काठमाडौं- अफगानिस्तान तालिबानको नियन्त्रणमा पुगेको छ। अफगान राष्ट्रपति अशरफ घानी र उपराष्ट्रपति अमिरुल्लाह सालेहले देश छाडेर भागेका छन्।
तालिबानले काबुलतर्फ पाइला अघि बढाउँदै गर्दा सरकारी अधिकारीहरुले राष्ट्रपति घानी भागेको बताएका थिए। शुरुआती रिपोर्ट्सहरुमा उनी ताजकिस्तान भागेको जनाइएको थियो। तर, समाचार संस्था अल जजिराका अनुसार घानी, उनकी पत्नी, सेना प्रमुख र राष्ट्रिय सुरक्षा सलाहकार उज्वेकिस्तानको राजधानी ताशकन्द गएका छन्।
अलजजिराले राष्ट्रपतिका व्यक्तिगत सुरक्षा गार्डलाई उदृत गर्दै यस्तो दाबी गरेको हो, तर सरकारले यसको पुष्टि गरेको छैन।
देश छाडेर भागेपछि पहिलोपटक सार्वजनिक गरेको प्रतिक्रियामा घानीले आफू कहाँ छु भन्नेबारे भने केही उल्लेख गरेका छैनन्।
अफगानिस्तानबाट भागेपछि राष्ट्रपति घानीले देशमा रक्तपात रोक्नका लागि आफूले यस्तो कदम उठाएको प्रतिक्रिया दिएका छन्। आइतबार अफगानिस्तानबाट भागेका उनले सामाजिक सञ्जालबाट देश छाड्नुका कारणबारे पहिलोपटक प्रतिक्रिया दिएका थिए। उनले आफू रहँदा तालिबान काबुल प्रवेश गरेपछि झडप हुने र त्यसले लाखौं मानिसको जीवन खतरामा पर्न सक्ने भएकाले देश छाडेको उल्लेख गरेका छन्।
उनले लेखेका छन्, 'मलाई एक निकै कठिन फैसला गर्नु थियो, कि त म सशस्त्र तालिबान जो राष्ट्रपति भवनमा प्रवेश गर्न चाहिरहेका थिए, उनीहरुको अगाडि उभिउँ या फेरि आफ्नो देश जसको बिगत २० वर्षदेखि सुरक्षाका लागि मैले जीवन व्यतित गरें त्यसलाई छोडिदिउँ।'
'यदी त्यसबीचमा धेरै मानिस मारिएको र काबुल ध्वस्त भएको देख्न परेको भए ६० लाख जनसंख्या भएको शहरमा ठूलो मानवीय त्रासदी हुने थियो' उनले भनेका छन्।
तालिबानले तरबार र बन्दुकको भरमा जित हासिल गरेको उनले उल्लेख गरेका छन्। अब देशका नागरिक र उनीहरुको इज्जत हिफाजतको जिम्मेवारी तालिबानमाथि रहेको उनले बताएका छन्।
घानीले भनेका छन्, 'तर उनीहरुले मानिसहरुको मनलाई जित्न सक्दैनन्। इतिहासमा कसैलाई पनि शक्तिले यो हक प्राप्त भएकोछैन र मिल्ने पनि छैन। अब उनीहरुले एक ऐतिहासिक परीक्षा सामना गर्नुपर्नेछ, अफगानिस्तानको नाम र इज्जत बचाउने या अरु इलाका र नेटवर्क।'
धेरै अफगानी अनिश्चित भविष्यका बारेमा चिन्तित रहेको बताउँदै घानीले तालिबानका लागि सबै जनताको, पूरै राष्ट्रको, समाजका सबै बर्ग र अफगानिस्तानका महिलालाई उनीहरुको मन जित्ने एकिन दिलाउन चुनौती रहेको उल्लेख गरेका छन्।
शनिबार टेलिभिजनमा प्रसारित एक रेकर्ड भाषणमा राष्ट्रपति घानीले उनको प्राथमिकता अफगान सुरक्षाबलको फेरि संगठित गर्ने रहेको बताएका थिए। विनाश र विस्थापित हुनबाट बचाउनका लागि यस्तो गर्न आवश्यक रहेको बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779363027.jpg)
-1764146706.png)
