Rahmat Gul/AP Photo
काठमाडौं- दुई दशकपछि इस्लामिक कट्टरपन्थी तालिबान अफगानिस्तानमा पुनः सत्ता आउने तयारी गरेसँगै विभिन्न सामाजिक सञ्जालका कम्पनीले उनीहरुमाथि लगाइएको प्रतिबन्धलाई कायमै राख्ने भएका छन्।
अमेरिकी सरकारको विदेशी आतंककारी संगठनको परिभाषाका आधारमा तालिबानको गतिविधिमाथि प्रतिबन्ध लगाउने निर्णय गरेका सबैभन्दा ठूलो सामाजिक सञ्जाल फेसबुक र युट्युबले जारी प्रतिबन्धलाई कायमै राख्ने स्पष्ट पारेका हुन्।
फेसबुकका अनुसार पछिल्लो केही वर्षदेखि तालिबानका कतिपय नेताहरुका साथै प्रवक्तासमेत सामाजिक सञ्जाल प्रयोग गर्दै आएका छन्। उनीहरुका लाखौंको संख्यामा फलोअर्स रहेको बताइन्छ।
यद्यपि, फेसबुकले तालिबानलाई सेवाहरुबाट बञ्चित गरिनुका साथै सम्बन्धित सबै अकाउन्ट डिलिट गर्दै आएको छ। साथै, उनीहरुको समर्थनमा पोस्ट गर्नेहरुका अकाउन्टमाथि पनि प्रतिबन्ध लगाउँदै आएको थियो।
‘खतरनाक व्यक्ति तथा संगठनप्रतिको नीतिअन्तर्गत तालिबान लामो समयदेखि फेसबुकमा प्रतिबन्धित रहेको छ। यस्तै, तालिबानको प्रसंसा गरिएका सामग्रीहरुमाथि सक्रियरुपमा प्रतिबन्ध लगाइनुका साथै अवस्थाको अनुगमनका लागि अफगान विज्ञहरुको टिम खटाइएको छ,’ फेसबुकका प्रवक्ताले भने।
फेसबुक मात्र नभइ फेसबुकका मेसेन्जर, इन्स्टाग्राम र ह्वाट्सएपमा पनि तालिबानलाई प्रतिबन्ध लगाइएको छ।
‘फेसबुकसँग दारी र पास्तो भाषाका विज्ञहरुको एक समूह रहेको छ। त्यसले अफगानिस्तानको स्थानीय सामग्रीहरुमाथि निरन्तर निगरानी गर्दै सूचित गरिरहेको छ,’ उनले भने।
उता युट्युबले पनि तालिबानमाथि प्रतिबन्ध लगाउने आफ्नो नीतिलाई कायमै राख्ने भएको छ। ‘तालिबानद्वारा सञ्चालित तथा स्वामित्व राखिएको विश्वास गरिएका सबै युट्युब अकाउन्ट निस्क्रिय बनाइनेछ। यो कार्य कम्पनीको लामो समयदेखिकै नीति हो,’ युट्युब प्रवक्ताले भनेका छन्।
उता ट्वीटरले भने आफ्नो नीति खुकुलो पार्ने संकेत गरेको छ। ट्वीटरका प्रवक्ताले भने,‘ अफगानिस्तानको अवस्था निकै तीव्र रुपमा विकसित भैरहेको छ। हाम्रो प्राथमिकता भनेको मानिसहरुलाई सुरक्षित राख्नु हो र हामीहरु सतर्क छौं। हामी हाम्रा नियमहरु कार्यान्वयनका लागि सक्रिय रुपमा लागिरहन्छौं।’
अन्तर्राष्ट्रिय समाचार एजेन्सी रोयटर्सका अनुसार तालिबान प्रवक्ताले लाखौं फलोअर्स भएको ट्वीटर अकाउन्टको प्रयोग गरेर नयाँ सूचना तथा समाचारहरु सार्वजनिक गर्ने गर्दै आएका छन्।
‘हामीले अफगानिस्तानमा सहयोग तथा सहायताको खोजीका लागि ट्वीटरको प्रयोग गरिरहेका मानिसहरु पनि देखिरहेका छौं। ट्वीटरको नीति उल्लंघन गर्नसक्ने सामग्रीहरु खासगरी हिंसालाई बढावा पबर्द्धन गर्ने, प्लाटर्फमको दुरुपयोग गर्ने तथा स्पामहरुको समीक्षा गर्दछौं,’ ट्वीटरले भनेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1791388337.png)
