Photo : AP
काठमाडौं- गत बिहीबार भएको बम विस्फोट र लगतार भीड बढ्न थालेपछि तालिबानले काबुल विमानस्थल वरपरको क्षेत्र सिल गरेको छ।
तालिबानले त्यहाँ ठूलो संख्यामा आफ्ना लडाकू तैनाथ गर्दै विमानस्थल जाने सडक र मुख्य चोकहरूमा घेरा हालेको हो।
बेलायत र जर्मनीसहित धेरै देशले उद्धार अभियान आजबाट बन्द गरेका छन्। अब अमेरिकालगायत केही देशले मात्र हवाई सेवा दिइरहेका छन्।
काबुलस्थित विमानस्थल प्रवेश गेटमा शुक्रबार पनि ‘फायरिङ’ गरिएको बताइएको छ। ‘फायरिङ’पछि भागदौड मच्चिएको छ। फायरिङ कसले गर्यो अहिलेसम्म प्रस्ट हुन सकेको छैन।
बिहीबार मात्र विमानस्थलनजिक विस्फोट हुँदा १७० जनाको मृत्यु भएको थियो। मारिनेमा १३ अमेरिकी सैनिक र २ बेलायती नागरिक पनि थिए। बाँकी अफगानी नागरिक रहेको बताइएको छ।
यता, टर्कीका राष्ट्रपति रेजेप तय्यीप एर्दोआनले अफगानिस्तानको पछिल्लो विकसित अवस्थाबारे प्रष्ट नभएसम्म काबुल विमानस्थल सञ्चालनको जिम्मेवारी नलिने बताएका छन्।
शुक्रबार तालिबानसँग टर्कीका प्रतिनिधिको काबुलस्थित टर्की दूतावासमा तीन घण्टाभन्दा लामो समय बैठक गरेका थिए। बैठकमा उनले विमानस्थल नियन्त्रणमा लिएर चलाउनेबारे ठोस कुराकानी र निर्णय हुन नसकेको बताए।
उनले आवश्यक भएमा यस्ता बैठक फेरि पनि बसेर कुरो टुंगोमा पुर्याइने बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
