Photo : REUTERS/Files
काठमाडौं- अबको ३० दिनभित्र तालिबानले अफगानिस्तानको राजधानी काबुल कब्जा गर्ने निष्कर्ष निकालेको अमेरिकाले आफ्ना कर्मचारीलाई संवेदनशील सबै कागजात र सामग्री नष्ट गर्न निर्देशन दिएको छ। ३४ मा १९ प्रान्तमाथि तालिबानले कब्जा जमाएसँगै आफू समर्थित सरकार पनि चाँडै ढल्ने अनुमान अमेरिकाले लगाइसकेको छ।
बेलायती समाचार संस्था रोयटर्सका अनुसार संवेदनशील कागजात र विद्युतीय सामाग्रीहरू नष्ट गर्ने प्रयोजनका लागि अमेरिकी राजदूतावासले उपकरणहरू खरिद गरेको छ।
अमेरिका र अन्य विदेशी सैनिक २० वर्षको सैन्य अभियानपछि फिर्ता भएसँगै तालिबानी तीव्र रुपमा अघि बढिरहेका छन् र उनीहरुले गाँउ, शहर हुँदै राजधानी काबुल कब्जा गर्ने अवस्थामा पुगेका छन्।
शुक्रबारसम्म तालिबानले अफगानिस्तानको दक्षिणको कान्दहार र पश्चिमको हेरात शहर कब्जा गरिसकेका छन्।
अमेरिकाले अगष्ट महिनाको अन्तिम सम्ममा सबै अमेरिकी सेना फर्काउने तालिका बनाएको छ। यद्यपि, अमेरिकाले आफ्ना नागरिक र सहयोगी उद्दारका लागि ३ हजार सैनिक पुन: अफगानिस्तान पठाएको छ। अमेरिकी रक्षा मन्त्रालयले अमेरिकी सैनिकको मिसन छोटो समयका लागि हुने स्पष्ट पारेको छ।
मन्त्रालयका अनुसार यसका साथै १ हजार सैनिक कतारमा तैनाथ गरिएको छ। यी सैनिकलाई आवश्यक परेको खण्डमा अफगानिस्तान पठाइन सक्ने जनाइएको छ।
अफगानिस्तान पुगेका र कतारमा रहेका सैनिकले विशेष भिसामा अमेरिकामा शरण लिन चाहने अफगानीलाई सहयोग गर्ने जनाइएको छ। अमेरिकी सैनिकका लागि हजारौं अफगानी नागरिकले दोभाषे, सुराकी र अन्य हिसाबले सघाएका छन्।
कुनै पनि यस्ता संवेदनशील सूचना तालिबानको हात नलागोस् भनेर अमेरिकी सरकार सचेत देखिएको छ। त्यसैले राजदूतावासले त्यस्ता सूचना भएका कागजात र सूचना आदनप्रदान गर्न प्रयोग भएका विद्युतीय उपकरण नष्ट गर्ने प्रक्रिया शुरू गरेको समाचारमा उल्लेख छ।
अमेरिकी सरकारले बिशेष उडानमार्फत् अफगानिस्तानमा आफूहरुलाई सहयोग गरेका नागरिकलाई विशेष भिसा दिएर अमेरिका लैजाने योजना बनाइएको छ। अमेरिकी प्रवक्ता नेड प्राइसले अफगानिस्तान दूतावासका काम गरिरहेका ५४ सय कर्मचारीलाई त्यहाँबाट निकाल्ने अभियान शुरु भइसकेको जानकारी दिएका छन्।
यसमा करिब १४ सय अमेरिकी नागरिक भएको बताइएको छ। उनले काबुलमा आफूहरुले निगरानी गरिरहेको बताउँदै ती कर्मचारी र दूतावास कार्यालय रक्षाका लागि उपाय खोजिरहेको पनि बताएका छन्।
अफगानिस्तामा रहेका अमेरिकीलाई कुनै पनि उडानमा त्यहाँबाट बाहिरिन दूतावासले निर्देशन दिसकेको छ। यसका लागि अमेरिकाले अफगानिस्तानमा अतिरिक्त उडान पनि राख्ने छ।
यद्यपी, अफगानी नागरिकलाई भने बिनाभिसा अमेरिका लैजान तल्काल नसकिने हुँदा अरु कुनै मुलुक वा सुरक्षित अमेरिकी सैन्य अड्डाहरूमा लैजाने तयारी गरेको छ। तर, पेन्टागनका प्रवक्ता जोन किर्बीले विदेश मन्त्रालयलाई पनि विशेष अध्यागमन भिसा दिने प्रक्रियालाई तीव्र बनाउन आग्रह गरेका छन्। त्यसमा कुनै अवरोध हुन नहुने उनले स्पष्ट पारेका छन्।
उनको निर्देशनस्वरुप अमेरिकामा शरण लिन चाहने अफगानीको भिसा प्रक्रिया अघि बढाउन कुवेतमा १ हजार सैनिक अधिकृतहरूले काम शुरू गरे बताइएको छ।
अमेरिकी वार्ताकारले तालिबानले राजधानी काबुल कब्जा गरेमा आफ्नो दूतावासमा हमला नगर्न आग्रह गरिरहेका छन्। तालिबानसँग मुख्य अमेरिकी दूत जाल्मय खलीलजादको नेतृत्वमा भएको वार्तामा अमेरिकाले आफ्ना नागरिक र दूतावासका अधिकारीमाथि कुनै क्षति नपुर्याउन आग्रह गरेको हो।
यता, अमेरिकी विदेशमन्त्री एन्टोनी ब्लिन्केन र रक्षामन्त्री लोइड अस्टिनले अफगानी राष्ट्रपति असरफ घानीसँग कुरा गरेका छन्। उनीहरूले घानीलाई अमेरिका अफगानिस्तानको सुरक्षा र स्थिरताका लागि सधैं तयार रहेको बताए।
यता, बेलायतले पनि आफ्ना नागरिकको मद्दतका लागि ६०० सेना पठाउने तयारी गरेको छ। सैनिक टोली यो साताको अन्तिममा पुग्ने अनुमान गरिएको छ। यसमा चिकित्सक र विशेषज्ञहरू समेत रहने अन्तर्राष्ट्रिय सञ्चार माध्यमहरुले जनाएको छ।
यस्तै, जर्मनीले पनि आफ्ना नागरिकलाई आफगानिस्तान तुरुन्तै छाड्न आग्रह गरेको छ। अहिले अफगानिस्तानमा फोन सम्पर्क बन्द गरिएको छ। यसले कुन-कुन सहर तालिबानको आक्रमणमा रहेको भन्ने एकिन जानकारी आउन नसकेको स्थानिय अधिकारीहरुले बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1791388337.png)
