लगानी अभिवृद्धिका लागि सरकार निजीक्षेत्रसँग सहकार्य गर्न तयार छ : प्रधानमन्त्री देउवा

अर्थ समाचार

नेपाल लाइभ मंगलबार, साउन ५, २०७८ ०६:०५

काठमाडौं– प्रधानमन्त्री शेरबहादुर देउवाले निजी क्षेत्रको लगानी अभिवृद्धिमा सरकारले सधैँ सहयोग गर्ने बताएका छन्।

नेपाल उद्योग परिसंघको प्रतिनिधिमण्डलसँग सोमबार साँझ भएको भेटमा प्रधानमन्त्रीले औद्योगिक विकासका लागि निजी क्षेत्रले लगानी वृद्धि गर्नुपर्ने भन्दै त्यसको सहजीकरणका लागि आफू तयार रहेको बताएका हुन्।

आफ्नो पार्टीले सधैं नजी क्षेत्रलाई प्रवद्र्धन गरेको बताउँदै प्रधानमन्त्री देउवाले आवश्यक पर्ने नीतिगत सहजीकरणका लागि तयार रहेको बताएको भेटमा सहभागी एक उद्यमीले बताए।

परिसंघले अघि बढाएको ‘मेक इन नेपाल–स्वदेशी’ अभियान नेपालको अर्थतन्त्रमा गुणात्मक परिवर्तन ल्याउन औजार बन्ने विश्वास व्यक्त गर्दै देउवाले नेपाली वस्तुको उत्पादन र उपभोग बढाउन यस अभियानले महत्त्वपूर्ण भूमिका निर्वाह गर्ने बताए।

कोभिडले निम्त्याएको संकटसँग जुध्न सरकारले सबै संयन्त्रको प्रयोग गरिरहेको बताउँदै प्रधानमन्त्री देउवाले यो संकट समाधानका लागि निजीक्षेत्रको सहयोग अपरिहार्य भएको बताए।

भेटका अवसरसमा परिसंघका अध्यक्ष शतीशकुमार मोरले प्रधानमन्त्री देउवालाई बधाई ज्ञापन गर्दै निजी क्षेत्रले सरकारबाट ठूलो अपेक्षा गरेको बताए। उनले नीतिगत सहजीकरणमार्फत लगानी अभिवृद्धिको वातावरण बनाउन पनि प्रधानमन्त्रीसमक्ष आग्रह गरे।

आयातमुखी नेपाली अर्थतन्त्रलाई उत्पादनमुखी बनाउन उद्यमी प्रयासरत रहेको बताउँदै मोरले यसका लागि सरकारले नीतिगत र प्रक्रियागत सहजीकरण गरिदिनुपर्नेमा जोड दिए। नीतिगत स्थिरताले लगानी बढाउन सहयोग गर्ने भन्दै अध्यक्ष मोरले सरकारले त्यसमा ध्यान दिनुपर्ने बताए।

भेटका अवसरमा परिसंघका निवर्तमान अध्यक्ष हरिभक्त शर्माले नेपालको अर्थतन्त्रलाई चलायमान बनाउन र यसको नेतृत्व गर्न निजी क्षेत्र सक्षम रहेको भन्दै त्यसमा सरकारले साथ दिनुपर्ने बताए।

यसैगरी परिसंघका वरिष्ठ उपाध्यक्ष विष्णुकुमार अग्रवालले विद्यमान सङ्कटसँग जुध्न कोभिडविरुद्धको भ्याक्सिन आवश्यक भएको भन्दै त्यसको उपलब्धतामा सरकारले ध्यान दिनुपर्नेमा जोड दिए।

प्रधानमन्त्री तथा मन्त्रिपरिषद्को कार्यालयमा भएको भेटमा निर्वाण चौधरी, कृष्णप्रसाद अधिकारी, राजेशकुमार अग्रवाल, सुलभ अग्रवाल र वीरेन्द्रराज पाण्डे एवं महानिर्देशक यादवप्रसाद पौड्याललगायत सहभागी थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

बेलायतमा घरबेटीद्वारा निकालिएपछि डेढ महिनादेखि बेपत्ता नेपाली विद्यार्थी सम्पर्कमा आए

इजिप्टका राष्ट्रपतिसँग टेलिफोन संवाद : विपिन जोशीको रिहाइका लागि आग्रह

भारतको बायर्निहाट शहर विश्वव्यापी प्रदूषण सूचीको शीर्ष स्थानमा : प्रतिवेदन