बैठकमा सहभागी हुने क्रममा कार्यदल सदस्य शंकर पोखरेल।
काठमाडौं- नेकपा (एमाले) एकता कार्यदलको बैठक सिंहदरबारमा बसिरहेको छ। अध्यक्ष केपी शर्मा ओली र वरिष्ठ नेता माधवकुमार नेपाल पक्षका नेताहरू सम्मिलित कार्यदलको बैठ बैठक अर्थ मन्त्रालयमा जारी छ।
पाैने ७ बजेदेखि जारी बैठकमा कार्यदलमा रहेका सबै नेता सहभागी छन्।
संकटमा परेको एमालेको संकट टार्न कार्यदल फेरि ब्युँताइएपछि बैठक बसेको हो। आइतबार राति बालुवाटारमा एमाले अध्यक्ष एवं प्रधानमन्त्री केपी शर्मा ओली र उपाध्यक्ष भीम रावलबीच भएको वार्ताबाट बनेको ‘वातावरण’ले कार्यदल ब्युँताएको हो।
कार्यदलमा दुवैपक्षका पाँच/पाँच जना नेता रहेका छन्। कार्यदलमा ओली पक्षबाट नेम्वाङसहित विष्णु पाैडेल, शंकर पोखरेल, प्रदीप ज्ञवाली र विष्णु रिमाल रहेका छन्। नेपाल पक्षबाट रावलसँगै सुरेन्द्र पाण्डे, घनश्याम भुसाल, गोकर्ण विष्ट र रघु पन्त रहेका छन्।
गत जेठ २ गते अध्यक्ष केपी शर्मा ओली र वरिष्ठ नेता माधवकुमार नेपालबीच सिंहदरबारमा भएको वार्तापछि कार्यदल बनाइएको थियो।
गत जेठ ६ गते राष्ट्रिय सभाको बागमती प्रदेश अन्तर्गत रिक्त पदमा भएको उपनिर्वाचनपछि कार्यदलले गर्दै आएको एकताको पहल बिथोलिएको थियो।
राष्ट्रिय सभा उपनिर्वाचनमा एमालेका तर्फबाट रामबहादुर थापा 'बादल' उम्मेद्वार थिए भने नेपाल पक्षले विपक्षी गठबन्धनका खिमलाल देवकोटालाई साथ दिएको थियो। निर्वाचनमा देवकोटा विजयी भएका थिए।
त्यसयता कार्यदल निष्क्रिय थियो। नेपाल पक्षका कार्यदल संयोजक रावलसहित ११ नेतामाथि कारबाही भएपछि एमालेको संकट थप चुलिएको थियो।पछिल्लो समय एमालेभित्र विवाद झन् बढेपछि दोस्रो तहका नेताहरू सघन संवादमा थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771727337.png)
-1764146706.png)
-1771592819.png)
