्वोच्च अदालतमा भने ४ जनाको विरुद्धमा मात्रै पुनारावलोकन दर्ता भएको थियो।
गण्डकी प्रदेशका प्रदेश सभा सदस्य एवं खेलकुदमन्त्री रहेका दीपक मनाङेका हकमा भने म्याद समाप्त भएपछि मात्र निवेदन पुगेकाले मुद्दा नचल्ने हुँदै समाप्त भएको थियो। मनाङेबाहेक गणेश लामा, पर्शुराम बस्नेत, अभिषेक गिरी र चक्रे मिलनको मुद्दा सर्वोच्चमा विचाराधीन छ। तीमध्ये गिरी बाहेकको पेसी सोमबार एकै इजलासमा तोकिएको थियो।
यसअघि यी मुद्दाहरूको पेसी फरक–फरक इजलासमा पर्ने गरेको थियो।
के थियो बस्नेतको मुद्दा?
बस्नेतको मुद्दामा विशेषले दाबी नपुग्ने ठहर गर्दै सफाइ दिँदा लिएको आधार त्रुटीपूर्ण भएको सरकारी पक्षको दाबी थियो। बस्नेतसँग विभागले ११ करोड बराबरको सम्पत्ति रहेको दाबी गरेको थियो। बस्नेतले श्रीमतीसँगै सहयोगी मुकेश बस्नेतको नाममा गुण्डागर्दीबाट आर्जन गरेको सम्पत्ति लुकाएको दाबी विभागको थियो।
मोरङमा ४२ रोपनी जग्गा, ३ वटा गाडी, एडजोन एडभर्टाइजिङ, पीआर हार्डवेयर, बंगलामुखी बिल्डर्स, गजलक्ष्मी ट्रेड, मेरो ट्राभल्स, वेलकम पार्टी प्यालेस र टेकेन्द्र निर्माण सेवालगायतमा लगानी गरेको विभागको आरोपपत्रमा दाबी गरिएको थियो। विशेष अदालतले उनले सम्पत्ति शुद्धीकरण ऐन आउनुअघि सम्पत्ति आर्जन गरेको भन्दै सफाइ दिएको थियो।
विशेषले बस्नेतलाई २०७४ चैत २५ गते सफाइ दिने फैसला सुनाएको थियो। विशेषका न्यायाधीशहरू बाबुराम रेग्मी, चण्डीराज ढकाल र नारायणप्रसाद पोखरेलको इजलासले उनलाई सफाइ दिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
