Photo : Wakil Kohsar/AFP
काठमाडौं- अफगानिस्तानको राजधानी काबुलमा तालिबान लडाकूहरुले सर्वसाधारणबाट हतियार संकलन गर्न थालेका छन्।
काबुलको सुरक्षार्थ आफूहरु खटिएको बताउँदै तालिबानले नागरिकलाई अब व्यक्तिगत सुरक्षाको आवश्यकता नपर्ने बताएको छ।
राष्ट्रपति अशरफ घानी देश छाडेर शरण लिन ताजिकिस्तान पुगेको समाचार प्रकाशित भएको केही समयपछि तालिबान प्रवक्ता जबीहुल्लाह मुजाहिदले आइतबार राजधानी काबुलको सुरक्षार्थ आफूहरु प्रवेश गरेको जानकारी दिएका थिए।
‘नागरिकहरूले व्यक्तिगत सुरक्षाको लागी हतियार राखेका छन्। उनीहरु अब सुरक्षित महसुस गर्न सक्छन्। हामी यहाँ निर्दोष नागरिकहरुलाई हानी पुर्याउन आएका हैनौं,’ तालिबान अधिकारीले समाचार एजेन्सी रोयटर्सलाई भने।
यसअगाडि तालिबानले विदेशी नागरिक र सरकारी सेनालाई घर फर्किन दिने बताएको थियो। यद्यपि, अफगानिस्तानमा नै बस्न चाहने विदेशी नागरिकले तालिबानको प्रशासनमा दर्ता गराउन आग्रह गरेको छ।
त्यस्तै, विमानस्थल र अस्पताल सञ्चालन गर्न दिने र अत्यावश्यक सेवामा कुनै रोक नलगाइने बताएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
