मस्को– २०१८ फिफा विश्वकपमा महादेशीय फुटबल प्रतियोगिता जितेका ३ टिममा मात्र सहभागी छन्। युरोपियन च्याम्पियन पोर्चुगल, एसियन च्याम्पियन अस्ट्रेलिया र उत्तर अमेरिका च्याम्पियन मेक्सिकोले खेल्दैछन्। तर अफ्रिकन च्याम्पियन क्यामरुन, दक्षिण अमेरिका च्याम्पियन चिली र ओसिनिया च्याम्पियन न्यूजिल्यान्ड विश्वकपमा सहभागी छैनन्। सन् १९९४ पछि तीन महादेशीय च्याम्पियन मात्र सहभागी भएको यो पहिलो पटक हो।
युरोपियन च्याम्पियन पोर्चुगलका लागि दुई वर्षमा दोस्रो उपाधि जित्ने अवसर छ। पोर्चुगल दुई वर्षअघि पहिलो अन्तर्राष्ट्रिय उपाधि जित्ने क्रममा युरो २०१६ को विजेता बनेको थियो।
रसिया विश्वकपमा पोर्चुगलको टिममा प्रतिभाशाली युवा खेलाडी छन। अनुभवी स्ट्राइकर रोनाल्डोसँगै युवा खेलाडी हुनु पोर्चुगलको बलियो पक्ष हो। यी खेलाडीको परीक्षण समूह चरणमा हुनेछ। समूह 'बी' मा रहेको पोर्चुगलले पूर्व विश्वविजेता स्पेन, इरान र मोरक्कोसँग खेल्नेछ।
बेर्नान्डो सिल्भा
उमेर – २४ वर्ष
क्लब – म्यानचेस्टर सिटी
पोजिसन– विंगर
युरो २०१६ सिल्भाले घाइते भएका कारण खेल्न पाएनन्। तर यो दुई वर्षमा उनले क्लबका लागि भने उत्कृष्ट खेल्न सफल भए। उनले २०१७ मा फ्रेञ्च क्लब मोनाकोबाट खेल्दै फ्रेञ्च लिग वानको उपाधि उचाल्न सफल भए। त्यसपछि इंग्लिस क्लब म्यानचेस्टर सिटीमा आवद्ध भएका सिल्भाको फर्म उस्तै रह्यो। यो सिजन पनि उनले सिटीबाट उपाधि उचाल्न सफल भए। गत वर्ष रसियामै भएको फिफा केन्फेडेरेसन कपमा पनि उनको प्रदर्शन गज्जबको थियो। टचलाइनमा बल खेलउन र दिशा परिवर्तन गर्न माहिर सिल्भासामु रसियामा आफ्नो क्षमता देखाउन अर्को अवसर छ।
ब्रुनो फर्नान्डेज
उमेर – २३ वर्ष
क्लब – स्पोर्टिङ सिपी
पोजिसन– आक्रामक मिडफिल्डर
क्लब फुटबलमा जमेका फर्नान्डेजले देशका लागि भने आफ्नो प्रतिभा देखाउन पाएका छेनन्। उनले १९ वर्षको उमेरमा इटालीयन सिरि एमा डेब्यु गरेका थिए। सुरुमा युडिनेसेबाट खेलेका उनी पछि साम्पडोरियामा आवद्ध भए। अहिले उनी पोर्चुगल फर्किएका छन्। प्रतिभाशाली मिडफिल्डर फर्नान्डेज यो सिजन पोर्चुगिज लिगमा गोलका लागि बढी पास दिने मध्येका खेलाडी हुन्। सन् २०१७ मा राष्ट्रिय टिममा डेब्यु गरेका उनी विश्वकपअघि उत्साहित छन्।
गेल्सन मार्टिन्स
उमेर – २३ वर्ष
क्लब – स्पोर्टिङ सिपी
पोजिसन – विंगर
स्पोटिङ सिपीका प्रमुख खेलाडी मार्टिन्सले विश्वकप छनोटका दौरान राष्ट्रिय टिममा डेब्यु गरेका थिए। उनले देशका लागि खेलेको दोस्रो खेलमा नै उत्कृष्ट खेल देखाएका थिए। सो खेलमा उनले गोलका लागि दुई पास मिलाइदिए। पोर्चुगिज लिगमा पनि यो सिजन मार्टिन्सको मुख्य भूमिका गोलका लागि पास उपलब्ध गराउनु नै थियो। २०१५ फिफा यू–२० विश्वकपमा पोर्चुगिज टिममा रहदा मार्टिन्सले २ गोल गरेका थिए। गत वर्ष रसियामै भएको कन्फेडेरेसन कपमा पनि पोर्चुगलले तेस्रो स्थान हात पार्दा उनी प्रमुख खेलाडी थिए।
आन्द्रे सिल्भा
उमेर– २२ वर्ष
क्लब – एसि मिलान
पोजिसन – स्ट्राइकर
यसै सिजन इटालीयन सिरी एमा डेब्यू गरेका सिल्भाले देशका लागि उत्कृष्ट प्रदर्शन गरिरहेका छन्। सेन्ट्रल फरवार्ड सिल्भाले देशका लागि २० खेलमा १४ गोल गरिसकेका छन्। उनले गरेका १० गोल त प्रतिस्पर्धात्मक खेलमा भएका थिए। पछिल्ला खेलमा पोर्चुगिज टिममा सिल्भा भन्दा बढी गोल गर्ने खेलाडी क्रिस्टियानो रोनाल्डोले मात्र हुन्। रसियामा भएको कन्फेडेरेसन कपमा खेलेका उनी २०१५ को यू–२० विश्वकपमा पनि पोर्चुगिज टिममा थिए।
गोन्कालो गुइडेस
उमेर – २१ वर्ष
क्लब – पिएसजी
पोजिसन – विंगर
गुइडेस पोर्चुगलका प्रशावशाली विंगर हुन्। उनी पोर्चुगलको यू–१५ देखि प्रत्येक राष्ट्रिय फुटबल टिममा पर्न सफल खेलाडी हुन्। पिएसजीमा आवद्ध भएपनि उनले यो सिजन लोनमा स्पेनिस क्लब भ्यालेन्सियाबाट खेले। जहाँ उनले उत्कृष्ट खेल पस्कन सफल भए। यो सिजन उनले भ्यालेन्सियाका लागि ११ पास गोल गर्न दिदा ५ गोल गर्न सफ भए। उनको तीव्र गति, सशक्त प्रहार गर्ने कला र ड्रिबलिङ शैली लोभलाग्दो छ।
रुबेन डियास
उमेर – २१ वर्ष
क्लब – बेन्फिका
पोजिसन – डिफेन्डर
डियास गत महिना २१ वर्ष पुगेका थिए। लगत्तै ट्युनिसिया विरुद्ध खेल्दै उनले राष्ट्रिय टिममा डेब्यू गरे। उनले यू–२० विश्वकपमा पोर्चुगिज टिमको कप्तानी सम्हालेका थिए। हाल बेन्फिकामा आवद्ध उनले सन् २०१८ मा क्लबका सवै खेलमा खेल्ने मौका पाए। उनले क्लबका अनुभवी कप्तान लुइसाओसको स्थानमा खेलेका थिए। युवा अवस्थामै ठूलो जिम्मेवारी पाएका डियासको राष्ट्रिय टिममा पनि अनुभवी डिफेन्डरसँग सहकार्य हुनेछ। डियास र राष्ट्रिय टिमका डिफेन्डर पेपेबीच १४ वर्षको उमेर भिन्नता छ। यस्तै लुइसाओसँग १६ वर्षको अन्तर छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
