नक्कली भ्याट बिलबाट ६६ करोड बढी राजस्व छलि, ३ जनाविरुद्ध मुद्दा दर्ता

अर्थ समाचार

नेपाल लाइभ बुधबार, असार ३०, २०७८ १८:२१

काठमाडौं– झुटा तथा नक्कली मूल्य अभिवृद्धि कर विजक (भ्याट बिल) जारी गरेर राजस्व छलि गर्ने ३ वटा फर्मका सञ्चालक तथा कारोबारीविरुद्ध ६६ करोड बढी बिगो दाबी गर्दै मुद्दा दर्ता भएको छ।

राजश्व अनुसन्धान विभागले रौतहटको साविक ब्रह्मपुर गाविस–७ को मनिराज सप्लायर्स र रौतहटकै साविक तेजपाकड गाविस–५ ठेगाना भएको शिव ट्रेडर्स र अल्का सप्लायर्सका सञ्चालक तथा कारोबारीविरुद्ध ६६ करोड ८६ लाख ७३ हजार ४३८ रुपैयाँ बिगो दाबी गर्दै उच्च अदालत पाटनमा मुद्दा दायर गरेको हो।

विभागका अनुसार मनिराज सप्लायर्सका प्रोप्राइटर राज देवी तथा उक्त फर्मका मुख्य कारोबारी गर्ने व्यक्ति राजाराम महतोले मालबस्तु स्थानीय खरिद तथा आयात नगरी झुटो खरिद देखाइ विभिन्न फर्महरुलाई बिक्री विजक मात्रै जारी गर्ने गरेको देखिएको छ। उनीहरुले विभिन्न खरिदकर्तालाई भ्याट बिल जारी गरी उनीहरुबाट राजस्वअनुसारको रकम लिने गरेका थिए। विजक जारी गरेपनि उनीहरुले उक्त रकम सरकारी कोषमा जम्मा नगरी राजस्व चुहावट गरेका देखिएको विभागले जानकारी दिएको छ।

मनिराज सप्लायर्सका प्रोप्राइटर र मुख्य कारोबारीले भ्याटतर्फ १५ करोड ८४ लाख १७ हजार ३०७ र कायकरतर्फ २५ करोड ६७ लाख १४ हजार ५४७ रुपैयाँ गरी ४१ करोड ५१ लाख ३१ हजार ८५४ रुपैयाँ राजस्व छलि गरेका विभागको भनाइ छ।

विभागले दुवैजनाविरुद्ध ४१ करोड ५१ लाख ३१ हजार ८५४ रुपैयाँ बिगो कायम गर्दै बिगोको दोब्बरसम्म जरिवाना र ३ वर्षसम्म कैद सजाय मागदाबी गरेको छ।

यस्तै, शिव ट्रेडर्सका प्रोप्राइटर तथा अल्का सप्लायर्सका मुख्य कारोबारी ओमप्रकाश सिंह भुमिहारविरुद्ध २५ करोड ३५ लाख ४१ हजार ५८४ रुपैयाँ बिगो दाबी गरेर उच्च अदालत पाटनमा मुद्दा दायर भएको छ। विभागका अनुसार भुमिहारले मालबस्तु स्थानीय खरिद तथा आयत नगरी विभिन्न फर्महरुबाट झुटा तथा नक्कली भ्याट बिल लिएर आयकरतर्फ खर्च दाबी र भ्याटतर्फ कर कट्टी दाबी गरेर भ्याट र आयकर समेतको राजस्व चुहावट गरेको देखिएको छ।

विभागका अनुसार उनले भ्याटतर्फ ७ करोड ४५ लाख ८६ हजार ४९० रुपैयाँ र आयकरतर्फ १७ करोड ८९ लाख ५५ हजार ९४ रुपैयाँ गरी २५ करोड ३५ लाख ४१ हजार ५८४ रुपैयाँ बराबरको राजस्व छलि गरेका देखिएको छ।

विभागले भूमिहारविरुद्ध २५ करोड ३५ लाख ४१ हजार ५८४ रुपैयाँ बिगो कायम गरी बिगोको दोब्बरसम्म जरिवाना र ३ वर्षसम्म मागदाबी गरेर मुद्दा दर्ता गरेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

गुडिरहेको गाडीबाट हामफाल्दा एक जनाको मृत्यु

सभ्य भएर होली खेल्न रौतहट प्रशासनको आग्रह

समाजवादी मोर्चाको बैठक जारी