काठमाडौं- नेपाली कांग्रेसका क्रियाशील सदस्यका लागि सूचीकृत सदस्यकाविरुद्ध परेका उजुरी टुंग्याउन मापदण्ड बन्ने भएको छ।
क्रियाशील सदस्यका बारेमा छानविन समितिमा मापदण्ड बनाउन सहमति हुन नसकेपछि शीर्ष नेतालाई जिम्मेवारी दिने निर्णय गरिएको थियो। सोही अनुसार आफ्नो तर्फको धारणा तय गर्न संस्थापन इतरको बैठक बसिरहेको छ।
वरिष्ठ नेता रामचन्द्र पौडेलले शुक्रबार बोलाएको बैठकको निर्णय अनुसार शनिबार विहान छलफलका लागि नेताहरु जुटेका छन्। संस्थापनइतरबाट छानबिन समितिमा रहेका सदस्यसहितको बैठक बसेको हो।
नेताहरु डा मीनेन्द्र रिजाल, गगन थापा, प्रदीप पौडेल, जीवन परियार, कल्याण गुरुङ, गुरुराज घिमिरे लगायतका नेताको बैठक बत्तिसपुतलीस्थित अनुपम फुडल्याण्डमा बसेको छ। 'क्रियाशील सदस्य टुंगाउनका लागि मापदण्ड बनाउन हाम्रो पक्षको धारणा तय गर्न बैठक बसिरहेको छ', छानबिन समिति सदस्य कल्याण गुरुङले जानकारी दिए।
सूचीकृत आठ लाख सदस्यमध्ये करिब तीन लाख सदस्यका बारेमा विवाद छ। सूचीकृत नामकाबिरुद्धमा कयौं उजुरी र गुनासा दर्ता भएको समितिले जनाएको छ। प्रदेश २ का ८ जिल्लासहित मोरङ र सुनसरीबाट धेरै उजुरी परेका छन्।
पार्टी भित्रको विवादले सिन्धुपाल्चोक, बारा र बर्दियाबाट हालसम्म क्रियाशील सदस्य सूचीकृत हुन सकेका छैनन्। ५० जिल्लाको क्रियाशील सदस्य छानबिन समितिले टुङ्गो लगाएको छ।
२४ जिल्लाका क्रियाशील सदस्य छानबिन गर्न बाँकी छ। ती मध्ये १५ जिल्लाबाट परेका उजुरी गम्भीर प्रकृतिको भएको समितिले जनाएको छ। कस्तो प्रकृतिको उजुरीलाई कुन रूपमा छानविन गरी समाधान निकाल्ने मापदण्ड नहुँदा अन्योल छ। मापदण्ड बनाएर क्रियाशील सदस्यको यकिन गर्न लागिएको छ।
छानविन समितिलाई क्रियाशील सदस्यको अन्तिम टुंगो लगाउन असार २० सम्मको समय निर्धारण गरिएको छ। क्रियाशील सदस्य निश्चित नहुँदासम्म अधिवेशन प्रक्रिया सुरु हुन सक्दैन। साउन १२ बाट वडा तहको अधिवेशनसँगै तल्लो तहको अधिवेशनको सुरुवात हुन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789010467.jpg)
-1786602170.png)
