फाइल तस्बिर
काठमाडौं। निरन्तरको वर्षाका कारण पहिरो खस्न थालेपछि बागमती प्रदेशअन्तर्गत चितवन र धादिङका प्रमुख सडकखण्डमा सवारीसाधनको आवागमन बन्द गरिएको प्रहरीले जनाएको छ।
चितवनमा बिहीबारदेखि लगातार वर्षा भइरहेको र त्यसका कारण नारायणगढ–मुग्लिन सडकखण्डका विभिन्न स्थानमा निरन्तर पहिरो खसिरहेको प्रहरीले जनाएको छ। पहिरोका कारण जोखिम बढेपछि अर्को सूचना प्रकाशित नभएसम्म सबै प्रकारका सवारीसाधनको आवागमन बन्द गरिएको हो।
त्यस्तै, धादिङमा पनि बिहीबारदेखि निरन्तर वर्षा भइरहेका कारण पृथ्वी राजमार्गका विभिन्न स्थानमा पहिरो खसिरहेको प्रहरीले जनाएको छ। त्यसैले अर्को सूचना नभएसम्म सबै सवारीसाधनको आवागमन बन्द गरिएको छ।
प्रहरीका अनुसार बिहीबार राति करिब ११:१० बजे धादिङको बेनीघाट रोराङ गाउँपालिका–७ स्थित कृष्णभीर र गजुरी गाउँपालिका–२ क्षेत्रमा पृथ्वी राजमार्गमा माथिबाट ठूलो ढुंगासहितको पहिरो खसेको थियो। पहिरोका कारण सडकखण्ड दुईतर्फी रूपमा अवरुद्ध भएको प्रहरीले जनाएको छ।
निरन्तर वर्षाका कारण थप पहिरोको जोखिम रहेकाले सडकको अवस्था सामान्य नभएसम्म यात्रु तथा सवारीसाधनलाई उक्त सडकखण्डमा आवागमन नगर्न प्रहरीले आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
