काठमाडौं– क्रियाशील सदस्यताको मापदण्ड तय गर्न कांग्रेस नेता कृष्णप्रसाद सिटौला र रमेश लेखकबीच ४ घण्टा छलफल भएको छ।
क्रियाशील सदस्यताको मापदण्ड बनाउन केन्द्रीय समितिले समन्वयको जिम्मेवारी नेता सिटौलालाई दिएको छ। क्रियाशील सदस्यता छानबिन समितिका संयोजक समेत रहेका लेखकलाई बोलाएर सिटौलाले मापदण्डको बारेमा छलफल गरेका हुन्।
अन्य दलबाट आएकालाई क्रियाशील सदस्यता प्रदान गर्ने विधिलाई लिएर कांग्रेसभित्र विवाद छ। समायोजन समितिले गरेको निर्णयानुसार कांग्रेस प्रवेश गरेका सबैले क्रियाशील सदस्यको मान्यता पाउनुपर्ने सभापति शेर बहादुर देउवा पक्षको अडान छ। इतर पक्षले अरु सदस्य अनुसारनै पार्टीले बनाएको मापदण्ड पूरा गरी उनीहरू सदस्य बन्नुपर्ने तर्क राखेको छ।
अर्को तर्फ, शतप्रतिशत भन्दा बढी सूचीकृत भएका स्थानका क्रियाशील सदस्य कुन आधारमा समावेश गर्ने भन्ने मापदण्ड तय हुन सकेको छैन। चार तहबाट प्रमाणित नभइ सूचीकृत भएका क्रियाशील सदस्यको सन्दर्भमा कसरी सम्बोधन गर्ने भन्ने विषयमा पनि अन्योल छ।
सिटौलाले भने पार्टीले दिएको जिम्मेवारी अनुसार क्रियाशील सदस्यताको मापदण्ड बनाएर बिहीबार बुझाउने बताइएको छ।
क्रियाशील सदस्यता छानबिन समितिको बैठक पनि बिहीबार बोलाइएको छ। उक्त बैठकले मापदण्डअनुसार विवादित स्थानका नाम टुंग्याउने बताइएको छ। समितिलाई असार २० गते भित्रको कार्यअवधि दिइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771727337.png)
-1764146706.png)
