काठमाडौं– नेपाली कांग्रेसले क्रियाशील सदस्यता वितरणको विवादलाई टुंगो लगाउने गरी प्रक्रिया अगाडि बढाइएको बताएको छ।
क्रियाशील सदस्यता छानबिन समितिका संयोजक रमेश लेखकले विवाद भएका जिल्ला र निर्वाचन क्षेत्रमा पनि क्रियाशील सदस्यता वितरण तथा इन्ट्रीको प्रक्रिया शुरु भएको जानकारी दिए।
क्रियाशील सदस्यता वितरणको सन्बन्धमा विवाद देखिएका बारा, बर्दिया, सिन्धुपाल्चोक लगायत जिल्लामा इन्ट्रीको काम शुरु भइसकेको नेता लेखकको भनाइ छ।
नेता लेखकले क्रियाशील सदस्यतासम्बन्धी सबै विवाद टुंग्याएर वडादेखि केन्द्रसम्मको सबै अधिवेशनहरु निर्धारित मितिमै सम्पन्न गरिने पनि बताए।
‘देशभरका अधिकांश जिल्लाहरु र अधिकांश निर्वाचन क्षेत्रहरुबाट क्रियाशील सदस्यताको नवीकरण र नयाँ क्रियाशील सदस्यताको विवरण इन्ट्री भइसकेको छ,’ नेता लेखकले भने, ‘पछिल्लो समयमा पार्टीको आन्तरिक समायोजनमा केही समस्या र जटिलता भएका कारणले र अरु केही कारणले केही जिल्लामा क्रियाशील सदस्यताको इन्ट्रीको काम प्रभावित भएको थियो। तर, आज (आइतबार)देखि त्यो सबै काम पनि अगाडि बढिसकेको छ।’
नेता लेखकले अब देशका कुनै पनि जिल्ला र निर्वाचन क्षेत्रमा क्रियाशील सदस्यताको काम नरोकिने दाबी पनि गरे। ‘पार्टीको आन्तरिक समस्या लगायत कारणले बारा, बर्दिया तथा सिन्धुपाल्चोक क्रियाशील सदस्यताको काम अगाडि बढ्न सकेको थिएन। अब ती जिल्लामा निरन्तर रुपमा अगाडि बढ्ने छ,’ नेता लेखकले भने।
नेता लेखकका अनुसार हालसम्म देशभरीबाट झन्डै ८ लाख २० हजार क्रियाशील सदस्यताको इन्ट्री भएको छ। केही जिल्ला र क्षेत्रहरुबाट अहिले पनि इन्ट्री भइरहेको उनले जानकारी दिए।
‘अधिकांश ठाउँको सदस्यता विवरण सार्वजनिक भइसकेको छ। अहिले इन्ट्री भइराखेका ५–७ ठाउँ बाहेक, अरु सबै ठाउँबाट आएका क्रियाशील सदस्यताको विवरण वेबसाइटबाट सार्वजनिक भइसकेको छ,’ नेता लेखकले भने।
नेता लेखकले क्रियाशील सदस्यताका सन्दर्भमा परेका उजुरीमाथि केन्द्रित भएर छलफल थालिएको पनि बताए। अहिले इन्ट्री भइराखेको ठाउँ बाहेक अरु ठाउँबाट उजुरी लिने काम बन्द भइसकेको पनि उनले बताए।
‘अब उजुरीमाथि केन्द्रित भएर छलफल गरिराखेका छौं। धेरै ठाउँमा सहमतिमै निर्णय गरेर टुंगो लगाइसकेको अवस्था छ,’ नेता लेखकले भने।
नेता लेखकले क्रियाशील सदस्यता वितरणको विषयमा परेका उजुरीमाथि समान धारण बनाउने प्रयास भइरहेको बताए। त्यसका लागि पार्टी पदाधिकारी र पूर्वपदाधिकारीहरुसँग छलफल गरिने पनि उनले जानकारी दिए।
‘केही विषयहरुमा समान धारण बन्न सकेको छैन, त्यो बारेमा पदाधिकारी र पूर्व पदाधिकारीहरुसँग छलफल गरेर समान धारणा बनाउने प्रयास भइराखेको छ,’ नेता लेखकले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789010467.jpg)
-1786602170.png)
